ஏழு வயது சிறுமியை கற்பழித்து கொன்ற நபருக்கு மரண தண்டனை

by **சிவா** Tue Jun 17, 2014 12:36 am

பாரபங்கி: உத்தர பிரதேச மாநிலத்தில், ஏழு வயது சிறுமியை பாலியல் பலாத்காரம் செய்ததோடு, அவளை செங்கல்லால் அடித்துக் கொன்ற நபருக்கு, நேற்று மரண தண்டனை விதிக்கப்பட்டது.

உத்தர பிரதேச மாநிலம், பாரபங்கி நகரில், 2012 ஜூன் 18ம் தேதி, ஏழு வயது சிறுமியை, அவரது அண்டை வீட்டுக்காரர் கடத்திச் சென்று பாலியல் பலாத்காரம் செய்ததோடு, செங்கல்லால் அடித்து, அச்சிறுமியை கொன்றார். இது தொடர்பாக, சிறுமியின் தந்தை அளித்த புகாரில், வழக்குப் பதிவு செய்த போலீசார், பானு யாதவ் என்ற நபரை கைது செய்தனர்.

இந்த வழக்கு, பாரபங்கி நகரில் உள்ள நீதிமன்றத்தில் நடந்து வந்தது. வழக்கை விசாரித்த சிறப்பு நீதிபதி சாந்தி பிரகாஷ் அரவிந்த், ''மனிதாபிமானம் அற்ற வகையில், கொடூர செயல் புரிந்த பானு யாதவுக்கு மரண தண்டனையும், 15 ஆயிரம் ரூபாய் அபராதமும் விதிக்கப்படுகிறது,'' என, உத்தரவிட்டார்.