குடிமகன்களின் கூடாரமாகும் கோவை அம்மா உணவகம்!

by **சிவா** Tue Jun 18, 2013 11:31 am

கோவையில் "அம்மா' உணவகங்களில், குடிமகன்களின் தொல்லை அதிகரித்திருப்பதாக பரவலாக புகார்கள் கிளம்பியுள்ளன; இவர்களைக் கட்டுப்படுத்த, போலீஸ் துறை நடவடிக்கை எடுக்க வேண்டுமென்ற கோரிக்கை வலுத்துள்ளது.

கோவை நகரில், சிங்காநல்லூர் பஸ் ஸ்டாண்ட், ராமநாதபுரம், பூ மார்க்கெட், மணியக்காரம்பாளையம், குறிச்சி, மசக்காளிபாளையம், மேட்டுப்பாளையம் ரோடு புது பஸ் ஸ்டாண்ட், சரவணம்பட்டி சித்ரா நகர், குனியமுத்தூர் - சுண்டக்காமுத்தூர் ரோடு, திருமால் வீதி ஆகிய இடங்களில், மாநகராட்சி சார்பில் "அம்மா உணவகம்' துவக்கப்பட்டுள்ளது. இந்த உணவகங்களால், மாநகராட்சிக்கு 2 கோடியே 71 லட்ச ரூபாய் கூடுதல் பற்றாக்குறை ஏற்படும் என, கணக்கிடப்பட்டுள்ளது. கோவையில் ஓட்டல்களில் உணவுப் பண்டங்களின் விலை அதிகமாக இருப்பதால், இந்த உணவகங்களுக்கு பெரிதும் வரவேற்பு கிடைத்துள்ளது.காலையில் 6.30 மணிக்கே, டிபன் சாப்பிடுவதற்கான வரிசை நீண்டு விடுகிறது; ஓர் உணவகத்தில், காலையில் 1,200 இட்லி மட்டுமே தயாரிக்கப்படுவதால், எட்டரை மணிக்கெல்லாம் இட்லி காலியாகி, உணவகம் மூடப்படுகிறது. மதியம் தலா 300 சாம்பார் சாதமும், தயிர் சாதமும் தயாரிக்கப்படுவதால், ஒரு மணிக்குள் சாப்பாடு தீர்ந்து போய் விடுகிறது. ஒரு நபருக்கு, அதிகபட்சமாக 5 இட்லிகள், மதியம் ஒரு சாம்பார் சாதம், தயிர் சாதம் மட்டுமே தர வேண்டுமென்று உத்தரவிடப்பட்டுள்ளது. ஒரு உணவகத்தில், காலை மற்றும் மதியமும் சேர்த்து 600 பேருக்கு உணவு விற்கப்பட்டாலும், அத்தனை பேர் சாப்பிட முடிவதில்லை.

ஏனெனில், இரு வேளையிலும் இங்கே சாப்பிடும் வாடிக்கையாளர்களின் எண்ணிக்கை அதிகமாக இருக்கிறது. இவர்களிலும் பலர், வேலைக்குப் போகாத "வெட்டி ஆபீசர்'கள் அல்லது அஞ்சும், பத்துமாக "பிச்சை' எடுத்து, காலையிலேயே சரக்கு ஏற்றி விடும் "குடிமகன்'களாகவும் இருப்பதாக புகார் கிளம்பியுள்ளது. நகரங்களில் வசிக்கும் கூலித்தொழிலாளிகள், சிறு வணிகர்கள் போன்ற ஏழைகள் பயன் பெறுவதற்காகவே, "அம்மா' உணவகம் திறக்கப்பட்டுள்ளது; ஆனால், இவர்களில் பெரும்பாலானவர்களுக்கு இங்கே சாப்பாடு கிடைப்பதில்லை என்பதே பலருக்குக் கிடைத்த அனுபவம்.இந்த உணவகங்களில் சாப்பாடுத் தட்டு, டம்ளர் போன்றவை திருடு போகிறது என்பது பழைய புகாராகி விட்டது. சமீபமாக, உணவகத்துக்குள்ளேயே நின்று சிலர் குடிப்பதாக புகார்கள் வருகின்றன. பெரும் கூட்டத்தைச் சமாளிக்கும் வேலையில், உணவக ஊழியர்கள் இருப்பதால் அவர்களால் யாரையும் கவனிக்க முடிவதில்லை. அதனால், உணவகத்தின் மூலைப்பகுதிகளில் நின்று, கண்ணிமைக்கும் நேரத்தில், மது பாட்டில்களை எடுத்து குடித்து விட்டு, அங்கேயே அதைப்போட்டு விட்டு, சாப்பிடுபவர்களையும் பார்க்க முடிகிறது.

இவற்றையெல்லாம் தடுக்க, "கேமரா'க்கள் வைக்கவிருப்பதாக மாநகராட்சி நிர்வாகம் தெரிவித்துள்ளது. அப்படியே கேமரா வைத்தாலும், குடிகாரர்களை எங்களால் எப்படித் துரத்த முடியுமென்று கேட்கும் உணவக ஊழியர்கள், "போலீசார் இங்கு வந்து கண்காணித்து, குடிப்போர், குடித்து விட்டு வருவோர் மீது கடும் நடவடிக்கை எடுக்க வேண்டும்' என்று வலியுறுத்துகின்றனர். முழு நேரக்குடிகாரர்களும் கூட, முன்பெல்லாம் சாப்பிடுவதற்காக வீடுகளுக்குச் செல்லும் நிலை இருந்தது. ஆனால், இங்கே ஐந்து அல்லது 10 ரூபாயிலேயே, காலை மற்றும் மதியச் சாப்பாடு முடிந்து விடுவதால், ரோட்டிலேயே குடித்து, எங்காவது விழுந்து கிடப்பதும் அதிகரித்துள்ளது. உழைப்புக்குப் பெயர் பெற்ற கோவை நகரில் துவக்கப்பட்டுள்ள இந்த உணவகங்கள், உழைப்பாளிகளின் பசியைப் போக்குவதற்குப் பதிலாக, சோம்பேறிகளையும், குடிகாரர்களையும் உருவாக்குகின்றன என்பதுதான் கோவை மக்களின் புதிதாகக் கிளம்பியுள்ள உள்ளார்ந்த வேதனை.

* இரு வேளையிலும் இங்கே சாப்பிடும் வாடிக்கையாளர்களின் எண்ணிக்கை அதிகமாக இருக்கிறது

* இவர்களிலும் பலர், வேலைக்குப் போகாத "வெட்டி ஆபீசர்'கள் அல்லது அஞ்சும், பத்துமாக "பிச்சை' எடுத்து, காலையிலேயே சரக்கு ஏற்றி விடும் "குடிமகன்'களாகவும் இருப்பதாக புகார் கிளம்பியுள்ளது.

தினமலர்

by **ராஜா** Tue Jun 18, 2013 11:35 am

இந்த அம்மா உணவகங்கள் பற்றி தமிழகத்தில் இருந்து லேட்டஸ்டாக நான் கேட்ட கமெண்ட் ,

"திராவிட கட்சிகள் அனைத்தையும் இலவசமா கொடுத்து மக்களை உழைக்க விடாம பண்ணியது , இந்தம்மா டாஸ்மாக் கடையை திறந்து மக்களை குடிகாரர்களாக மாற்றியது இப்போ மீதமிருக்கும் கொஞ்ச பேரையும் பிச்சைகாரர்களாக ஆக்கிகொண்டிருக்கிறது"

இதில் உண்மை இருப்பது போல தான் எனக்கும் தோன்றுகிறது.