கூந்தல் பராமரிப்பு

உடல் ஆரோக்கியமாக இருந்தால் தான் தலைமுடியும் ஆரோக்கியமாக இருக்கும். நாம் ருசிக்காக உண்ணும் உணவுகளில் போதிய அளவு ஊட்டச்சத்துகள் இல்லாததால் ஆரோக்கியம் குறைவதோடு முடி தொடர்பான பிரச்சினைகளும் தலை தூக்குகின்றன.

அதிகமாக முடி கொட்டுபவர்கள் டாக்டரிடம் சென்று சிகிச்சை பெறுவது நல்லது. ஏனெனில் நமது உடலில் சுரந்து கொண்டிருக்கும் ஹார்மோன்கள் சில சமயங்களில் சுரக்காது நின்று போனாலும் முடி கொட்டும் என்கிறார்கள்.

புரதம் நிறைந்த பருப்பு, கீரை வகைகள், கேரட், பீட்ரூட், கறிவேப்பிலை, இரும்புச்சத்து, நிறைந்த பனை வெல்லம், கேழ்வரகு, பால், எலும்பு சூப் போன்ற சமச்சீரான உணவுகளை சாப்பிட்டு வந்தாலே ஹார்மோன் சுரப்பிகளை சரி செய்ய முடியும் எனவும் அவர்கள் கூறுகிறார்கள்.

குளிப்பதற்கு முன் கூந்தலில் உள்ள சிக்குகளை அகற்ற வேண்டும். தலைமுடிக்கு ஏற்ற ஷாம்பூவையே பயன்படுத்த வேண்டும். அதிக அளவு ஷாம்பூ பயன்படுத்துவதை தவிர்க்கவும். அதிகம் நுரை வந்தால் தான் முடி சுத்தமாகும் என்று நினைக்க வேண்டாம்.

தலைக்கு குளிக்கும் ஒவ்வொரு முறையும் கண்டிஷனர் உபயோகிப்பது அவசியமான ஒன்று. கண்டிஷனரை முடியின் வேர்ப்பகுதியை விட நுனிப்பாகத்தில் தடவுவது நல்லது. கண்டிஷனர் தடவிய பிறகு முடியை நன்றாக அலச வேண்டும்.

தலையை ஷாம்பூ போட்டுக் கழுவிய பிறகு ஒரு டீஸ்பூன் வினிகரை ஒரு கப் நீரில் கலக்கி தலைமுடியை கழுவினால் தலைமுடி மிருதுவாகவும், பட்டு போன்று பளபளப்பாகவும் இருக்கும்.

மருதாணியை தலையில் தேய்த்து ஊற வைத்த பின் ஷாம்பூ போடுவது தவறு. மருதாணி மிகச்சிறந்த கண்டிஷனர். எனவே மருதாணிக்குப் பிறகு ஷாம்பூ பயன்படுத்துவது நல்லதல்ல. ஆகவே முதல்நாளே ஷாம்பூ போட்டுக் குளித்து முடியை நன்கு காய வைத்துக் கொள்ளவும். அடுத்த நாள் மருதாணி தேய்த்து ஊறவைத்து வெறுமனே அலசி விடவும்.

குளித்த பிறகு ஈரத்துடன் முடியை சீவ வேண்டாம். ஈரமான கூந்தலை வேகமாக துவட்டுவதை தவிருங்கள். அதற்கு பதிலாக உங்கள் கூந்தலை 5 நிமிடம் டவலில் சுற்றி வையுங்கள். ஹேர்டிரையரை முடியின் நுனி பாகத்தை விட, வேர் பாகத்தில் நன்றாக காட்டுங்கள். நுனிகளில் காட்டுவதால் முடி உலர்ந்து உடையக் கூடும். ஹேர்டிரையரை அடிக்கடி பயன்படுத்தக் கூடாது. ஒரே இடத்தில் அதிக நேரம் காட்டக் கூடாது. உலர்ந்த கூந்தல் கொண்டவர்கள் அடிக்கடி தலைக்கு குளிக்க வேண்டாம்.

தினம் ஒரு தகவல்

பகிர்வுக்கு நன்றி