சிரிக்கும் பூக்கள் - குழந்தைக் கவிஞர் அழ.வள்ளியப்பா

by **சிவா** Thu Dec 19, 2013 5:01 pm

பால முருகன்

சின்னச்சின்னக் குழந்தையம்மா
எங்கள் பாலமுருகன்-புன்
சிரிப்புக்காட்டி மயக்கிடுவான்
எங்கள் பாலமுருகன்

வண்ணமயில் மீதிருப்பான்
எங்கள் பாலமுருகன்-கையில்
வடிவேலும் வைத்திருப்பான்
எங்கள் பாலமுருகன்

பிள்ளையாரின் நல்லதம்பி
எங்கள் பாலமுருகன்-சிறு
பிள்ளைகளின் இனியதோழன்
எங்கள் பாலமுருகன்

கள்ளமில்லா உள்ளங்கொண்டால்
எங்கள் பாலமுருகன்-நம்மைக்
காத்தருள்வான், காத்தருள்வான்
எங்கள் பாலமுருகன்

by **சிவா** Thu Dec 19, 2013 5:02 pm

ஒன்று சேர்தல்

கூட்டம் கூட்ட மாகவே
குருவி பறந்து சென்றிடும்.

குவியல் குவிய லாகவே
கொட்டிக் கற்கள் கிடந்திடும்.

கூறு கூறாய்ச் சந்தையில்
கொய்யாப் பழங்கள் விற்றிடும்.

குலைகு லையாய்த் திராட்சைகள்
கொடியில் அழகாய்த் தொங்கிடும்.

வரிசை வரிசை யாகவே
வாழை தோப்பில் நின்றிடும்.

மந்தை மந்தை யாகவே
மாடு கூடி மேய்ந்திடும்.

சாரை சாரை யாகவே
தரையில் எறும்பு ஊர்ந்திடும்.

நேரில் தினமும் பார்க்கிறோம்
நீயும் நானும் தம்பியே!

by **சிவா** Thu Dec 19, 2013 5:02 pm

பார் பார் !

தரையின் மேலே
தொட்டி பார்

தொட்டி மேலே
செடியைப் பார்

செடியின் மேலே
பூவைப் பார்

பூவின் மேலே
வண்டைப் பார்

வண்டின் மேலே
பளபளக்கும்

வர்ணம் உண்டு;
அதையும் பார் !

by **சிவா** Thu Dec 19, 2013 5:03 pm

அருமை நேரு

அருமை நேரு பிறந்தது

அலகா பாத்து நகரிலே
இளைஞர் நேரு படித்தது

இங்கி லாந்து நாட்டிலே.
தீரர் நேரு வாழ்ந்தது

தில்லி நகரம் தன்னிலே.
இன்று நேரு வாழ்வது

எங்கள்
பிஞ்சு
நெஞ்சிலே !

by **சிவா** Thu Dec 19, 2013 5:14 pm

அ, ஆ

அ, ஆ என்றேனே.
அத்தை வீடு சென்றேனே.

இ, ஈ என்றேனே.
இட்டலி எட்டுத் தின்றேனே.

உ, ஊ என்றேனே.
உடனே காபி குடித்தேனே.

எ, ஏ என்றேனே.
ஏப்பம் நன்றாய் விட்டேனே.

ஐ என்று சொன்னேனே.
அங்கே நீட்டிப் படுத்தேனே.

ஒ, ஓ என்றேனே.
ஒருமணி சென்று எழுந்தேனே.

ஒள என்று சொன்னேனே.
ஆடிப் பாடிக் குதித்தேனே.

ஃ என்று சொன்னேனே.
அக்கக் காவெனச் சிரித்தேனே!

by **சிவா** Thu Dec 19, 2013 5:15 pm

பத்துப் பைசா பலூன்

பத்துப் பைசா விலையிலே
பலூன் ஒன்று வாங்கினேன்.
பலூன் ஒன்று வாங்கினேன்.
பையப் பைய ஊதினேன்.

பையப் பைய ஊதவே
பந்து போல ஆனது.
பந்து போல ஆனபின்
பலமாய் நானும் ஊதினேன்.

பலமாய் ஊத ஊதவே
பானை போல ஆனது.
பானை போல ஆனதைக்
காண ஓடி வாருங்கள் !

விரைவில் வந்தால்
பார்க்கலாம்.
அல்லது,

வெடிக்கும் சத்தம்
கேட்கலாம் !

by **சிவா** Thu Dec 19, 2013 5:15 pm

எங்கே செல்லலாம்?

சைக்கிள் ஏறிக் கொள்ளலாம்;
சைதாப் பேட்டை செல்லலாம்.

காரில் ஏறிக் கொள்ளலாம்;
காரைக் குடிக்குப் போகலாம்.

ரயிலில் ஏறிக் கொள்ளலாம்;
ராமேஸ் வரம் செல்லலாம்.

கப்பல் ஏறிக் கொள்ளலாம்;
கல்கத் தாவை அடையலாம்.

பறவைக் கப்பல் ஏறலாம்;
பாரிஸ் நகரம் போகலாம்.

மனோ ரதத்தில் ஏறலாம்;
வைய மெல்லாம் சுற்றலாம்!

by **M.M.SENTHIL** Thu Dec 19, 2013 5:17 pm

குழந்தை கவிஞர் என்று அவரை அழைப்பதில் தவறில்லை. அனைத்தும் மிக அருமை.

by **சிவா** Thu Dec 19, 2013 5:23 pm

வாழைப் பழம்

வாழைப் பழத்தில் பல உண்டு
வகைவகை யான பெயர் உண்டு.

பூவன், மொந்தன், ரஸ்தாளி,
பேயன், நேந்திரம், மலைவாழை

என்றே வகைகள் பலஉண்டாம்.
எல்லாம் எனக்குப் பிடித்தவையே.

தினமும் மிகவும் நான்விரும்பித்
தின்பது வாழைப் பழமேதான்!

by **சிவா** Thu Dec 19, 2013 5:24 pm

என்ன கொண்டு வந்தேன் ?

பழநி மலைக்குச் சென்று வந்தேன்;
பஞ்சா மிர்தம் கொண்டு வந்தேன்.

காசி நகரம் சென்று வந்தேன்;
கங்கை நீரைக் கொண்டு வந்தேன்.

திருப்ப திக்குச் சென்று வந்தேன்;
தித்திப்பு லட்டுக் கொண்டு வந்தேன்.

இராமேஸ் வரம் சென்று வந்தேன்;
என்ன நானும் கொண்டு வந்தேன் ?

ஊ...ஊ...ஊ
ஊ...ஊ...ஊ...
ஊது கின்ற சங்கில்
ஒன்று வாங்கி வந்தேன்!