தர்மபுரி அருகே மாணவியை திருமணம் செய்த அரசு பள்ளி ஆசிரியர் கைது......

தர்மபுரி மாவட்டம் பென்னாகரம் ஒன்றியம் சின்னம் பள்ளி அரசு மேல் நிலைப்பள்ளியில் அறிவியல் ஆசிரியராக பணிபுரிந்து வந்தவர் ஆறுமுகம் (வயது 37). இவருக்கு மனைவியும், 2 குழந்தைகளும் உள்ளன. இவருடைய மனைவி வேறு ஒரு பள்ளியில் தலைமை ஆசிரியையாக பணிபுரிந்து வருகிறார். இவர்களிடையே கருத்து வேறுபாடு ஏற்பட்டதாக கூறப்படுகிறது.

இந்த நிலையில் ஆறுமுகம் தான் வேலை செய்யும் பள்ளியில் 10–ம் வகுப்பு படித்து வந்த 15 வயது மாணவி ஒருவரை மோதிரம் மாற்றி திருமணம் செய்து கொண்டதாக கடந்த ஒரு மாதத்திற்கு முன்பு புகார் எழுந்தது. இதுதொடர்பாக மாவட்ட முதன்மை கல்வி அதிகாரி மகேஸ்வரிக்கு புகார்கள் வந்தன.

இதுகுறித்து விசாரணை நடத்துமாறு பள்ளி தலைமை ஆசிரியர் பழனிச்சாமிக்கு கல்வித்துறை உத்தரவிட்டது.

அதன்பேரில் பள்ளி தலைமை ஆசிரியர் பழனிச்சாமி மாணவியின் வீட்டுக்கு சென்று விசாரணை நடத்தி அதன் அறிக்கையை கல்வித்துறை அதிகாரிகளுக்கு அனுப்பி வைத்தார். இதைத்தொடர்ந்து ஆசிரியர் ஆறுமுகம் சின்னம்பள்ளி அரசு பள்ளியில் இருந்து அரூர் அருகே புதுப்பட்டியில் உள்ள மற்றொரு பள்ளிக்கு இடமாற்றம் செய்து மாவட்ட முதன்மை கல்வி அதிகாரி மகேஸ்வரி உத்தரவிட்டார்.

இந்த நிலையில் ஆசிரியர் ஆறுமுகம் இளவயது திருமணம் செய்து கொண்ட விவகாரம் தொடர்பாக கிடைத்த தகவலின் அடிப்படையில் விசாரணை நடத்துமாறு மாவட்ட போலீஸ் சூப்பிரண்டு அஸ்ராக் போலீசாருக்கு உத்தரவிட்டார். இதனையடுத்து உளவுத்துறை போலீசார் ஆசிரியர் ஆறுமுகத்தின் நடவடிக்கைகளை கண்காணித்தனர்.

இதில் மாணவியின் தந்தை இறந்துவிட்டதை அறிந்த ஆசிரியர் ஆறுமுகம், மாணவியின் குடும்பத்தாரிடம் ஆசை வார்த்தைகள் கூறி மூளை சலவை செய்து அந்த மாணவியை கடந்த நவம்பர் மாதம் 15–ந் தேதி 2–வது திருமணம் செய்திருப்பது தெரியவந்தது. திருமணம் நடப்பதற்கு ஒரு வாரத்திற்கு முன்பே அந்த மாணவி பள்ளிக்கு செல்வதை நிறுத்தி உள்ளார். அதன்பின்னர் கடந்த நவம்பர் மாதம் 29–ந்தேதி மாணவியின் மாற்றுச் சான்றிதழை பள்ளியில் இருந்து வாங்கி சென்றுள்ளனர்.

இதனையடுத்து பள்ளி மாணவியை சட்ட விரோதமாக இளவயது திருமணம் செய்தது தொடர்பாக ஆசிரியர் ஆறுமுகத்தின் மீது பெரும்பாலை போலீசார் வழக்கு பதிவு செய்து விசாரணை நடத்தினார்கள். இதனைத் தொடர்ந்து அவரை நேற்று போலீசார் கைது செய்து விசாரணை நடத்தி வருகிறார்கள்.

மாலைமலர்

ஆசிரியர் செய்ய வேண்டிய காரியமா ? இது என்ன கொடுமை