இந்திய தேர்வை எழுதினாரா ஒபாமா?

soplangi · soplangi Wed Jun 12, 2013 8:57 am

ஜெய்ப்பூர் : எஸ்.எஸ்.சி., எனப்படும், மத்திய பணியாளர் தேர்வாணையத்தின் தேர்வு அனுமதி சீட்டில், அமெரிக்க அதிபர் ஒபாமாவின் படம் ஒட்டப்பட்டிருந்ததால் பரபரப்பு ஏற்பட்டது.

ராஜஸ்தானின், தவுசா மாவட்டம், ராம்பாஸ் கிராமத்தை சேர்ந்தவர், லாலு ராம் மீனா, 40; தனியார் பள்ளி ஆசிரியர். இவர், 1997ல் நடைபெற்ற, எஸ்.எஸ்.சி., தேர்வில் பங்கேற்று தோல்வியுற்றார். அதன்பின், வயது வரம்பு தகுதி இல்லாததால், அரசுப் பணிகளுக்கு விண்ணப்பிப்பதை நிறுத்திக் கொண்டார்.

மிகுந்த அதிர்ச்சி :

இந்நிலையில், ஜூன், 9ம் தேதி, எஸ்.எஸ்.சி., சார்பில், துணைப் பொறியாளர் பதவிக்கான போட்டித் தேர்வு நடத்தப்பட்டது. அதில் பங்கேற்பதற்கான நுழைவுச் சீட்டு லாலுவின் முகவரிக்கு அனுப்பப்பட்டது. விண்ணப்பிக்காமலேயே, எஸ்.எஸ்.சி.,யிலிருந்து தனக்கு நுழைவுச் சீட்டு வந்திருப்பதைக் கண்டு, அவர் அதிர்ச்சி அடைந்தார். கடிதத்தை பிரித்து பார்த்ததும், மிகுந்த அதிர்ச்சி அடைந்தார். காரணம், அதில், லாலுவின் பெயர் மற்றும் முகவரி சரியாக இருந்தது; அவரின் படத்திற்கு பதிலாக, அமெரிக்க அதிபர், பாரக் ஒபாமாவின் புகைப்படம் ஒட்டப் பட்டிருந்தது.

விளக்கம் கேட்டுள்ளார்:

அதில், தேர்வாணைய அதிகாரியும் கையெழுத்திட்டிருந்தார். எம்.ஏ., - பி.எட்., படித்த லாலுவுக்கு, தேர்வுக்கு விண்ணப்பிக்காமலேயே, பொறியாளர் பதவிக்கான தேர்வு நுழைவுச் சீட்டு அனுப்பப்பட்டதும், அதில், அதிபர் ஒபாமாவின் புகைப்படம் ஒட்டப்பட்டிருந்ததும் பெரும் அதிர்ச்சியை ஏற்படுத்தியது.தேர்வு தேதி, தேர்வு நடைபெறும் இடம், நேரம் உள்ளிட்ட அனைத்து விவரங்களும், அந்த அனுமதி சீட்டில் கொடுக்கப்பட்டிருந்தன.போலியான முறையில் எவரேனும் நுழைவுச் சீட்டு அனுப்பியிருப்பார்களா என்ற சந்தேகத்தில், லாலு இணையதளத்திலும் சரி பார்த்தார், அதிலும், ஒபாமாவின் படம் இடம்பெற்றிருந்தது; பெயரும், "லாலு ராம் மீனா' என்றே இருந்தது.அந்த நுழைவு கடிதத்தை, மத்திய தேர்வாணைய அதிகாரிகளுக்கு அனுப்பி வைத்துள்ள லாலு, விளக்கம் கேட்டுள்ளார்.

-- தினமலர்

soplangi · soplangi Wed Jun 12, 2013 9:01 am

இந்திய தேர்வை எழுதினாரா ஒபாமா? 8dcdbe62-4da8-4732-a6fe-69f9105bcdc3_S_secvpf

ராஜஸ்தான் மாநிலத்தில் இளநிலை பொறியாளர் தேர்வுக்கான 'ஹால் டிக்கெட்'டில் அமெரிக்க அதிபர் ஒபாமாவின் போட்டோ ஒட்டப்பட்டுள்ளது ஆச்சரியத்தையும் அதிர்ச்சியையும் ஏற்படுத்தியுள்ளது.

ராஜஸ்தான் மாநிலத்தை சேர்ந்த லாலு ராம் மீனா (40) என்பவர் பள்ளி ஒன்றை ஆரம்பித்து நடத்தி வருகிறார்.

கடந்த 8ம் தேதி அவருக்கு ஓர் தபால் வந்தது.

மத்திய அரசின் பணியாளர் தேர்வு வாரியம் அனுப்பிய இந்த தபாலில் டெல்லியில் துக்னகாபாத் பகுதியில் 9ம் தேதி நடைபெறும் இளநிலை பொறியாளர் எழுத்துத் தேர்வில் பங்கேற்கும்படி அறிவுறுத்தப்பட்டிருந்தது.

பி.எட் பட்டம் பெற்று பள்ளி நடத்தி வரும் லாலு ராம் மீனா இந்த தேர்வில் பங்கேற்பதற்காக மனுவே செய்யவில்லை என்பது குறிப்பிடத்தக்கது.

எதிர்பாராமல் கிடைத்த அதிர்ஷ்டத்தை கண்டு ஆனந்தமடைந்த அவர் 'ஹால்
டிக்கெட்'டை பார்த்ததும் அதிர்ந்து போனார்.

லாலு ராம் மீனாவின் பெயருக்கு அருகாமையில் அமெரிக்க அதிபர் ஒபாமாவின் புகைப்படம் ஒட்டப்பட்டுள்ளது.

தேர்வுக்கு வரும்போது 4 பாஸ்போர்ட் அளவு புகைப்படங்களை கொண்டு வர வேண்டும் எனவும் அறிவுறுத்தப்பட்டுள்ளது.

1-1-1973ல் பிறந்த லல்லு ராம் மீனாவின் பிறந்த தேதி 5-10-1987 எனவும் ஹால் டிக்கெட்டில் குறிப்பிடப்பட்டுள்ளது.

இந்த குளறுபடி குறித்து மாவட்ட கலெக்டரிடம் நிருபர்கள் கருத்து கேட்டபோது 'அப்படி எந்த சம்பவமும் என் கவனத்துக்கு வரவில்லை' என்றார்.

-- மாலைமலர்