வாழ்க்கையே போர்க்களம்; வாழ்ந்துதான் காட்டணும் - ஒரு கர்ப்பிணியின் பரிதவிப்பு

https://fbcdn-sphotos-b-a.akamaihd.net/hphotos-ak-ash4/419044_503909236348845_1590706663_n.jpg

சிவகங்கை : தூத்துக்குடி, அம்மன்புரத்தை சேர்ந்த மூர்த்தி மனைவி பிரியா, 27; மூன்று ஆண்டுகளுக்குமுன், திருமணம் நடந்தது. லாரி டிரைவரான மூர்த்தி, ஐந்து மாதங்களுக்கு முன், கோவையில் நடந்த, விபத்தில் பலியானார். கணவர் இறந்த போது, கர்ப்பிணியாக இருந்த பிரியா, பிழைப்பு தேடி பரிதவித்தார்.

இந்நிலையில், அம்மன்புரத்தில் வசித்த மீனா என்பவர், பிரியாவுக்கு உதவ முன்வந்தார். மீனாவின் சொந்த ஊர், சிவகங்கை திருப்புத்தூர் அருகே கண்டரமாணிக்கம். இதனால் பிரியாவை, மானாமதுரையில் உள்ள செங்கல் சூளைக்கு, சமையல் வேலைக்காக, மீனா அழைத்து வந்தார். அங்கு கூலியாக பெற்ற, 10 ஆயிரம் ரூபாயை, மீனாவிடம் கொடுத்து வைத்திருந்தார். தற்போது, ஒன்பது மாத கர்ப்பிணியான பிரியா, மருத்துவ பரிசோதனைக்காக, மீனாவின் துணையுடன், சிவகங்கை அரசு மருத்துவக்கல்லூரிக்கு, 15 நாட்களுக்கு முன், வந்தார். அவரை மருத்துவமனைக்கு அனுப்பி விட்டு, மீனா, பணத்துடன் மாயமானார். "துணைக்கு ஒருவர் (உதவியாளர்) இருந்தால்தான், மருத்துவமனையில் சேர்க்க முடியும்' என, டாக்டர்கள் கறாராக கூறியதால், மீனாவை தேடினார்; அவர் சிக்காத நிலையில், மருத்துவமனைக்கு வெளியே, "டூவீலர் ஷெட்'ல், அனாதையாக பரிதவித்தார். ஆன்மிக அமைப்பினர், உணவு கொடுத்து உதவினர்.

கலெக்டரிடம் புகார்: பிரியாவின் பரிதவிப்பு குறித்து, மருத்துவமனைக்கு வந்தவர்கள், கலெக்டர் ராஜாராமனிடம் கூறினர். கர்ப்பிணியை மருத்துவமனையில் சேர்த்து, சிகிச்சை அளிக்க, கலெக்டர் உத்தரவிட்டார். இதன்படி, நேற்று, அவர் மருத்துவமனையில் சேர்க்கப்பட்டார்.

மருத்துவ கல்லூரி "டீன்' சாந்தகுமார் கூறுகையில்,""கர்ப்பிணியுடன் உதவியாளர் இல்லாமல், "அட்மிஷன்' போடக்கூடாது. இருப்பினும், அவரை பாதுகாக்கும் நோக்கில், வேண்டிய வசதிகள் செய்து தரப்பட்டுள்ளன. அவர் குழந்தை பெற, 30 நாட்கள் ஆகும்,'' என்றார்.

பிரியாவின் பெற்றோர் :மற்றும் குடும்பத்தினர், 2004ல், வேளாங்கண்ணி சென்றனர். அப்போது ஏற்பட்ட "சுனாமி' யில் சிக்கி, ஒட்டுமொத்த குடும்பமும் பலியானது. அப்போது பிரியா மட்டும், தஞ்சாவூரில், உறவினர் வீட்டிற்கு சென்றதால், உயிர் தப்பினார். தற்போது, கணவரையும் இழந்து, நிர்க்கதியாக நிற்கும் இவருக்கு, யார் தான் ஆறுதல் கூறமுடியும்.

"பட்ட காலிலேயே படும்; கெட்ட குடியே கெடும்' என்பது, உண்மை தானோ?

தினமலர்

"பட்ட காலிலேயே படும்; கெட்ட குடியே கெடும்' என்பது, உண்மை தானோ?

பல நேரங்களில் இது உண்மையாக தான் இருக்கிறது

இறைவன் பாதுகாப்பானாக