மூளையில் கட்டி: அறுவை சிகிச்சை இல்லாமல் ஊசி துளை மூலம் பரிசோதனை

சென்னை அரசு பொது மருத்தவமனையில் மூளை நரம்பியல் அறுவை சிகிச்சை பிரிவில் உயர்ரக சிகிச்சை அளிக்கப்படுகிறது. தற்போது இந்த பிரிவுக்கு ரூ. 55 லட்சம் செலவில் ‘‘ஸ்டீரியோ டாக்சி’’ என்ற நவீன கருவி நிறுவப்பட்டுள்ளது.

இதன் மூலம் மூளையின் மையப் பகுதியில் உள்ள கட்டியில் இருந்து பரிசோதனைக்காக திசுக்களை எளிதாக எடுக்க முடியும்.

இதுகுறித்து மருத்துவமனை முதல்வர் டாக்டர் விமலா, துறை தலைவர் ரங்கராஜன் ஜோதி ஆகியோர் நிருபர்களிடம் கூறியதாவது:–


மூளையில் உள்ள கட்டிகளை அறுவை சிகிச்சை செய்யாமல் மயக்க மருந்து கொடுக்காமல் நோயாளி சுய நினைவுடன் இருக்கும் போது இந்த பரிசோதனை மேற்கொள்ளப்படும். தலையில் ஊசியை செலுத்தி மூளையில் உள்ள திசுக்களை இதனால் எடுக்க முடியும்.

இந்த நவீன சிகிச்சை முறையில் தலையில் மிகப்பெரிய அறுவை சிகிச்சையை தவிர்க்கலாம். நோயாளி சில நாட்களிலேயே குணமடைந்து வீட்டுக்கு செல்லலாம்.

இந்த நவீன கருவி மூலம் இதுவரை 9 பேருக்கு பரிசோதனை மேற்கொள்ளப்பட்டுள்ளது.

சென்னை ஆவடியைச் சேர்ந்த மோகனகிருஷ்ணன் (வயது63) என்பவர் தலைவலியால் அவதிப்பட்டு வந்தார். அவரது மூளையில் கட்டி இருப்பது தெரிய வந்தது. ஸ்கேன் செய்து பார்த்தபோது பல இடங்களில் கட்டிகள் இருந்தன.

அவருக்கு நவீன ’ஸ்டீரியோ டாக்சி’ முறையில் பரிசோதனை செய்யப்பட்டது. அவருக்கு மூளையில் காச நோய் இருப்பது கண்டு பிடிக்கப்பட்டது. இதையடுத்து அதற்கான சிகிச்சை அவருக்கு அளிக்கப்பட உள்ளது. இந்த பரிசோதனைக்கு தனியார் மருத்துவமனையில் ரூ. 3 லட்சத்துக்கு மேல் செலவாகும். இங்கு முற்றிலும் இலவசமாக செய்யப்பட்டுள்ளது.

இவ்வாறு அவர்கள் கூறினார்கள்.

பேட்டியின்போது சூப்பிரண்டு ரகுநந்தன் உடனிருந்தார்.
-maalaimalar

நல்லத்தகவல் ! நன்றி

நவீன மருத்துவ சிகிட்ச்சையில் முன்னேற்றங்கள் பல வந்துள்ளன என்பதை அறிய மகிழ்ச்சியே !
யாவரையும் அது சென்றடைந்தால் நமக்கும் மகிழ்ச்சியே .
ரமணியன்