பொங்கல் பொங்கி வழியட்டும்

by சதாசிவம் Fri Jan 10, 2014 11:20 am

மார்கழிக் கோலம் மறந்தாச்சு
மாதங்கள் அனைத்தும் ஒன்றாச்சு
தையின் சிறப்பு தெரியாமல்
தரணியில் பலரும் புரியாமல்

முகந்தெரியா மனிதருடன்
மூன்று மணிநேரம் கதைக்கின்றோம்
லைக்கும் ஷேரும் செய்து செய்து
லைப் பூரா தொலைக்கின்றோம்

கண்ணில் தெரியும் மனிதருடன்
கதைபேசிய காலம் கழிஞ்சாச்சு
விண்ணில் இருக்கும் ஒருவருக்கும்
விடையளிக்க நேரம் வந்தாச்சு

முகநக நட்பது நட்பன்று
முகநூல் நட்பே உயர்வின்று
கணவனும் மனைவியும் கைகோர்க்க
கைபேசி அப்ஸ் தான் உதவுதாம்

ஆலம் நிழலில் பேசியது போய்
ஆன்டிராய்ட் சுழலில் அகப்பட்டு
அருகருகே அமர்ந்திருந்தும்
ஆளுக்கொரு பக்கம் உலவுகிறோம்

தேனில் நனைத்து நட்டாலும்
வேம்பு என்றும் இனித்திடுமா
நிழலுக்கு வெள்ளை அடித்தாலும்
நிஜமாய் அதுவும் சிரித்திடுமா

அகிலத்தை ஆன்டிராய்ட் ஆண்டாலும்
அரிசியைப் படைப்பவனே ஆண்டவன்
அவனே உலகை ஈன்றவன்
அவனை மறந்தவன் மாண்டவனே

உழவனைப் போற்ற ஒன்றுண்டு
உளமார சொல்லு பொங்கலென்று
பொங்கல் பொங்கி வழியட்டும்
உங்கள் இல்லம் சிறக்கட்டும்

என்றும் நட்புடன்
க.சதாசிவம்

by **பார்த்திபன்** Fri Jan 10, 2014 3:02 pm

சதாசிவம் wrote:
முகநக நட்பது நட்பன்று
முகநூல் நட்பே உயர்வின்று

தேனில் நனைத்து நட்டாலும்
வேம்பு என்றும் இனித்திடுமா
நிழலுக்கு வெள்ளை அடித்தாலும்
நிஜமாய் அதுவும் சிரித்திடுமா

அகிலத்தை ஆன்டிராய்ட் ஆண்டாலும்
அரிசியைப் படைப்பவனே ஆண்டவன்