பார்க்க பளிச்சென்று இருக்க...

by **krishnaamma** Fri Sep 27, 2013 12:33 pm

பொதுவாகவே பெண்கள், தங்களை அழகாக வைத்துக் கொள்ள வேண்டும் என்று விரும்புவார்கள். அதற்காக பலரும் பல விஷயங்களை செய்வார்கள். ஆனால், தங்களை மிக அழகாக வைத்துக் கொள்ள அனைவராலும் முடியாமல் போகிறது.

அதனால் கவலை வேண்டாம்...

அழகாக வைத்துக் கொள்ள வேண்டும் என்பது எப்போதுமே அவசியமில்லாத ஒன்று. அதுவும் பெண்களுக்கு அழகு பல நேரங்களில் ஆபத்தைத்தான் கொடுக்கும்.

சரி அப்போ தூங்கு மூஞ்சியாகவே இருந்து விடலாமா என்று கேட்டால் அதுவும் கூடாது. நம்மை ஒருவர் எடை போடுவது முதலில் நமது தோற்றத்தை வைத்துத்தான். எனவே எப்போதும் நாம் பளிச்சென்று இருக்க வேண்டும்.

வேலைக்கோ, கல்லூரிக்கோ செல்லும் போது நம்மை நாமே நேர்த்தியாக வைத்துக் கொள்ள வேண்டியது அவசியமாகிறது. பொதுவாக பலரும் அவர்களுக்கு ஏற்ற ஆடைகளையும், அவர்களுக்கு ஏற்ற அலங்காரத்தையும் செய்து கொள்ளாததே அவர்களை அசிங்கமாகக் காட்டுவதற்குக் காரணமாக அமைந்து விடுகிறது.

எனவே, எப்போதும் ஆடைகளை நன்கு அயர்ன் செய்து அணிவதை வழக்கமாகக் கொள்ளுங்கள். இது பள்ளியில் இருந்தே உங்களுக்கு பழக்கத்தில் வர வேண்டிய விஷயமாகும். உங்களுக்கு ஏற்ற நிறத்திலான ஆடைகளையும், உங்களது உடல் உருவத்துக்கு ஏற்ற ஆடைகளையும் சரியாக பார்த்து வாங்கி அதனை மட்டும் அணியுங்கள்.

தொளதொளவென்றோ, பார்க்க சகிக்காத நிறத்திலோ ஆடைகளை எடுத்து விட்டோமே என்று அணிந்து செல்லாதீர்கள். ஆடைகளை தேர்வு செய்யும் போது உங்களது தோழர்களையோ அல்லது தோழிகளையோ உடன் வைத்துக் கொண்டால் உங்களுக்கு நன்றாக தோற்றமளிக்கும் ஆடைகளை தேர்வு செய்ய உதவும்.

அழுக்கில்லாத அயர்ன் செய்த உங்களது உருவத்துக்கும் நிறத்துக்கும் ஏற்ற ஆடைகளை அணிவதே உங்களை பளிச்சென்று ஆக்குவதற்கான முதல் வழியாகும்.

அடுத்தது உங்களது ஹேர் ஸ்டைல். உங்களுக்கு எளிதாகவும், அதே சமயம் உங்களுக்கு ஏற்ற வகையிலும் இருக்கும் வகையில் உங்களது தலை முடியை வெட்டி விடுங்கள். என்ன தலை முடியை வெட்டுவதா என்று கேட்க வேண்டாம். வெட்டுவது என்றால் உங்கள் தலை முடியை நீங்கள் எப்படி வாரி விடுவீர்களோ அந்த வகையில் அதனை நளினமாகக் காண்பிக்கும் வகையில் வெட்டி விடுங்கள்.

வெகு நீளமாக இருக்கும் தலைமுடியாக இருந்தாலும் அதனை ஸ்டிரெய்ட் கட் செய்வதால், தலை வாரிய பிறகு நேர்த்தியாக இருக்கும். இதனால் தலை முடி கொட்டுவதும், சிக்காவதும் கூட தவிர்க்கப்படும்.

உங்களுக்கு ஏற்ற ஒரு ஹேர் ஸ்டைலை தேர்வு செய்து அதனை சரியாக வாரி விடுங்கள்.

இந்த இரண்டு விஷயங்களைச் செய்தாலே தோற்றத்தில் நல்ல மாற்றத்தைப் பார்க்கலாம்.

நன்றி : dinamani