கருணாநிதி பேத்திக்கு சொந்தமான வணிக வளாகத்துக்கு சீல்: கோவை மாநகராட்சி அதிரடி

கோவை: முன்னாள் முதல்வர் கருணாநிதியின் பேத்திக்கு சொந்தமான வணிக வளாகத்திற்கு, அனுமதி பெறாத காரணத்தால், கோவை மாநகராட்சி நகரமைப்பு அதிகாரிகள் நேற்று, "சீல்' வைத்தனர். பலத்த போலீஸ் பாதுகாப்புடன் மேற்கொள்ளப்பட்ட இந்த, அதிரடி நடவடிக்கையால், கோவையில் பரபரப்பு ஏற்பட்டது.

கோவை, கணபதி லட்சுமிநகரை சேர்ந்தவர் பழனிசாமி; மாஜி டி.எஸ்.பி., இவரது மகன் பிரேம்; மருமகள் பூங்குழலி. இவர், முன்னாள் முதல்வர் கருணாநிதி மகன் தமிழரசின் மகள். கோவை அவிநாசி ரோட்டில், ஹோப்காலேஜ் அருகில், பூங்குழலி பெயரில் இடமுள்ளது. அதன் அருகில், கோவை, ஆர்.எஸ்.புரத்தை சேர்ந்த, விஸ்வநாதனுக்கு சொந்தமான இடம் உள்ளது.பூங்குழலி - விஸ்வநாதன் ஆகியோர் இணைந்து, ஒப்பந்த அடிப்படையில், வணிக வளாகம் கட்டியுள்ளனர். பேஸ்ட்மென்ட், தரைதளம் மற்றும் மூன்று தளங்களுடன் கட்டப்பட்டுள்ள வணிக வளாகத்தில், ஷோரூம் ஒன்று செயல்படுகிறது.

போலீஸ் பாதுகாப்பு:

இந்த வணிக வளாகம், மாநகராட்சி அனுமதியின்றி கட்டப்பட்டதால், சீல் வைக்கும் நடவடிக்கையில், மாநகராட்சி நிர்வாகம் நேற்று ஈடுபட்டது. மாநகராட்சி நடவடிக்கைக்கு, பாதுகாப்பு கேட்கப்பட்டிருந்ததால், காலை 9:30 மணி முதல், ஏராளமான போலீசார் பாதுகாப்பு பணியில் ஈடுபட்டனர். மாநகராட்சி நகரமைப்பு அலுவலர் வரதராஜன் மற்றும் நகரமைப்பு பிரிவு அதிகாரிகள், வணிக வளாகத்துக்கு, சீல் வைக்க சென்றனர்.வணிக வளாக உரிமையாளர் விஸ்வநாதன், அவரது வழக்கறிஞர் மயில்வாகனன் ஆகியோர், மாநகராட்சி அதிகாரிகளிடம், பேச்சு நடத்தினர். தி.மு.க.,வினர், வணிக வளாகத்தில் திரண்டனர்.கருணாநிதியின் பேத்தி, பூங்குழலி, அங்கு வரவில்லை. தி.மு.க.,வினர் யாரும் வாக்குவாதத்தில் ஈடுபடவில்லை; அதிகாரிகளையும் தடுக்கவில்லை. கோர்ட் தடை உத்தரவு வழங்கியுள்ளதாக, வழக்கறிஞர் மயில்வாகனன், அதிகாரிகளுடன் வாக்குவாதம் செய்தார். ஆனால், கோர்ட் தடை உத்தரவு நகல் ஒப்படைக்கவில்லை.

"அனுமதியின்றி கட்டப்பட்ட வணிக வளாகத்திற்கு, சீல் வைக்க கோர்ட் தடை உத்தரவு வழங்கவில்லை. அதனால், சீல் வைக்கும் பணி கைவிடப்பட மாட்டாது' என, மாநகராட்சி நகரமைப்பு அலுவலர், திட்டவட்டமாக அறிவித்தார்.அதன்பின், வணிக வளாகத்தில் செயல்பட்ட பைக் ஷோரூமில் பணியாற்றும் ஊழியர்கள், 40 பேர் வெளியேற்றப்பட்டனர். காலை, 10:00 மணி முதல், 12:15 மணி வரையிலும், அதிகாரிகளிடம் பேச்சு நடத்திய பின், வணிக வளாக மெயின், "ஷட்டர்' பூட்டப்பட்டு, சீல் வைக்கப்பட்டது.விதிமீறல் குறித்து, நோட்டீஸ் ஒட்டப்பட்டது. வணிக வளாகத்தில், 100க்கும் மேற்பட்ட பைக்குகள் இருந்தன.

கட்டட அனுமதி இல்லை :

மாநகராட்சி நகரமைப்பு அலுவலர் வரதராஜன் கூறியதாவது:உள்ளூர் திட்டக் குழுமத்தில், 2010ல், திட்ட அனுமதி பெற்றுள்ளனர். மாநகராட்சியில் கட்டட அனுமதி பெறவில்லை. முற்றிலும் மாநகராட்சி அனுமதி பெறாத வணிக வளாகம், 2012, பிப்ரவரி முதல், செயல்படுகிறது. 30 ஆயிரம் சதுர அடியிலுள்ள, இந்த வணிக வளாகத்துக்கு, ஏற்கனவே நோட்டீஸ் கொடுக்கப்பட்டது.கடந்த 7ம் தேதி, 24 மணி நேர அவகாசத்துடன், சீல் நடவடிக்கைக்காக, நோட்டீஸ் கொடுக்கப்பட்டது. அதன்படி, சீல் வைக்கப்பட்டுள்ளது.இவ்வாறு அவர் கூறினார்.

"சட்டரீதியாக சந்திப்போம்!

கட்டட உரிமையாளர் தரப்பில், வழக்கறிஞர் மயில்வாகனன் கூறுகையில், ""உள்ளூர் திட்டக்குழும அனுமதி பெற்று, கட்டடம் கட்டப்பட்டுள்ளது. மாநகராட்சி நோட்டீஸ் மீது நடவடிக்கை எடுப்பதற்கு, கோவை, சென்னை கோர்ட்டில் தடை உத்தரவு பெறப்பட்டுள்ளது. கோர்ட் உத்தரவை உதாசீனப்படுத்தி, சீல் வைக்கப்படுகிறது. இது, நீதிக்கும் செய்யும் துரோகம். இதை, சட்ட ரீதியாக சந்திப்போம்,'' என்றார்.

தினமலர்

இந்த சீல் எல்லாம் இவங்களுக்கு பெரிய காரியமா

நீதிக்கும் செய்யும் துரோகம். இதை, சட்ட ரீதியாக சந்திப்போம்.

நீதி என்றால் இவர்கள் பாஷையில் நிதி அதாவது கருணாநிதி

தர்மா wrote: நீதிக்கும் செய்யும் துரோகம். இதை, சட்ட ரீதியாக சந்திப்போம்.

நீதி என்றால் இவர்கள் பாஷையில் நிதி அதாவது கருணாநிதி

இதெல்லாம் சும்மா வெறும் கண் துடைப்பு வேலை