இணையத்தை மறக்க முயன்று கையை வெட்டிக் கொண்டவர்

by **சிவா** Fri Feb 06, 2015 12:07 pm

பீஜிங்: ஜியாங்சூ மாகாணம், நான்டங் நகரைச் சேர்ந்த மாணவர் ஜியா வாங், 19. இவர், 24 மணி நேரமும் இணையத்தில் பொழுதை கழிக்கும் பழக்கத்திற்கு அடிமையாகி விட்டார். அதில் இருந்து மீள வழி தெரியாமல், ஒரு விபரீத முடிவை எடுத்தார்.'சுவர் இருந்தால் தானே சித்திரம் வரைய முடியும்' என்பது போல், கை இருந்தால் தானே, விசைப் பலகையை தட்டி, இணையத்தில் விளையாட முடியும் என்று நினைத்த அவர், தனிமையான ஓரிடத்திற்கு சென்றார். அங்கிருந்த ஒரு கருங்கல் மீது தன் இடதுகை மணிக்கட்டை வைத்து, கத்தியால் ஓங்கி வெட்டி, அதை துண்டித்து விட்டார்.

அப்போது ஏற்பட்ட பயங்கரமான வலியை தாங்க முடியாத ஜியா வாங், ரத்தம் சொட்டச் சொட்ட ஒரு டாக்சியை பிடித்து, நான்டங் பல்கலைக்கழக மருத்துவமனைக்கு சென்று, அதன் வாசலில் மயங்கி விழுந்தார். மருத்துவர்களின் சிகிச்சையால் மயக்கம் தெளிந்த ஜியா வாங், போலீஸ் விசாரணையில், துண்டித்த மணிக்கட்டு இருக்கும் இடத்தை கூறினார். அங்கு சென்ற போலீசார், மணிக்கட்டை தேடி அலைந்து, ஒருவழியாக அதை கண்டுபிடித்து, மருத்துவர்களிடம் ஒப்படைத்தனர்.

10 மணிநேர அறுவை சிகிச்சைக்கு பின், துண்டிக்கப்பட்ட மணிக்கட்டு, மீண்டும் ஜியா வாங் உடலில் ஓர் அங்கமானது. இது, அந்த மணிக்கட்டை ஏதாவது நாய் கவ்விச் சென்றிருந்தால் சாத்தியமாகியிருக்காது என்று தெரிவித்த மருத்துவர்கள், சில நாட்கள் கழித்தே, ஜியா வாங்கின் கைவிரல்கள் பழையபடி இயங்குமா என்பது தெரிய வரும் என, கூறிவிட்டனர்.

அது இயங்காமல் இருக்க வேண்டும் என, மனதை அடக்கத் தெரியாத ஜியா வாங், பிரார்தித்தாலும் ஆச்சரியப்படுவதற்கில்லை.