பாகிஸ்தான் தாக்குதலில் இந்திய ராணுவ அதிகாரி சாவு

ஜம்மு காஷ்மீர் மாநிலம் எல்லைக் கட்டுப்பாட்டுக் கோடு பகுதியில் உள்ள இந்திய நிலைகள் மீது பாகிஸ்தான் நடத்திய ராக்கெட் தாக்குதலில் இளநிலை ராணுவ அதிகாரி (ஜே.சி.ஓ.) ஒருவர் உயிரிழந்தார்.

போர் நிறுத்த ஒப்பந்தத்தை மீறி, கடந்த 15 நாள்களில் பாகிஸ்தான் ராணுவம் நடத்திய மூன்றாவது தாக்குதல் ஆகும் இது.

இதுகுறித்து, உதம்பூரில் உள்ள பாதுகாப்புத் துறையின் வடக்கு பகுதி தலைமை அலுவலக செய்தித் தொடர்பாளர் கூறியதாவது:

பூஞ்ச் மாவட்டம் மாண்டியை அடுத்த சாஜியான் பகுதியில் உள்ள இந்திய சாவடிகள் மீது பாகிஸ்தான் ராணுவத்தினர் வெள்ளிக்கிழமை பிற்பகல் 1 மணி அளவில் தாக்குதல் நடத்தினர். இந்திய ராணுவத்தினரும் எதிர்த்தாக்குதல் நடத்தினர்.

மாலை வரை நடைபெற்ற இந்தத் தாக்குதலின்போது, லோனவாலி சாவடி மீது ஒரு ராக்கெட் தாக்கியது. அப்போது, அதிலிருந்து சிதறிய ஒரு பாகம், கர்வால் படைப்பிரிவைச் சேர்ந்த இளநிலை ராணுவ அதிகாரி (ஜேசிஓ) நைப் சுபேதார் பச்சன் சிங் மீது தாக்கியது.

இந்தத் தாக்குதலில் படுகாயமடைந்த பச்சன் சிங் மருத்துவமனைக்குக் கொண்டு செல்லும் வழியில் உயிரிழந்தார். இந்தத் தாக்குதலின்போது, பைகா வகை துப்பாக்கிகள், ராக்கெட் (ஆர்பிஜி) மற்றும் யுபிஜிஎல் உள்ளிட்ட நவீன தானியங்கி ஆயுதங்கள் பயன்படுத்தப்பட்டன என்றார் அந்த அதிகாரி.

போர் நிறுத்த ஒப்பந்தம் மீறல்: இருநாடுகளுக்கிடையிலான 2003ஆம் ஆண்டு மேற்கொள்ளப்பட்ட போர் நிறுத்த ஒப்பந்தத்தை மீறி, கடந்த ஜனவரி மாதத்தில் பாகிஸ்தான் ராணுவம் தொடர் தாக்குதல் நடத்தியது. அதன் பிறகு கடந்த 2 மாதங்களாக அவ்வப்போது தாக்குதல் நடைபெற்று வந்தாலும், வெள்ளிக்கிழமை நடத்திய தாக்குதலில் ராணுவ அதிகாரி உயிரிழந்துள்ளது பதற்றத்தை ஏற்படுத்தி உள்ளது.

குறிப்பாக, நவாஸ் ஷெரீப் பாகிஸ்தான் பிரதமராக பொறுப்பேற்ற 2 தினங்களில் இந்தத் தாக்குதல் நடத்தப்பட்டுள்ளது. பிரதமராக பொறுப்பேற்றுக் கொண்ட பிறகு செய்தியாளர்களுக்கு பேட்டியளித்த நவாஸ் ஷெரீப், இந்தியாவுடன் சுமுகமான உறவை வளர்க்கப் போவதாகவும், காஷ்மீர் உள்ளிட்ட பிரச்னைகளுக்கு பேச்சுவார்த்தை மூலம் தீர்வு காணப்படும் என்றும் கூறியிருந்தார் என்பது குறிப்பிடத்தக்கது.

ஊடுருவல் முயற்சி: பயங்கரவாதிகள் ஊடுருவுவதற்கு வசதியாகவே, ராணுவத்தின் கவனத்தை திசை திருப்பும் வகையில் இந்தத் தாக்குதல் நடத்தப்பட்டிருக்கலாம் என நமது ராணுவம் தரப்பில் சந்தேகிக்கப்படுகிறது. இதையடுத்து, அப்பகுதியில் பாதுகாப்பு பலப்படுத்தப்பட்டுள்ளதுடன் தேடுதல் வேட்டை முடுக்கி விடப்பட்டுள்ளது.

15 நாள்களில் மூன்றாவது தாக்குதல்: ஜம்மு காஷ்மீர் எல்லைக் கட்டுப்பாட்டுக் கோடு பகுதியில் கடந்த 15 நாள்களில் பாகிஸ்தான் ராணுவம் நடத்திய மூன்றாவது தாக்குதல் இது ஆகும். இதற்கு முன்பு, மே 24 ஆம் தேதி துத்மரி கலி பகுதியில் நடத்தப்பட்ட தாக்குதலில் ஒரு பிரிகேடியர் மற்றும் 2 வீரர்கள் காயமடைந்தனர். 27ஆம் தேதியும் பூஞ்ச் பகுதியில் பாகிஸ்தான் ராணுவம் இந்திய நிலைகள் மீது ராக்கெட்டுகளை வீசி தாக்குதல் நடத்தியது.

பாகிஸ்தான் மறுப்பு: ஜம்மு காஷ்மீர் எல்லையில் நடத்தப்பட்ட தாக்குதலில் ராணுவ அதிகாரி ஒருவர் இறந்துள்ள நிலையில், எத்தகைய தாக்குதலையும் நடத்தவில்லை என பாகிஸ்தான் ராணுவம் மறுப்பு தெரிவித்துள்ளது.

""எல்லையில் ராக்கெட் தாக்குதல் நடத்தப்பட்டதாகக் கூறப்படும் குற்றச்சாட்டை ராணுவ செய்தித் தொடர்பாளர் மறுத்துள்ளார். இந்திய நிலைகள் மீது ராணுவம் எத்தகைய தாக்குதலையும் நடத்தவில்லை'' என பாகிஸ்தான் ராணுவம் டுவிட்டரில் வெளியிட்டுள்ள அறிக்கையில் கூறப்பட்டுள்ளது.

தினமணி