குர்ஆன் போதிக்கும் பொறுமை

by **சிவா** Thu Feb 26, 2009 11:39 pm

காலத்தின் மீது சத்தியமாக மனிதன் தன் ஆயுளை வீணில் செலவு செய்து நிச்சயமாக நஷ்டத்தின்(வழியில்) இருக்கின்றான். ஆயினும் எவர்கள் விசுவாசங்கொண்டு நற்கருமங்களையும் செய்து சத்தியத்தை ஒருவருக்கொருவர் உபதேசம் செய்து (பாவங்களை விடுவதிலும், நன்மைகளைச் செய்வதிலும் ஏற்படும் கஷ்டங்களைச்) சகித்துக்கொள்ளுமாறும் ஒருவருக்கொருவர் உபதேசம் செய்து வந்தார்களோ அவர்களைத் தவிர (இவர்கள் நஷ்ட மடையவில்லை) (அல்குர்ஆன் 103:1-3) எனப்போதிக்கிறது இனிய இஸ்லாம்.

ஆம் இறை நம்பிக்கை, அதன் அடிப்படையில் செய்யும் நற்கருமங்கள், சத்தியத்தைக் கொண்டு அறிவுரை வழங்குதல், இன்னும் பொறுமையைக் கொண்டு அறிவுரை வழங்குதல் - இந்த நான்கும் ஒருவனிடம் இருந்தால் அவனது இம்மை, மறுமை வாழ்க்கை வெற்றிகரமாக அமையும். இந்த நான்கும் இல்லாவிட்டால் அவனது இம்மை, மறுமை வாழ்க்கை நஷ்டத்தில் இருக்கும் என குர்ஆன் கூறுகிறது.

ஒருவர் நிரந்தர நோயால் அவதிப்படலாம். சிலர் வறுமையால் துன்புறலாம். இன்னும் சிலருக்கு அடுக்கடுக்கான துன்பங்கள் வரலாம். எது வந்தபோதும் அனைத்தையும் பொறுமையுடன் சகித்துக்கொண்டு அல்லாஹ்வின் பெயரால் வாழ்பவன்தான் மனிதன். இதைத் தவிர்த்து விரக்தியால் தற்கொலை செய்வதும், கோபத்தால் பிறருக்கு கேடு விளைவிப்பதும் இஸ்லாத்துக்குப் புறம்பானதாகும். எனவே அனைத்தும் அல்லாஹ்வின் செயல் என வாழ்ந்தால் போதும் இம்மையில் மட்டுமல்லாது மறுமையிலும் நாம் அல்லாஹ்வின் பேரருளைப் பெற்றுச்சிறக்கலாம்.