தித்திக்கும் தீபாவளி மோடிக்கு ! அமைச்சர்களுக்கு இரவு விருந்து!

by **krishnaamma** Mon Oct 20, 2014 7:53 pm

புதுடில்லி: பிரதமராக மோடி பொறுப்பேற்ற பின்னர் அவர் கொண்டாடும் முதல் தீபாளியாக இது அவருக்கு அமைகிறது. 5 மாத கால ஆட்சியில் பல்வேறு சாதனைகளை செய்து வருவதாகவும், தொலை நோக்கு திட்டங்கள் செயல்படுத்தப்பட்டு வருவதாகவும் பா.ஜ., தனது வெற்றிப்பாதை இலக்கு சரியாக சென்று கொண்டிருக்கிறது என நிர்வாகிகள் பெருமை பட்டு வருகின்றனர். இதற்கு சான்று தான் சமீபத்திய அரியானா, மகாராஷ்ட்டிர தேர்தல் என்கின்றனர்.

பிரதமராக பொறுப்பேற்று கடந்த 100 வது நாளில் செய்திட்ட சாதனைகளை ரிப்போர்ட் கார்டு கொடுத்தனர் மோடி தலைமையிலான அமைச்சர்கள். இதில் குறிப்பிடத்தக்க சாதனையாக அனைவருக்கும் வங்கி கணக்கு. கிளீன் இந்தியா வெற்றி, மேக்இன் இந்தியா கோஷத்தின் மூலம் இந்தியாவை பல ஆயிரம் கோடிகள் இந்தியாவின் கதவை தட்டியது. பொருளாதாரம் மீண்டு வருவதாகவும் ஆய்வறிக்கைகள் தெரிவிக்கிறது. பண வீக்கம் மதிப்பு சரிவு, மொத்த மற்றும் சில்லரை வர்த்தக பணவீக்கம் குறைய துவங்கியிருக்கிறது. பங்குச்சந்தை கூட நல்ல நிலை நோக்கி வந்த வண்ணம் உள்ளது.

குறிப்பாக மோடியின் அந்நிய நாடுகளுடனாக தொடர்பில் அவரது அக்கறை பலரும் பாராட்டும் விதமாகவே அமைந்து வருகிறது. பதவியேற்ற சில மாதங்களில் முக்கிய நாடுகளாக ஜப்பான், அமெரிக்கா, நேபாளம், பயணத்தை முடித்துள்ளார். சீனா அதிபர்ஜி ஜிங் பிங் இந்தியா வந்து பிரதமருடன் நடத்திய சந்திப்பு பயனுள்ளதாகவே அமைந்தது.

சிவசேனாவுடனான கூட்டணி : இந்நிலையில் பிரதமர் மோடி இன்று தனது 44 அமைச்சரவை சகாக்களுக்கு இன்று இரவு விருத்தளிக்கிறார். இது தீபாவளி விருந்தா அல்லது சமீபத்திய தேர்தல் வெற்றிக்குரிய விருந்தா என பா.ஜ., வட்டாரம் வெளிப்படையாக எதுவும் சொல்ல மறுத்து விட்டது. இன்று இரவில் நடக்கும் விருந்தில் முக்கிய மெனுவாக மகாராஷ்ட்டிராவில் சிவசேனாவுடனான கூட்டணி அரசுக்கு இனிப்பான முடிவு கிடைக்கும் என்றே தெரிகிறது. இதில் பிரதமர் மோடியின் பேச்சு சற்று மிளகு காரமாகவே அமையும் என்று பா.ஜ.,வினர் சொல்கின்றனர்.

மத்தியில் கூட்டணியில் உள்ள சிவசேனா கட்சியை சேர்ந்த மத்திய அமைச்சர் ஆனந்த் கீத் டில்லி கிளம்பியிருக்கிறார். இவர் இந்த விருந்தில் பங்கேற்கிறார். மேலும் இந்த விருந்தின் போது இன்சூரன்ஸ் துறையில் அந்நிய நேரடி முதலீட்டுக்கு வரும் பார்லி., கூட்டத்தில் நிறைவேற்றுவது தொடர்பாகவும் பேசப்படும்.

ராஜ்யசபாவில் எம்.பி.,க்கள் பலம்: பார்லி.,யை பொறுத்தவரையில் லோக்சபாவில் பா.ஜ.,வுக்கு பெரும்பான்மை இருந்தாலும் ராஜ்யசபாவில் சற்று பலவீனமாவே இருந்து வந்தது. அரியானா, மகாராஷ்ட்டிர தேர்தல் வெற்றியால் ராஜ்யசபாவில் எம்.பி.,க்கள் பலம் பெறும் வாய்ப்பு ஏற்பட்டுள்ளது. இதனால் ராஜ்யசபாவில் எதிர்கட்சிகளை கெஞ்ச வேண்டிய நிலையும் இல்லாமல் போய்விடும். இதனால் பிரதமர் மோடி மிக உற்சாகமாவே காணப்படுகிறார். உண்மையிலேயே மோடிக்கு இது ஹேப்பி தீபாவளி தான் !

தினமலர்