தோழியே!

by **பார்த்திபன்** Mon Nov 18, 2013 4:38 pm

தோழியே!

சுகமாய் சுவாசிக்கிறேனடி
நுரையீரல் நிறைத்து நிற்கும்
நுட்பமான நாம் நட்பினால்!

நெஞ்சு நிறைய நேசிக்கிறேனடி
பஞ்சும் தீயுமாய் நாமிருந்தும்
பற்ற விடாது நமைத் தடுத்த
நாகரீக நட்பதனை!

புனிதப் பொருட்களாய் பூசிக்கிறேனடி
அவ்வப்போது நீயளித்த
அழகான அன்பளிப்புகளை!

கண்மூடி யோசிக்கிறேனடி
நட்பென்னும் நதியிறங்கி
நாம் நீராடிய நிமிடங்களை!

வரலாற்று நூலாய் வாசிக்கிறேனடி
நம் நட்பு நிகழ்வுகளைத்
நயம்படத் தாங்கி நிற்கும்
நானெழுதிய நாட்குறிப்புகளை!

நட்பின் சிறப்பு

தூண்கள் தூர்ந்துபோகாதவரை
கட்டிடங்கள் கவலைப்படுவதில்லை!

நண்பர்கள் நம்மோடிருக்கும்வரை
நம் நம்பிக்கைகள் நசிந்துபோவதில்லை!

உப்பில்லா வீட்டில்
உணவுகள் ருசிப்பதில்லை!

நட்பில்லா வாழ்வில்
நம்பிக்கைகள் துளிர்ப்பதில்லை!

நரை,மூப்பு,பிணி என்று
நட்பிற்கு ஏதுமில்லை!

நான்கு புறம் புயல் வரினும்
நட்பு மரம் சாய்வதில்லை!

-நிலவை.பார்த்திபன்