ரயில் மீது மாவோ., துப்பாக்கிச்சூடு ! 100 பேர் திரண்டு வந்து அட்டூழியம்

**சிவா** · **சிவா** Thu Jun 13, 2013 8:20 pm

பாட்னா: பீகார் மாநிலத்தில் பயணிகள் ரயில் மீது மாவோ.,க்கள் 100 பேர் திரண்டு வந்து துப்பாக்கிச்சூடு நடத்தினர். இதில் 2 பேர் கொல்லப்பட்டதாகவும், 20 க்கும் மேற்பட்டோர் படுகாயம் அடைந்துள்ளதாகவும் முதற்கட்ட தகவல் தெரிவிக்கிறது. சம்பவம் நடந்த இடத்திற்கு துணை ராணுவ படையினர் அனுப்பி வைக்கப்பட்டுள்ளனர். காயமுற்றவர்களுக்கு சிகிச்சை அளிக்க மருத்துவ குழுவினர் சம்பவ இடத்திற்கு அனுப்பி வைக்கப்பட்டுள்ளனர். இந்த தாக்குதலில் பெண் நக்சல்களும் இடம் பெற்றிருந்தனர். ரயில் டிரைவர் மற்றும் பாதுகாப்பு படை வீரர் ஒருவர் ஆபத்தான நிலையில் சிகிச்சை பெற்று வருவதாகவும் தெரிகிறது.

சில மாதங்கள் தணிந்து இருந்த மாவோ., நக்சல்கள் அட்டகாசம் மீண்டும் தலை தூக்கியுள்ளது. மாவோ., நக்சல்கள் பரவிக்கிடக்கும் ஜார்கண்ட், சட்டீஸ்கர் , ஒடிசா, மேற்குவங்கம், பீகார் உள்ளிட்ட மாநிலங்களில் மத்திய அரசு பல்வேறு நடவடிக்கை எடுத்து வந்தாலும் அவர்களை அறவே ஒழிக்க முடியவில்லை.

கடந்த ஆண்டில் ரோந்து சென்ற பாதுகாப்பு வீரர்கள் மீது நடத்திய தாக்குதலில் 60 க்கும் மேற்பட்டோர் கொல்லப்பட்டனர். சட்டீஸ்கரில் கடந்த மே மாதம் 25 ம் தேதி காங்கிரஸ் நிர்வாகிகள் ஒரு நிகழ்ச்சிக்கு சென்று கொண்டிருந்த போது மாவோ.,க்கள் நடத்திய தாக்குதலில் காங்., கட்சியின் மூத்த தலைவர் வி.சி., சுக்லா மற்றும் காங்., மூத்த நிர்வாகிகள் என 27 பேர் கொல்லப்பட்டனர்.

இந்நிலையில் இன்று பீகார் மாநிலம் ஜமுயி மாவட்டத்தில் வேகமாக சென்று கொண்டிருந்த பயணிகள் ரயில் மீது மாவோ.,க்கள் துப்பாக்கியால் சரமாரியாக சுட்டனர். இந்த ரயில் பாட்னாவில் இருந்து தன்பத் சென்று கொண்டிருந்த போது இந்த பயங்கர சம்பவம் நடந்துள்ளது. ரயில் டிரைவர் ரயிலை நிறுத்தாமல் வேகமாக சென்று விட்டதாக கூறப்படுகிறது. இந்த தாக்குதலில் ஒரு பயணியும், பாதுகாப்பு படை வீரர் ஒருவரும் பலியாகி உள்ளதாகவும், 20 பேர் வரை காயமுற்றுள்ளதாக முதல்கட்ட தகவல் தெரிவிக்கிறது. இந்த தாக்குதல் நடத்தப்பட்ட பகுதிக்கு 2 கம்பெனிகளைச் சேர்ந்த துணை ராணுவ படையினர் அனுப்பி வைக்கப்பட்டுள்ளனர்.

பயணிகளிடம் கொள்ளை ; இந்த ரயிலில் பாதுகாப்பு படையினர் பலர் இருந்ததாக கூறப்படுகிறது. இதனால் இவர்களை சுட்டு கொல்லும் நோக்கில் இந்த துப்பாக்கிச்சூடு நடத்தப்பட்டிருக்கலாம் என கூறப்படுகிறது. பின்னர் குந்தார் பகுதியில் ரயில் நிறுத்தப்பட்டது. அங்கு வந்த நக்சல்கள் பலர் பயணிகளிடம் இருந்த உடமைகளை கொள்ளை அடித்து சென்றுள்ளதாகவும் கூறப்படுகிறது. இந்த தாக்குதலில் சுமார் 60 முதல் 80 பேர் வரை நக்சல்கள் வந்திருந்ததாக தெரிகிறது.

இந்த சம்பவத்தை அடுத்து உள்துறை அமைச்சர் சுஷீல்குமார் ஷிண்டே பாதுகாப்பு துறை உயர் அதிகாரிகளுடன் அவசர ஆலோசனை நடத்துகிறார்.

தினமலர்

ரயில் மீது மாவோ., துப்பாக்கிச்சூடு ! 100 பேர் திரண்டு வந்து அட்டூழியம்

ரயில் மீது மாவோ., துப்பாக்கிச்சூடு ! 100 பேர் திரண்டு வந்து அட்டூழியம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக