வலி தரும் தழும்புகள்..!!

by **மதுமிதா** Mon Aug 19, 2013 9:25 pm

அறுவை சிகிச்சைக்குப் பிறகும், அடிபட்ட பிறகும் அந்தக் காயம் மறைந்தாலும், தழும்புகள் அத்தனை சீக்கிரத்தில் மறையாது. வெறும் தழும்பு என்றால் பிரச்னையில்லை. தழும்பில் வலி உண்டாவது, முடிச்சுகள் மாதிரி மாறுவது, அரிப்பு போன்ற மாற்றங்கள் இருந்தால், அதை அலட்சியப்படுத்தக் கூடாது என்கிறார் வலி நிர்வாக சிறப்பு மருத்துவர் குமார். வலி தரும் தழும்புகளுக்கான சிகிச்சைகள் பற்றி விளக்கமாகப் பேசுகிறார் அவர்.

‘‘சாதாரண காயமோ, அறுவை சிகிச்சை செய்த காயமோ ஆறிவிட்டாலும், சிலருக்கு அந்தத் தழும்பு நிரந்தர வலியை உண்டாக்கும். 3 வாரங்களுக்கு மேல் அது தொடர்ந்தால் அலட்சியம் கூடாது. சிலருக்கு தழும்பானது தடித்து, உருண்டு, திரண்டு கீலாய்டு என்கிற வகையாக வளர்ந்து கொண்டே இருக்கும். அது காயம் உண்டான அந்தக் குறிப்பிட்ட பகுதியில் மட்டுமின்றி, அதைச் சுற்றியுள்ள பகுதியிலும் பரவும்.

தடிப்பில்லாத காயங்களும், நரம்பு முடிச்சு களால் வலியைத் தரலாம். இத்தகைய வலி தராத தழும்புகள் பொதுவாக தோள்பட்டைகள், கழுத்து, நெஞ்சுப் பகுதி, முழங்கால், கணுக்கால், காது ஆகிய பகுதிகளில் பிரதானமாகத் தென்படும். 40 முதல் 70 சதவிகிதத் தழும்புகள் அறுவை சிகிச்சைக்குப் பிறகும், 90 சதவிகிதத் தழும்புகள் தீக்காயத்துக்குப் பிறகும் ஏற்படுபவை. 3 வாரங்களுக்கு மேல் அந்தத் தழும்பு வலியைத் தந்தால் உடனடியாக மருத்துவரை அணுக வேண்டும்.

அப்போதுதான் சிகிச்சை சுலபமாகும். நாள்பட்ட வலி என்றால் அதற்கு ஒன்றுக்கு மேற்பட்ட சிகிச்சைகள் தேவைப்படலாம். தவிர அந்தத் தழும்பை முடிச்சாக வளர விடாமல் தடுப்பதன் மூலம் வலியையும் தவிர்க்கலாம். தழும்புள்ள பகுதியில் பிரஷர் பெல்ட் எனப்படுகிற அழுத்தப் பட்டையை தொடர்ந்து 3 மாதங்களுக்குக் கட்டிக் கொள்ள வேண்டும். இப்போது கிடைக்கிற நவீன சிலிக்கான் பட்டைகளும் பலனளிக்கும். நாள்பட்ட, முடிச்சு ஏற்பட்ட தழும்புகள் என்றால், குறைந்த அளவு ஸ்டீராய்டு மருந்தைச் செலுத்தி, வலியைக் குறைக்கலாம்.

ஸ்டீராய்டு என்றதும் பயப்பட வேண்டியதில்லை. அந்த மருந்தானது, குறிப்பிட்ட இடத்தில் மட்டுமே இருந்து, வீக்கத்தையும், தழும்புத் திசுக்களையும் கரைக்கும். 3 முதல் 5 ஊசிகளை மாதம் ஒரு முறையோ, இரு முறைகளோ கொடுத்தாலே வலியிலிருந்து நிவாரணம் பெறலாம். இதையும் தாண்டி க்ரையோ சிகிச்சை,போட்டாக்ஸ் ஊசி போன்றவற்றின் மூலமும் நாள்பட்ட வலி தரும் தழும்புகளில் இருந்து நிவாரணம் பெறலாம். தேவைப்பட்டால் அறுவை சிகிச்சை செய்தும் அந்தத் தழும்பை நீக்கி, சரி செய்ய இன்று நவீன மருத்துவத்தில் வழிகள் உள்ளன’’ என்கிறார் டாக்டர் குமார்.

நன்றி - ஆர்.வைதேகி