Search found 1 match for குளுட்டன்

`குளுட்டன் அலர்ஜி...’ கடந்த சில ஆண்டுகளாக இந்த வார்த்தையை அதிகம் கேள்விப்படுகிறோம். மருத்துவர்களும் உணவு ஆலோசகர்களும் குளுட்டன் உள்ள உணவுகளைத் தவிர்க்கச் சொல்லி அறிவுறுத்துவதையும் பார்க்கிறோம்.

அதென்ன #குளுட்டன் அதை ஏன் தவிர்க்க வேண்டும்? விளக்கமாகப் பேசுகிறார் சென்னையைச் சேர்ந்த, உணவு மற்றும் ஊட்டச்சத்து ஆலோசகரும், பிரபலங்களின் டயட்டீஷியனுமான ஷைனி சுரேந்திரன்.

``குளுட்டன் என்பது என்பது கோதுமை மற்றும் கோதுமைப் பொருள்கள், கம்பு, பார்லி ஆகியவற்றில் காணப்படுகிற ஒரு வகை புரதம். தவிர, மேற்குறிப்பிட்டுள்ள பொருள்கள் பதப்படுத்தப்படும் தொழிற்சாலைகளில் பதப்படுத்தப்பட்டு உணவுப்பொருள்களாக விற்பனைக்கு வருபவற்றிலும் குளுட்டனின் மிச்சம் இருக்கலாம். பிற தானியங்களுடன், மேற்சொன்ன குளுட்டன் வகை தானியங்களைச் சேர்த்துத் தயாரிக்கப்படும் உணவுப்பொருள்களிலும் குளுட்டன் இருக்கக்கூடும். எடுத்துக்காட்டாக, சில நிறுவனங்களின் கேழ்வரகு சேமியாவில் (ராகி சேமியா) `கோதுமை சேர்க்கப்பட்டிருக்கிறது' என்று பாக்கெட்டிலேயே அச்சிட்டிருப்பார்கள்.

`குளுட்டன்ஃப்ரீ டயட்' என்பது, எந்தெந்த உணவுகளில் குளுட்டன் இருக்கிறதோ அந்த உணவுகள் தவிர்த்த உணவுப்பழக்கம்.

யாரெல்லாம் குளுட்டனைத் தவிர்க்க வேண்டும்?

சீலியாக் உள்ளிட்ட சிலவகை உடல்நல பாதிப்புகள் உள்ளவர்கள் குளுட்டன்ஃப்ரீ டயட்டைப் பின்பற்ற அறிவுறுத்தப்படுவார்கள். சீலியாக் நோய் என்பது ஒரு வகையான ஆட்டோ இம்யூன் குறைபாடு. இந்தப் பிரச்னை உள்ளவர்கள் குளுட்டன் உள்ள உணவுகளை உட்கொள்ளும்போது அந்த குளுட்டனானது சிறுகுடலின் லைனிங் பகுதியை பாதித்து, நோய் எதிர்ப்புத்திறனையும் பாதிக்கிறது. ஒரு கட்டத்தில், இதன் விளைவால் உணவிலுள்ள ஊட்டச்சத்துகள் உட்கிரகிக்கப்படுவது இயலாமல் போகிறது.

குளுட்டன் தொடர்பான பிரச்னைகள் இல்லாதவர்களுக்கும் சில நேரங்களில் குளுட்டன்ஃப்ரீ டயட் பரிந்துரைக்கப்படுவதுண்டு. அதைப் பின்பற்றும்போது ஒட்டுமொத்த உடல் ஆரோக்கியம் மேம்படுவதோடு, எடைக்குறைப்பு முயற்சி எளிதாகிறது. எனர்ஜி லெவல் கூடுகிறது என்று சொல்லப்பட்டாலும், இதுகுறித்த ஆய்வுகள் இன்னும் தேவைப்படுகின்றன. சிலருக்கு வயிற்றுவலி, வயிற்று உப்புசம், வயிற்றுப்போக்கு அல்லது மலச்சிக்கல், மந்தமான மனநிலை, தலைவலி போன்ற அறிகுறிகள் இருக்கும். ஆனால் அவர்களுக்கெல்லாம் சிறுகுடல் திசுக்கள் பாதிக்கப்பட்டிருக்க வேண்டும் என அவசியமில்லை. அவர்களுக்கும் குளுட்டன் தவிர்த்த உணவுகள் பரிந்துரைக்கப்படும்.

சிலருக்கு கோதுமை உணவுகள் ஒவ்வாமையை ஏற்படுத்தலாம். உடலின் நோய் எதிர்ப்பு மண்டலமானது கோதுமை உணவுகளில் உள்ள குளுட்டனை நோய் ஏற்படுத்தும் காரணி எனத் தவறாகப் புரிந்துகொள்ளும். அதற்கெதிராக ஒரு ஆன்டிபாடியை உருவாக்கும். அது சுவாசப் பிரச்னை, மூச்சுத்திணறல் போன்றவற்றை உருவாக்கலாம். இந்த அறிகுறிகள் உள்ளவர்களுக்கும் குளுட்டன் தவிர்க்குமாறு அறிவுறுத்தப்படும்.

தவிர்க்க வேண்டிய உணவுகள்

கோதுமை உணவுகள், பிஸ்கட், பிரெட், கேக், ரவை, சேமியா, ஓட்ஸ், பலதானிய உணவுகள், பார்லி மற்றும் கம்பு குளுட்டன் தவிர்த்த உணவுகள்தான் ஆரோக்கியமானவை... அதனால் எல்லோரும் அப்படித்தான் சாப்பிட வேண்டும் என்றெல்லாம் அவசியமில்லை. மேற்குறிப்பிட்ட அறிகுறிகள், பிரச்னைகள் உள்ளவர்கள் மட்டும் மருத்துவ ஆலோசனையோடு குறுகிய காலத்துக்கு அதைப் பின்பற்றிப் பார்க்கலாம். மற்றவர்கள் அனாவசியமாகக் குழம்ப வேண்டாம்.