ஐ.என்.எஸ். விக்ரமாதித்யா போர்க்கப்பலை கடற்படைக்காக அர்ப்பணித்தார் மோடி

ஐ.என்.எஸ். விக்ரமாதித்யா போர்க்கப்பலை நாட்டுக்கு அர்ப்பணித்து வைக்கும் விழா கோவாவில் நடைபெற்றது. விழாவில் கலந்து கொள்ள பிரதமர் நரேந்திர மோடி அரசு பயணமாக கோவா வந்தார். பின்னர் ஹெலிகாப்டர் மூலமாக நாட்டின் மிகப்பெரிய போர்க்கப்பலான ஐஎன்எஸ் விக்ரமாதித்யாவில் வந்திறங்கினார். விக்ரமாதித்யா கப்பலுக்கு வந்த நரேந்திர மோடிக்கு கப்பல் அதிகாரிகள் உற்சாக வரவேற்பு அளித்தனர். கடற்படை வீரர்கள் அளித்த சிறப்பு மரியாதையை ஏற்றுக் கொண்டார்.

பின்னார் கப்பலில் நடைபெற்ற ஐ.என்.எஸ். விக்ரமாதித்யா போர்க்கப்பலை கடற்படைக்கு முறைப்படி அர்ப்பணிக்கும் விழாவிலும் கலந்து கொண்டார். கப்பல் தற்போது அரபிக் கடலில் நிலைகொண்டுள்ளது. ஐ.என்.எஸ். விராட்டுக்கு அடுத்தபடியாக இந்தியாவின் இரண்டாவது பெரிய விமானம் தாங்கிக் கப்பல் ஐ.என்.எஸ். விக்ரமாதித்யா ஆகும்.

ரஷிய நாட்டு கடற்படையில் ‘அட்மிரல் கோர்ஸ்கோவ்’ என்ற விமானந்தாங்கி போர்க்கப்பல் செயல்பட்டு வந்தது. இந்த கப்பலை வாங்குவதற்கு ரஷியாவுடன், கடந்த 2004–ம் ஆண்டு இந்தியா ஒப்பந்தம் செய்து கொண்டது. பல்வேறு மறுசீரமைப்பு பணிகள், அனைத்து கட்ட சோதனைகள், கடல் பயிற்சி நடவடிக்கைகள் அனைத்தும் முடிவடைந்த பின்னர், கடந்த ஆண்டு நவம்பர் மாதத்தில் இந்த போர்க்கப்பல் இந்தியாவிடம் ஒப்படைக்கப்பட்டது. ரஷியாவிடம் இருந்து இதை பெற்றுக்கொண்ட அப்போதைய பாதுகாப்பு மந்திரி ஏ.கே.அந்தோணி, முறைப்படி இந்திய கடற்படையில் சேர்த்தார்.

ரூ.15 ஆயிரம் கோடிக்கு அதிகமான விலையில் வாங்கப்பட்ட இந்த கப்பல், சுமார் 44 ஆயிரத்து 500 டன் எடை கொண்டதாகும். இந்த கப்பலுக்கு ‘ஐ.என்.எஸ். விக்ரமாதித்யா’ என்று இந்தியா பெயரிட்டுள்ளது. ஐ.என்.எஸ். விக்ரமாதித்யா போர்க்கப்பல் நாட்டுக்கு அர்ப்பணித்து வைக்கப்பட்டது. பிரதமர் நரேந்திர மோடி கலந்து கொண்டு, கப்பலை நாட்டுக்கு அர்ப்பணித்து வைத்தார். மோடி அங்கிருந்த விமானங்களை பார்வையிட்டார். கோவாவில் மழை பெய்ததால் அங்கு வீரர்களின் ஹெலிகாப்டர்கள் சாகச நிகழ்ச்சி நடத்துவதில் காலதாமதம் ஏறபட்டுள்ளது.