பெற்ற தாயை கூடுவாஞ்சேரி பஸ் நிலையத்தில் விட்டுச்சென்ற மகன்

by **ராஜா** Sat Jan 03, 2015 5:14 pm

பெற்ற தாயை கூடுவாஞ்சேரி பஸ் நிலையத்தில் விட்டுச்சென்ற மகன்

காஞ்சீபுரம் மாவட்டம் கூடுவாஞ்சேரி பஸ் நிலையத்தில் சுமார் 65 வயது மதிக்கத்தக்க ஒரு பெண் உயிருக்கு ஆபத்தான நிலையில் இருப்பதாக கூடுவாஞ்சேரி போலீசாருக்கு பொதுமக்கள் தகவல் தெரிவித்தனர்.

கூடுவாஞ்சேரி போலீஸ் சிறப்பு சப்-இன்ஸ்பெக்டர்கள் தனசேகர், முகமதுஅலி ஆகியோர் அங்கு விரைந்து சென்று அந்த பெண்ணை மீட்டு 108 ஆம்புலன்ஸ் மூலம் செங்கல்பட்டு அரசு ஆஸ்பத்திரிக்கு சிகிச்சைக்காக அனுப்பி வைத்தனர்.

விசாரணையில் உயிருக்கு போராடிக்கொண்டு இருந்த பெண் சென்னை பெரம்பூர் பகுதியை சேர்ந்த ராகவன் என்பவரின் மனைவி சரோஜா(65) என்பதும் அவருடைய மகன் நேற்று முன்தினம் இரவு சென்னையில் இருந்து ஆட்டோவில் ஏற்றி வந்து கூடுவாஞ்சேரி பஸ் நிலையத்தில் இறக்கிவிட்டு சற்று நேரத்தில் வந்து விடுகிறேன் என்று சொல்லிவிட்டு சென்றவர் பின்னர் வரவில்லை. இதனால் அதிர்ச்சி அடைந்த அந்த பெண் இரவு முழுவதும் உணவு இன்றி பசியால் உடல்நிலை பாதிக்கப்பட்டுள்ளார் என்பதும் தெரியவந்தது.

இது குறித்து விசாரணை நடத்திக்கொண்டு இருந்த போலீசாரிடம், 80 வயது உடைய பெண் ஒருவர் அங்கே வந்து என்னை எனது மருமகன் ஒரு வாரத்திற்கு முன்பு இங்கு கொண்டு வந்து விட்டார். இன்னும் அவர் வரவில்லை என்று கூறினார். இதனால் அதிர்ச்சி அடைந்த போலீசார் அந்த பெண்ணிடம் தொடர்ந்து விசாரணை செய்தனர்.

அப்போது அந்த பெண், எனது பெயர் சரஸ்வதி. 80 வயது ஆகிறது. நான் உத்திரமேரூரை அடுத்த மருதம்பாடி கிராமத்தை சேர்ந்தவர். எனது கணவர் பெயர் ஜெயராமன். மகன் பெயர் நாகராஜ். மகள் பெயர் கிருஷ்ணவேணி. மருமகன் பெயர் ராமதாஸ் என்று கூறினார். இதனை தொடர்ந்து கூடுவாஞ்சேரி போலீஸ் இன்ஸ்பெக்டர் நாகலிங்கம் உத்தரவுப்படி சரஸ்வதியை போலீசார் மீட்டு ஆட்டோவில் அவரது சொந்த ஊருக்கு போலீஸ் பாதுகாப்புடன் அனுப்பி வைத்தார்.

-MAALAIMALAR