வாழ்நாள் சாதனை நாயகன் ராபின் வில்லியம்ஸ்!

by **சிவா** Wed Aug 13, 2014 5:52 pm

நடிப்பால் பிரமிக்க வைக்கும் வித்தகர் ராபின் வில்லியம்ஸ் மரணம் ஹாலிவுட்டினை சோகத்தின் எல்லைக்கு இன்று இழுத்துச் சென்றிருக்கிறது. காரணம் அவரின் அசாதாரணமான திறமையும் நடிப்பும் தான். அவரால் முடியாது என்று ஏதும் கிடையாது. தன்னுடைய ஈடு இணையற்ற நடிப்பால் ரசிகர்களை சிரிக்கவும் வைப்பார். அதே ரசிகர்களின் கண்ணீருக்கும் இவரின் நடிப்பே சாட்சி. உலக ரசிக பட்டாளங்களுக்கும் இவரின் முகம் பரிச்சயம். அதிகமான மொழிகளில் இவரின் படம் மொழிபெயர்க்கப்படுவதற்கு இவரின் நடிப்பு மிக முக்கியக் காரணமாகும். உலக ரசிகர்களின் மனதில் சிம்மாசனம் இட்ட நடிகர்களில் ராபின் வில்லியம்ஸ் மிக முக்கியமானவர்.

வாழ்நாள் சாதனை நாயகன் ராபின் வில்லியம்ஸ்! RW1

ராபின் வில்லியம்ஸ் அமெரிக்காவின் சிக்காகோ மாகாணத்தில் 1951 ஆம் ஆண்டு ஜூலை 21ல் பிறந்தவர். வில்லியம்ஸ் தன்னுடைய பள்ளிப்பருவத்திலேயே நாடக கிளப்பில் சேர்ந்து நடிக்க ஆரம்பித்தார். பின்னர் நியூயார்க் நகரின் பிரபலமான அமெரிக்க அகாடமி ஆஃப் ஆர்ட்ஸ் என்ற ஜூலியட்ஸ் ஸ்கூலில் சேர்ந்து கலை, நாடகம் முதலியன கற்றுத் தேர்ந்தார். இவர் சிறு வயதிலேயே “ஸ்டேண்ட் அப்” காமெடியில் கலக்கியவர். வில்லியம்ஸ் இருக்கும் இடம் எப்போதுமே சிரிப்பின் கூடாரமாக இருக்கும் என்பதில் எந்த சந்தேகமும் இல்லை. பின்னர், 1970களில் டிவியில் நிகழ்ச்சித் தொகுப்பாளராகவும், நிகழ்ச்சியில் காமெடியனாகவும் ஆரம்பகாலங்களில் பிரவேசித்தார். முதல் டிவி ஷோ “ மார்க் அண்ட் மைண்டி” என்ற நிகழ்ச்சி அவரை அமெரிக்க மக்களின் மத்தியில் கொண்டு சென்றது. ரசிகர்களின் மனதை எளிதில் கவரும் வசியத்தை தன் பேச்சிலும், உடல் மொழியிலும் தரக்கூடியவர். பின்னர் தொடர்ந்து அடுத்தடுத்த பட வாய்ப்புகள் இவரின் பக்கம் நெருங்கியது.

வாழ்நாள் சாதனை நாயகன் ராபின் வில்லியம்ஸ்! RW3

தமிழ் ரசிகர்களுக்கு ராபின் வில்லியம்ஸை, நம் தொலைக்காட்சிகளே அறிமுகப்படுத்தியிருக்கும். காரணம், ஹாலிவுட் படங்கள், தொலைக்காட்சி ஒளிபரப்பப் போகிறது என்றால் இவரின் படங்களே அதிகமாக இருக்கும். வாண்டுகள் முதல் வயோதிகர் வரை அனைத்து ரசிகர்களுக்கும் பிடித்த நடிகர் இவர். 1980களில் வந்த 'பாப்பாய்', 1992ல் வெளிவந்த 'டைம் கீப்பர்', அதே ஆண்டுகளில் வந்த 'டாய்ஸ்', 1995 வெளிவந்த 'ஜுமாஞ்ஜி', 1997ல் வெளிவந்த 'ஃப்ளப்பர்', 2006ல் வெளிவந்த 'நைட் அட் தி மியூஸியம் 1&2' போன்ற படங்களின் நகைச்சுவையோடு சிறுவர்களின் உள்ளம் கவர்ந்த திரைப்படங்களாகத் திகழ்ந்தன. அதே தருணத்தில் ஒரு பைலைட்டாக, பேராசிரியராக, ஆராய்சியாளராக, குழந்தையாக, டைம் கீப்பராக மாறுபட்ட எந்த கதாபாத்திரம் என்றாலும் நடிப்பால் பிரமிக்க வைப்பார்.

விருதுகளின் கதாநாயகன்!

ராபின் வில்லியம்ஸ் பெறாத விருதுகளும் கிடையாது. விருதுகளின் உச்சமாக நினைக்கும் அகாடமி விருது என்று பெருமையாகப் பேசப்படும், நடிகர்கள் பெறத்துடிக்கும் ஆஸ்கார் விருதினையும், 1997-ல் வெளிவந்த “குட் வில் ஹண்ட்டிங்” என்ற திரைப்படத்திற்கான சிறந்த நடிகராக விருதைத் தட்டினார். அந்த திரைப்படத்தில் மனக் கோளாறுகளுக்குச் சிகிச்சை அளிக்கும் நிபுணராக சிறப்பான நடிப்பை வெளிப்படுத்தி பார்ப்பவரை மிரட்டியிருப்பார்.

வாழ்நாள் சாதனை நாயகன் ராபின் வில்லியம்ஸ்! Copy

உலக நாயகன் கமல் ஹாசன் நடிப்பில் 1996ல் கே.எஸ்.ரவிகுமார் இயக்கத்தில் வெளிவந்த 'அவ்வை சண்முகி' திரைப்படம் நகைச்சுவையில் மக்களின் மனதில் நிறைந்த திரைப்படம். இரண்டு தமிழ்நாடு மாநில விருதுகளை வென்ற வெற்றித் திரைப்படம். இந்த திரைப்படம் ஒரு அமெரிக்க திரைப்படத்தின் தழுவல் என்றால் நம்பித்தான் ஆகவேண்டும். கொலம்பஸ் இயக்கத்தில் 1993ல் வெளிவந்த ராபின் வில்லியம்ஸ் நடித்த Mrs.டவுட்ஃபையர் என்ற ஹாலிவுட் திரைப்படத்தின் தாக்கத்திலேயே தமிழில் 'அவ்வை சண்முகி' திரைப்படம் எடுக்கப்பட்டது. Mrs.டவுட்ஃபையர் என்ற திரைப்படம் ஹாலிவுட்டின் சிறந்த நகைச்சுவை திரைப்படமாகவே போற்றப்பட்டது. தமிழ் கலாச்சாரத்திற்கு ஏற்ப கிரேஸி மோகனின் வசனத்தில் சிறந்த நகைச்சுவைப் படமாகவே கொண்டாடப்பட்டது.

வாழ்நாள் சாதனை நாயகன் ராபின் வில்லியம்ஸ்! RB2

1987ல் வெளிவந்த ' குட்மார்னிங் வியட்நாம் ', 1991ல் வெளிவந்த 'தி ஃபிஷர் கிங்', 1996ல் வெளிவந்த 'தி பேர்ட் கேஜ்', 1997ல் வெளிவந்த 'குட் வில் ஹண்ட்டிங்' போன்ற திரைப்படங்கள் வசூல் மற்றும் விருதுளைக் குவித்தன. எந்த ஆர்ப்பாட்டமும் இல்லாத நடிப்பு , நடித்த படங்களிலும் சிரிப்பைத் தூண்டும் வசனம் என்று ரசிகர்களின் சிறந்த கதாநாயகனாகவே வாழ்ந்து வந்தவர் ராபின். அவரின் மரணம் அவரின் உண்மையான ரசிகர்களுக்குப் பேரிடி. மன அழுத்தத்தினால் தற்கொலை செய்திருக்கலாம் என்று போலீஸார் விசாரணை நடத்தி வருகின்றனர். ஆயினும் ரசிகர்களை சிரிப்பில் உறைய வைக்கும் ஒவ்வொரு நடிகனுக்கும் தனிப்பட்ட வகையில் மகிழ்ச்சியுடன் இருப்பது கடினம் எனபதற்கு இவரும் ஒரு சாட்சி.

வாழ்நாள் சாதனை நாயகன் ராபின் வில்லியம்ஸ்! RW4

2014களில் இவர் நடித்து, முடியும் நிலையில் இன்னும் நான்கு படங்கள் வர இருக்கின்றன. தான் மறைந்தாலும் தன் நடிப்பில் இன்னும் சில படங்கள் நமக்காக தந்துவிட்டுச் சென்றிருக்கும் ராபின் வில்லியம்ஸ் வாழ்நாள் சாதனை நாயகன் என்பது நிதர்சனமான உண்மை!

[thanks]விகடன்[/thanks]

by ஈகரையன் Wed Aug 13, 2014 7:26 pm

ஆண்களின் கண்ணீருக்கு கண்ணியம் தேடி தந்தவர் ராபின் வில்லியம்ஸ் – கமல்ஹாசன் பேட்டி!…

வாழ்நாள் சாதனை நாயகன் ராபின் வில்லியம்ஸ்! Rsz_kamal-robinwilliams

சென்னை:-பிரபல ஹாலிவுட் நடிகர் ராபின் வில்லியம்ஸின் மறைவுக்கு நடிகர் கமல்ஹாசன் தனது இரங்கலை தெரிவித்துள்ளார். இதுகுறித்து அவர் வெளியிட்டுள்ள செய்தியில் கூறியிருப்பதாவது, பொதுவாக நகைச்சுவை நடிகர்கள் தான் இந்த சமூகத்தின் மிக சிறந்த விமர்சகர்கள், தங்களது கோபத்தை கூட நகைச்சுவையாக வெளிப்படுத்த கூடியவர்கள். கோபத்தை தொடர்ந்து அடக்குவதால் தான் மன அழுத்தத்திற்கு ஆளாகிறார்கள். மிக எளிதில் அழுது விடும் இயல்பு கொண்டவர் ராபின் வில்லியம்ஸ். இதை அவரது படங்களில் காணலாம்.
அமெரிக்கர்களுக்கு அழுது நடித்தாலே பிடிக்காது, அந்தநிலையை மாற்றியது வியட்நாம் போர். ராம்போ தான் திரையில் அழுதுகாட்டியவர், அதன்பிறகு அப்படியொரு தன்மை கொண்ட நடிகராக இருந்தது ராபின் தான். ஆண்களின் கண்ணீருக்கு கண்ணியம் தேடி தந்தவர் ராபின். ராபின் வில்லியம்ஸின் திறமைக்காக அவரை பாராட்டுகிறேன், ஆனால் அவர் தற்கொலை செய்து கொண்டதாக கூறப்படுகிறது, அது உண்மையானால் அவரை வெறுக்கிறேன், அவரைப்போன்று ஒருவரிடம் இப்படியொரு முடிவை நான் எதிர்பார்க்கவில்லை, இது எனது சக இந்திய நடிகர் குருதத்துக்கும் பொருந்தும் என்று தனது இரங்கல் செய்தியில் கமல் கூறியுள்ளார்.

-நன்றி இனிய தமிழ்