''அதான் தண்ணி வந்துடுச்சுல்ல" - காவிரி நீர் பங்கீடு வழக்கில் உசுப்பேற்றும் உச்ச நீதிமன்ற தீர்ப்பு..!!

by malik Tue Aug 06, 2013 11:31 am

''அதான் தண்ணி வந்துடுச்சுல்ல" - உசுப்பேற்றும் உச்ச நீதிமன்ற தீர்ப்பு..!!

''அதான் தண்ணி வந்துடுச்சுல்ல" - காவிரி நீர் பங்கீடு வழக்கில் உசுப்பேற்றும் உச்ச நீதிமன்ற தீர்ப்பு..!! 945793_490520444356238_1016782824_n

''தற்போது காவிரியில் வெள்ளம் பெருக்கெடுத்து ஓடுகிறது. இதனால் தமிழ்நாட்டுக்கு ஓராண்டுக்கு தண்ணீர் பிரச்னை இருக்காது. எனவே, காவிரி நீரை பகிர்ந்து கொள்வதைக் கண்காணிக்கும் காவிரி மேலாண்மை வாரியத்தை இப்போதைக்கு அமைக்கத் தேவையில்லை''

-காவிரி நடுவர் மன்ற தீர்ப்புப்படி மேலாண்மை வாரியம் மற்றும் காவிரி நீர் ஒழுங்கு முறை குழுவை விரைந்து அமைக்க உத்தரவிட வேண்டும் என்று உச்ச நீதிமன்றத்தில் தமிழக அரசு தாக்கல் செய்த மனுவுக்கு, இன்று (ஆகஸ்ட் 5) வந்திருக்கும் தீர்ப்புதான் இது!

''தேவைப்படும்பட்சத்தில் தமிழக அரசு மீண்டும் உச்ச நீதிமன்றத்தை நாடலாம். இந்த வழக்கு தொடர்பான அடுத்த விசாரணை, அடுத்த ஆண்டு ஜனவரி மாதம் நடைபெறும்'' என்றும் கூறிவிட்டது... நீதிதிபதிகள் ஆர்.எம். லோதா, முகோபாத் யாயா ஆகியோர் அடங்கிய அமர்வு.

இந்தத் தீர்ப்பைப் பற்றிக் கேட்டதுமே... யாரை நொந்துகொள்வது என்றுதான் தோன்றியது.
பின்னே... கிட்டத்தட்ட 50 ஆண்டுகளுக்கும் மேலான போராட்டத்துக்குப் பிறகு, உச்ச நீதிமன்றம், நடுவர் மன்றம் மறுபடியும் உச்ச நீதிமன்றம் என்று காட்சிகள் மாறிக் கொண்டேதான் இருக்கின்றவே தவிர, சட்டப்படி கடைமடை பூமியான தமிழகத்துக்கு காவிரியில் இருக்கும் உரிமைப்படி தண்ணீர் வந்ததே இல்லை. அதனால்தான் நீதிமன்றப் படிகளை விடாமல் மிதித்துக் கொண்டிருக்கிறது தமிழக அரசு.

நடுவர் மன்ற தீர்ப்பின் தண்ணீர் தரவேண்டும். இதைக் கண்காணிக்க மேலாண்மை வாரியம் அமைக்க வேண்டும் என்பதுதான் தமிழகத்தின் கோரிக்கை. இதுவரை அந்தத் தீர்ப்பின்படி துளி தண்ணீரைக் கூட தராத கர்நாடகத்தைத் தட்டிக்கேட்காத நீதிபதிகள், இயற்கை அன்னையின் அருட்கொடை காரணமாக பொங்கி வரும் மழை நீரைக் காரணம் காட்டி, வழக்கையே தள்ளி வைக்கின்றனர்.

ஒன்று பிரச்னை வரும்முன்பாக தீர்த்து வைக்க வேண்டும்... இல்லையேல் வந்த பிறகாவது தீர்த்து வைக்க வேண்டும்... இந்த இரண்டையுமே செய்யாமல், ''சரிசரி, அவன் அடிச்சுட்டான்... அதான் காயத்துக்கெல்லாம் மருந்து போட்டாச்சுல்ல... பேசாம போ. மறுபடியும் அவன் அடிச்சா, பிறகு பார்த்துக்கலாம்' என்று நடுரோட்டில் நடக்கும் சண்டைக்கு, சுற்றியிருப்பவர்கள் சமாதானம் சொல்வது போல ஒரு தீர்ப்பை எழுதியிருக்கிறார்கள்.

காவிரி பிரச்னை 50 ஆண்டுகளாக நீளும் நிலையில், தற்போது காவிரியில் தண்ணீர் பெருக்கெடுத்து இரு மாநிலங்களிலுமே தண்ணீர் தேவை, தானே பூர்த்தியாகிக் கொண்டிருக்கும் இந்த சூழலில்.. பிரச்னை குறித்து பேசி ஒரு முடிவு எடுப்பது நன்றாக இருக்குமா... அல்லது தண்ணீர் வறண்டு போயிருக்கும் நிலையில் இரண்டு மாநிலங்களிலும் மறியல், போராட்டம், பஸ் எரிப்பு, கல்லெறி என்று கலவர பூமியான பிறகு பேசித் தீர்ப்பது நன்றாக இருக்குமா?

நீதி தேவதைக்கே வெளிச்சம்!

-ஜூனியர் கோவணாண்டி