வரதட்சணை கொடுமை குறித்து பொய் தகவல் தந்தால் ஜெயில்: சீர்வரிசையை மறைத்தாலும் தண்டனை

by **சிவா** Sun Jul 27, 2014 11:35 pm

புதுடெல்லி: வரதட்சணை கொடுமை குறித்து பொய்யான தகவல் தந்தால் பெண்களுக்கு தண்டனை அல்லது அபராதம் விதிக்கும் வகையில் வரதட்சணை தடுப்பு சட்டத்தில் திருத்தம் செய்ய மத்திய அரசு திட்டமிட்டுள்ளது. அதேபோல், திருமணத்தின்போது இரு தரப்பிலும் அளிக்கப்படும் சீர்வரிசைகளின் பட்டியலை சமர்ப்பிப்பதை கட்டாயமாக்கவும் அரசு திட்டமிட்டுள்ளது. வரதட்சணை தடுப்பு சட்டத்தை தவறாக பயன்படுத்துவதை தடுக்க இந்த நடவடிக்கைகளை அரசு மேற்கொள்ள உள்ளது. இந்த சட்டத் திருத்தங்களுடன் கூடிய மசோதாவை விரைவில் தாக்கல் செய்ய அரசு திட்டமிட்டுள்ளது என்று மத்திய பெண்கள் மற்றும் குழந்தைகள் மேம்பாட்டு அமைச்சக அதிகாரிகள் தெரிவித்தனர். “கணவர், அவருடைய குடும்பத்தினர் மீதான கோபத்தில், வரதட்சணை தடுப்பு சட்டத்தை பெண்கள் தவறாக பயன்படுத்துகின்றனர். அதனால் இந்த சட்டத்தின் கீழான புகாரின் மீது உடனடியாக கைது செய்யக் கூடாது” என்று உச்ச நீதிமன்றம் சமீபத்தில் உத்தரவிட்டது. கணவர் மற்றும் அவருடைய குடும்பத்தினர் வரதட்சணை கேட்டு கொடுமை படுத்துவதை தடுக்கவே இந்திய தண்டனை சட்டத்தின் 498-ஏ பிரிவு (வரதட்சணை கொடுமை) கொண்டு வரப்பட்டது.

இப்பிரிவின் கீழ் கைது செய்யப்படுபவர்கள் ஜாமீனில் வெளிவர முடியாது. ஆனால், இச்சட்டப் பிரிவை தவறாக பயன்படுத்துவது அதிகரித்துள்ளது.குற்ற புள்ளி விவரங்களின்படி, 2012ம் ஆண்டில் 1,97,762 பேர் வரதட்சணை கொடுமை சட்டத்தின்கீழ் கைது செய்யப்பட்டனர். இவர்களில் நான்கில் ஒரு பகுதி பெண்கள். இந்த சட்டப்பிரிவின் கீழ் 93.6 சதவீத வழக்குகளில் குற்றச்சாட்டு பதிவு செய்யப்பட்டது. அதே நேரத்தில் 15 சதவீத வழக்குகளில் மட்டுமே தண்டனை வழங்கப்பட்டுள்ளது. இதுபோன்று வரதட்சணை சட்டத்தை தவறாக பயன்படுத்துவதை தடுக்க அதில் திருத்தம் செய்ய அரசு திட்டமிட்டுள்ளது. அதேபோல், வரதட்சணை என்பதற்கான விளக்கத்தில் தற்போது திருமணம் தொடர்பாக வழங்கப்படும் பொருட்கள்’ என்று உள்ளது. அதை ‘திருமணத்துக்கு முன்பு, திருமணத்தின்போது, திருமணத்துக்குப் பிறகு என்று திருத்தப்படும்.

திருமணத்தின்போது இரு தரப்பினரும் மற்றவருக்கு அளிக்கும் பரிசுப் பொருட்களின் பட்டியலை தாக்கல் செய்வது கட்டாயமாக்கப்படும். இதன் மூலம் எதிர்காலத்தில் வழக்கு தொடரப்பட்டால், பிரச்னையை தவிர்க்க முடியும். குடும்ப வன்முறை சட்டத்தின் சில பிரிவுகளையும் வரதட்சணை தடுப்பு சட்டத்தில் சேர்க்க திட்டமிடப்பட்டுள்ளது.

தினகரன்