காதலர் தினம்

by **சிவா** Fri Feb 13, 2015 3:34 am

கருத்தொருமித்த காதல்
காலத்தால் அழியாது.
கட்டுப்பாடான உணர்வுகளோடு
காதல் வளர்த்தால்
காண்போர்களிடம்கூட
காதலுக்கு மரியாதை!

காட்டாற்று வெள்ளமாய்
காதலுணர்வு கரைபுரண்டால்
நட்டாற்றில் வீழ்கின்ற
நாட்களே உருவாகும்!

தனிமைச் சந்திப்பிலும்
தரங்கெடா ஒழுக்கமே
இனிமை சேர்த்திடும்
இல்லறம் வரையிலும்!

காதலைக்கொண்டாடுங்கள்
கனிவோடு இதயத்துக்குள்.
காட்சிப்பொருளாய் ஆக்காதீர்
காதலென்ற புனிதமதை!

காதலியின் கழுத்தில்
கட்டுகின்ற மஞ்சள் நாணே
காதலின் பரிசென்று
கவனத்தில் கொள்வீராக!

வாழ்த்து அட்டைகளும்
வகைவகையான பரிசுகளும்
ஆழ்த்திடுமோ காதலியின்
அகத்தை மகிழ்ச்சிதன்னில்?

காதலர்தினக் கொண்டாட்டம்
கலாச்சாரச் சீரழிவே!
ஆதலினால் இளையோரே....
அப்புனிதம் குலைக்காதீர்!

- கிரிஜா மணாளன்,

by **சிவா** Fri Feb 13, 2015 3:34 am

மதத்தை சாதியை
சம்பிரதாயத்தை
உடைத்தெறிய
இளைஞர்களுக்கு
கிடைத்த ஆயுதம்
"காதல்"

இனம், மொழி
எல்லைகளைக் கடந்து
மனம் மட்டும்
பேசிக் கொள்ளும்
மொழி
"காதல்"

காதல் செய்வோம்
என்றழைத்தான் பாரதி
அவன் பெயருக்கேற்ப
பார் அதிர
காதலிப்போம்
வாருங்கள்..

- க.அருணபாரதி

by **சிவா** Fri Feb 13, 2015 3:35 am

மனமொன்றி நேசித்து
மனைவியாய் மாறியும்
வாரிசுகள் பெற்று
வசதிகள் பெருகியும்
வாழ்க்கைப் பிரச்சினைகள்
வதைப்பது தாளவில்லை.....
திருமண வாழ்க்கை
தூரத்துக் கானல்நீர்....
மீண்டும் வராதோ அந்த
மெல்லிய உணர்வுகளென
ஏங்கும் என் துணைவியை
எப்படி நான் தேற்றிடுவேன்?

- கிரிஜா மணாளன்.

by **சிவா** Fri Feb 13, 2015 3:36 am

என் கண்களில்
எல்லாமே அழகாகத் தெரிகின்றன.
பிடிக்காததெல்லாம்
இப்பொழுது பிடிக்கிறது
அவளையும் சேர்த்து
கவிதையின் கருப்பொருளுக்கு
கவலைப்படுவதில்லை
என் பேனா
நானும்
காதலிக்கிறேன்.

- யோகப்ரபா

by **சிவா** Fri Feb 13, 2015 3:36 am

கண்ணீர் சிந்துகின்றன
ரோஜாச் செடிகள்
காதலர் தினம்.

-வீ.விஷ்ணுகுமார்

by **சிவா** Fri Feb 13, 2015 3:37 am

கண்கள் பேசிய
வார்த்தை ஜாலத்தை
விட அதிகமாய்
கூறப்போவதில்லை,
வாழ்த்து அட்டையும்!
ஒற்றை ரோஜாவும்!
மனதில் கொண்டாடு
காதலர் தினத்தை!
கண்டுகொள்கிறேன்
கண்களில் காட்சியாய்.

-கவி.வள்ளி

by **சிவா** Fri Feb 13, 2015 3:37 am

காதலர் தினம்
============

களிப்புடன் காதலர் தினம்
கடந்துபோனது...
கவலையோடு மலர்களைப் பிரிந்த‌
ரோஜாச் செடிகள்.

> கிரிஜா மணாளன்.

by **சிவா** Fri Feb 13, 2015 3:38 am

சிறந்த பரிசு நீ
------------------

கவிதை போட்டியில்
கலந்து கொண்டேன்
காதல் என்று
தலைப்பு தந்தார்கள்
எதுவுமே
எழுத தோன்றவில்லை..
உன்னிடம்
என்ன சொல்ல
என்று நினைத்தபோது
என்னுள் தோன்றியதை
எழுதி கொடுத்து விட்டேன்...
சிறந்த கவிதை
என்று
முதல் பரிசு
தந்தார்கள்
அதனிலும்
சிறந்த பரிசு நீ

- வைகறை நிலா

by **சிவா** Fri Feb 13, 2015 3:38 am

காத‌லைச்சொல்லிக் க‌ளிப்ப‌டையும்
காத‌ல‌ர்தின‌ப் பெருவிழா!
இத‌ய‌ங்க‌ளின் இணைப்புத் திருவிழா..
இனிய‌ ந‌ட்பின் முதிர்ச்சிப் பெருவிழா!
உயிரைப் பிரிந்தால் உட‌ல் மாயும்
உள்ள‌க் காத‌லை ம‌ற‌ந்தால்
உயிர்போகும்!
காத‌ல் செய்து உயிர் வ‌ள‌ர்ப்பீர்..
கால‌ம் முழுதும் ம‌கிழ்வ‌டைவீர்!

அ. கௌத‌ம‌ன்