ருத்ரய்யா - தனித்த படைப்பாளி !

ஒரே ஒரு படத்தால் ஒரு இயக்குனர் நீண்ட காலத்திற்கு கொண்டாடப்படுவாரா ? ஆம் கொண்டாடப்படுவார். ஆறுமுகம் என்ற இயற்பெயர் கொண்ட ருத்ரய்யாவை அப்படித்தான் கொண்டாடுகிறோம். இன்று ருத்ரய்யா நம்முடன் இல்லை . சேலம் மாவட்டம் ஆத்தூரைச் சேர்ந்த ருத்ரய்யா தனது 67வது வயதில் உடல்நலக் குறைவால் கடந்த நவம்பர் 18 அன்று நம்மை விட்டு பிரிந்தார்.

அவள் அப்படி தான் - தமிழ் சினிமா வரலாற்றின் முற்றிலும் மாறுபட்ட திரைப்படம் . இந்தத் திரைப்படத்தின் இயக்குனர் தான் ருத்ரய்யா . இந்தத் திரைப்படம் குறித்து முன்பு எழுதிய பதிவு -
http://jselvaraj.blogspot.com.es/2013/06/blog-post_8.html?m=0 .

சினிமாத்துறையில் இருந்து கொண்டு கடைசிவரை சமரசமில்லாமல் வாழ்ந்த படைப்பாளி. இவருக்கு அஞ்சலி செலுத்தும் விதமாக 20-11-14 தமிழ் 'தி இந்து ' நாளிதழ் ஒரு முழு நடுப்பக்கத்தை ஒதுக்கியுள்ளது ,பாராட்டத்தக்கது. இந்த நடுப்பக்கதில் அவர் எழுதிய கட்டுரையின் ஒரு பகுதி வெளியிடப்பட்டுள்ளது. அதிலிருந்து சில வரிகள் " வளர்ச்சியின் ஒவ்வொரு படிநிலையையும் தாண்டியே ஒவ்வொரு இனமும் வந்திருக்க முடியும். சிலசில சிறு வேறுபாடுகள் இருந்திருக்கலாம். அதனால் ,இதில் மேலை , கீழை என்று எதுவும் இல்லை . எல்லா மனிதர்களும் ஒன்றுதான். எல்லோரும் ஒரு வகையில் தொப்பள் கொடிவழியே ஜனித்தவர்கள் தான். இதைத்தானே வேறு கோணத்தில் இரண்டாயிரம் வருஷத்துக்கு முன்னான நம் சங்கத்தமிழ்ப் பாட்டன் "யாதும் ஊரே யாவரும் கேளிர் " - என்று சொன்னான். இதனை இந்தியர்கள் , குறிப்பாகத் தமிழர்கள் உணர வேண்டும்.

மலட்டு ஆய்வாளர்களின் சுயநலத்தால் , அறிவு குறுகிய அறிவுஜீவிகளின் அருள்வாக்குகளைச் சிந்திக்காமல் கேட்டு , சாமியாடிக் கொண்டிருக்கிற வரையில் நாம் நம் சிந்தனையின் எல்லைகளை விரிவுபடுத்த முடியாது. சகிக்க முடியாத வெற்று சென்டிமெண்ட்களெல்லாம் , அந்த ஈரோட்டுக் கிழவன் போக்கப் போராடிய முடத்தனத்தில்தான் நம்மை மறுபடி கொண்டுபோய் நிறுத்தும். இறந்த காலத்திலேயே இருந்துகொண்டு , அதிலேயே கனவுகண்டு களிப்பதில் நம் தமிழர்கள் சமர்த்தர்கள். அப்படியே இருக்க விரும்பினால் , அவர்கள் உலகப் பொருளாதாரம் பற்றிப் பேசக் கூடாது.

கார் வேண்டும், கணிப்பொறி வேண்டும் , ரோபோ வேண்டும், மங்காணி வேண்டும் ; ஆனால் அவன் கலாச்சாரம் மட்டும் வேண்டாமென்றால் உங்களை விடுமா கருப்பு ? இது போன்ற மாயைகளைக் கேள்விகேட்டு உடைப்பவனே மனித குலத்தின் மேல் அக்கறை கொண்ட படைப்பாளி. " தமிழன் என்றோர் இனமுண்டு , தனியே அதற்கோர் குணமுண்டு " எல்லாம் சரி ; எல்லோருக்கும் அது உண்டு இல்லையா ! அதை வரலாறு சொல்லும் போது ஏற்கத் தவறினால் , நாமல்லவா காணாமல் போவோம். அதற்காக , நான் பழையதை மறுக்கவில்லை ; மறுதலிக்கவும் இல்லை . எல்லோருக்கும் அது உண்டு என்கிறேன். ஒரு வகையில் நாம் எல்லோரும் ஒன்று என்கிறேன். ஒன்றை மறந்துவிடாதீர்கள், அது வளர்ச்சியின் ஒரு அங்கம் . அதுவும் சேர்ந்ததுதான் வளர்ச்சி . வரப்போகும் தலைமுறை நீங்கள் பேசுவது போலவே உங்களைப் பற்றிப் பேசக் காத்திருக்கிறது என்பதை மறந்து விடாதீர்கள் ! ", இந்த வரிகளிலிருந்தே ருத்ரய்யா அவர்களின் ஆளுமையை தெரிந்து கொள்ள முடியும்.

கலைஞனுக்கு என்றுமே அழிவில்லை. அவர்கள் தங்களின் படைப்புகள் மூலம் வாழ்ந்து கொண்டே இருப்பார்கள் .

நன்றி - ருத்ரய்யா , தி இந்து .