செல்போனில் ஓட்டுப்போடும் காலம் வர வேண்டும் அப்துல் கலாம் கனவு

செல்போனில் ஓட்டுப்போடும் காலம் வரவேண்டும் என்ற தனது கனவை அப்துல் கலாம் வெளியிட்டுள்ளார்.

அப்துல் கலாம் புத்தகம்

முன்னாள் ஜனாதிபதி அப்துல் கலாம், ‘எ மேனிபெஸ்ட்டோ பார் சேஞ்ச்’ (மாற்றத்துக்கான அறிக்கை) என்ற பெயரில் ஒரு புத்தகம் எழுதி உள்ளார். இந்த புத்தகத்தை ஹார்பர் காலின்ஸ் இந்தியா நிறுவனம் வெளியிட்டுள்ளது. கடந்த 5 ஆண்டு காலமாக பாராளுமன்ற ஜனநாயகத்தை ஆராய்ச்சி செய்து, அப்துல் கலாம் இந்த புத்தகத்தை எழுதி உள்ளார்.

‘புதிய சுதந்திரமான லோக்பால் சட்டம் (தற்போதைய வடிவில் அல்ல) வர வேண்டும், அது, சுதந்திரமான ஊழல் கண்காணிப்பு ஆணையம், சுதந்திரமான சி.பி.ஐ., ஊழல் வழக்குகளை விசாரிக்க தனி கோர்ட்டுகள் அமைக்க வழி வகுக்க வேண்டும்’ என்ற தனது எதிர்பார்ப்பை இந்த புத்தகத்தில் அப்துல் கலாம் வெளிப்படுத்தி உள்ளார்.

தேர்தல் சீர்திருத்தங்கள்

இதே போன்று தேர்தல் சீர்திருத்தங்கள் தொடர்பான தனது எதிர்பார்ப்பையும் அவர் தெரிவித்து இருக்கிறார்.

இது தொடர்பாக அவர் எழுதி இருப்பதாவது:–

ஒரு வேட்பாளர் தனது வேட்புமனுவை நாட்டின் குறிப்பிட்ட தொகுதியில் இருந்து தாக்கல் செய்கிறார் என்றால், முதலில், அவர் இந்திய குடிமகன்தானா என்பதை ஆதார் அடையாள அட்டை, தேசிய மக்கள் தொகை பதிவேடு அடையாள அட்டை அல்லது பிற வகை அடையாள அட்டை மூலமாக தேர்தல் அதிகாரி சோதிக்க வேண்டும், இப்படியே வேட்பாளரின் குற்றப்பின்னணி பற்றி போலீஸ் ஆவணங்களிலிருந்தும், சொத்துகள் குறித்து நில அதிகாரிகளிடமிருந்தும், கல்வித்தகுதி பற்றி பல்கலைக்கழக பதிவேடுகளிலிருந்தும், வருமானம் குறித்து வருமான வரித்துறை ஆவணங்கள் மூலமும், கடன் நிலவரம் குறித்து வங்கி ஆவணங்களிடமிருந்தும் கம்ப்யூட்டரை தட்டி விட்டு பரிசீலிக்க வேண்டும். அதன்பின்னர் அவரைப் பற்றிய தகவல்கள் அனைத்தும் தேர்தல் அதிகாரியின் கம்ப்யூட்டர் திரையில் வர வேண்டும்.

செல்போனில் ஓட்டு

அதைத் தொடர்ந்து அவரது வேட்புமனு தகுதி குறித்து தேர்தல் அதிகாரி முடிவு செய்ய வேண்டும். அதைத் தொடர்ந்து தேர்தல் நடைமுறைகள் தொடங்கி விட வேண்டும்.

தேர்தலின்போது, வாக்காளர்கள் வாக்குச்சாவடிக்கு சென்று வாக்களிப்பது தவிர்த்து, செல்போன் வைத்திருக்கிற வாக்காளர்கள், அதன் மூலம் தங்களது தேசிய அடையாள அட்டையை பயன்படுத்தி, தங்களது தொகுதியில், விரும்புகிற வாக்காளர்களுக்கு வாக்களிக்க வேண்டும்.

இவ்வாறு அதில் அவர் கூறி உள்ளார்.

[thanks]தினத்தந்தி[/thanks]

இன்றைய காலத்தில் வாக்களிக்காமல் இருப்பது படித்தவர்களும், பணியில் உள்ளோரும், வெளிநாட்டில் மற்றும் வெளிமாநிலங்களில் வசிப்போரும் தான்! செல்போனில் வாக்களிக்கும் காலம் வந்தால் வாக்கு விழுக்காடு கூடும் வாய்ப்புகள் உண்டு. ஒருவகையில் இது தலைகீழ் மாற்றங்களை கொண்டு வரும் (வோட்டு வங்கிகளை நம்பி, ஏழை எளியோரை வசப்படுத்தி வெற்றி நமதே என எண்ணும் வேட்பாளர்கள் வயிற்றில் புளி கரையும்!). கட்சிகளை விடுத்து நல்ல நபர் தேர்ந்தெடுக்கப்படலாம்.

நல்ல யோசனை ! மாறுமா காலம் ?

செல்போனில் வாக்குப் பதிவு நல்ல யோசனை. ஆனால் அரசியலில் இப்போது இருப்பவர்களை நினைத்துப் பாருங்கள். நில அபகரிப்பு, குற்றப் பிண்ணனி உடையவர்கள். குண்டர்களை வைத்து தங்கள் எதிரில் செல்போனில் வாக்குப் பதிவு செய்யவேண்டும் என மிரட்டி வெற்றிபெற்றுவிடுவார்கள். இல்லாவிடில் எல்லோருடைய செல்போனையும் பிடுங்கிக் கொண்டுபோய் தங்கள் கட்சிக்கு வாக்களித்துவிட்டுத் திருப்பித்தருவார்கள். இதனைத் தவிர்க்க வழிவகுக்க வேண்டும்.

தலைவரின் கனவு சரியாக இருக்குமா என்று காலம் பதில் சொல்லும்.

மிக சிறந்த யோசனை , அப்துல் கலாம் ஐயா சொல்வது போல்

தேசிய அடையாள அட்டை மூலம் வாக்களிக்கும் நிலை வந்துவிட்டால் பணம் கொடுத்து அப்பாவி மக்களை விலைக்கு வாங்கி ஜெயித்துகொண்டிருக்கும் அரசியல் வியாதிகளுக்கு சாவுமணி அடிக்கபட்டுவிடும்