மனிதனின் பரிணாம வளர்ச்சிக்கு உதவிய தாவரங்கள்!

by **சிவா** Fri Apr 24, 2015 1:06 am

தாவரங்களின் மரபணுக்களைப் பெற்று மனிதர்கள் பரிணாமம் அடைந்திருக்க வாய்ப்புகள் இருப்பதாக சமீபத்திய அறிவியல் ஆராய்ச்சி முடிவுகள் தெரிவிக்கின்றன.

இங்கிலாந்தில் உள்ள கேம்பிரிட்ஜ் பல்கலைக் கழகம், மனித இனத்தின் பரிணாம வளர்ச்சிக்கு முக்கியக் காரணமான மரபணு குறித்து பல ஆராய்ச்சிகளை கடந்த 2001-ம் ஆண்டு முதல் மேற்கொண்டு வருகிறது.

இதில், மனிதர்கள் மரபணுக்களை தமது இனத்திடமிருந்து மட்டும் பரிமாற்றம் செய்துக்கொண்டார்களா அல்லது வேறு இனத்திலிருந்தும் மரபணுப் பரிமாற்றம் நடந்துள்ளதா என தீவிரமாக ஆராயப்பட்டு வந்தது.

இந்த ஆராய்ச்சியின் முடிவில், மனித இனமானது தாவரங்கள், நுண்ணிய தாவரங்கள் மற்றும் பூஞ்சைகளின் மரபணுக்களையும் பரிமாற்றம் செய்துகொண்டு பரிணாமம் அடைந்திருக்க வாய்ப்புள்ளதாக கண்டுபிடிக்கப்பட்டுள்ளது.

சமீபத்தில் வெளியான இந்த ஆராய்ச்சி முடிவுக்கு எதிராக பல விமர்சனங்கள் எழுந்தன.

ஆனால், தற்போது Horizontal Genetic transfer (HGT) எனப்படும் 'கிடைமட்ட மரபணுப் பரிமாற்றம்' என்ற முறையில் தாவரங்களில் இருந்து ஒரு குறிப்பிட்ட பாக்டீரியா மூலம் மனித இனத்துக்கு மரபணுப் பரிமாற்றம் நடந்திருக்க வாய்ப்பு இருப்பதாக சில விஞ்ஞானிகள் ஏற்றுக்கொண்டுள்ளனர்.

அதாவது, மற்ற இனங்களை போல, நேரடியான இனப்பெருக்கம் மூலம் வம்சாவளியை உருவாக்குவது மட்டுமில்லாமல், கிடைமட்ட மரபணுப் பரிமாற்ற முறையில் தன்னைச் சுற்றி வாழும் தாவரங்கள் உள்ளிட்ட உயிரனங்களின் மரபணுக்களையும் பெற்று மனித இனம் இனப்பெருக்கத்தில் ஈடுபட்டிருக்க வாய்ப்புள்ளதாக ஆராய்ச்சி முடிவுகள் தெரிவிக்கின்றன.

மனிதர்களின் மரபணுப் பரிமாற்றம் குறித்து ஆராய்ச்சியில் ஈடுபட்டிருக்கும் டாக்டர் அலிஸ்ட் கிரிஸ்ப் இதுபற்றிக் கூறும்போது, மரபணுப் பரிமாற்றத்தின் ஆரம்பக் கட்டத்தைப் பற்றி முதன்முதலாக மேற்கொள்ளப்பட்டிருக்கும் இந்த ஆராய்ச்சி, கிடைமட்ட மரபணுப் பரிமாற்றம் மூலம் விலங்குகள், தாவரங்கள் மற்றும் மனிதர் களிடம் இருந்து ஆயிரக்கணக்கான மரபணுக்கள் பரிமாற்றம் நடந்துள்ளதைக் காட்டுவதாகத் தெரிவித்துள்ளார்.

மேலும், அரிதாக நிகழ்ந்திருக்கும் இந்த மரபணு பரிமாற்றமானது தற்போதும் மனிதர்கள் உள்பட அனைத்து விதமான விலங்கினங்களிலும் செயல்பட்டு வருவதாகத் தெரிவித்த அவர், ‘மனித இன பரிணாமம்‘ குறித்து நமக்கு ஏற்கனவே இருக்கும் கருத்தை வேறு கோணத்தில் சிந்திப்பது அவசியம் என வலியுறுத்தியுள்ளார்.