காலங்கள் கடந்தும் வரலாறு சொல்லும் நாணயங்கள்

1869 எதற்கு முக்கியத்துவம் பெற்றது?
ராணி எலிசபத் தெரியுமா?
1985ல் நிகழ்ந்த சோகம்?
1937ல் என்ன நடந்தது?
இப்படி அடுத்தடுத்து கேள்விகள் கேட்டால், பதில் சொல்ல முடியுமா?

முடியும்... நாணயங்கள் சேகரித்தால்' என்கிறார் கோபாலகிருஷ்ணன்.

கோவை, பி.என்., புதூரில் வசிக்கும் இவர் கூறியதாவது: கடந்த 1969ல் நாணயங்கள் மீது ஆர்வம் ஏற்பட்டது. அதைப்பற்றி, ஆராய்ந்து, சேகரிப்பில் ஈடுபட்டேன். இந்திய அரசு, 1964 ல் தான், முதன் முதலாக, மறைந்த பிரதமர் ஜவகர்லால் நேருவின் நினைவாக, 50 மற்றும் ஒரு ரூபாய் சிறப்பு நாணயங்களை (commemorative coins) வெளியிட்டது. ஒரு 50 பைசா நாணயம் இந்தியிலும், மற்றொன்று ஆங்கிலத்திலும் இருக்கும். 1969ல், காந்திக்காக, 10,20, 50, ஒரு ரூபாய் மதிப்பு நாணயங்கள் வெளியிடப்பட்டன. 1985ல் இந்திரா மறைந்தபோது, அவருக்காக 50 பைசா நாணயமும், 5, 20, 100 ரூபாய் நோட்டுகளும் வெளியிடப்பட்டன. 1989ல் நேருவின் நூற்றாண்டு நினைவாக 1, 5 ரூபாய் நாணயங்களும், 20, 100 ரூபாய் நாணயங்களும் வெளியிடப்பட்டன. இவ்வாறு, இந்தியாவின் வரலாற்றை நினைவு கூரும் வகையில், சுபாஷ் சந்திரபோஸ், மொரார்ஜி தேசாய், தண்டி யாத்திரை, சுதந்திரம் பெற்று 25 ஆண்டுகள், 50 ஆண்டுகள், அண்ணாதுரை என, பல்வேறு கால கட்டங்களில், அவர்கள் உருவம் பொறித்த நாணயங்கள் வெளியிடப்பட்டன.

நடப்பாண்டில் வைஷ்ணவி தேவிக்காக, சிறப்பு நாணயம் வெளியாகி உள்ளது. இதுவரை, 130 வகையான நாணயங்கள் வெளியிடப்பட்டுள்ளன. இவை அனைத்தும் என் சேகரிப்பில் உள்ளது. ஒவ்வொரு நாணயங்களைச் சேகரிக்கும்போது, அந்த காலத்தை அறிய முடியும். நாணயங்கள் சேகரிப்போர், வாழ்க்கையிலும் ஒழுக்க நெறியை கடைபிடிப்பர். கையில் பணம் கிடைத்தால், வீணாகச் செலவு செய்யாமல், சேகரித்து வைத்துக் கொள்ள விரும்புவர். தஞ்சாவூரில் உள்ள பெரிய கோவில் மட்டும் நமக்கும் தெரியும். அதுவே, நாணயங்கள் சேகரிப்போரிடம் கேட்டால், அது ஆயிரம் ஆண்டுகள் கடந்த கோவில் என்று சொல்வார்கள். கோவில் கட்டி ஆயிரம் ஆண்டுகள் முடிந்ததன் நினைவாக, ஆயிரம் ரூபாய் நாணயத்தை, கோவில் படத்துடன், அரசு வெளியிட்டது நினைவுக்கு வரும். அனா, பைசாவாக மாறி, ரூபாயாக உருவெடுத்தது எப்போது என்றெல்லாம், இப்போதைய இளைஞர்களுக்கு தெரியாது. இன்றைய இளைஞர்களிடம் "அனா' பற்றி கேட்டால், அப்படியொரு நாணயம் இருந்ததா? என்று கேட்பார்கள்.

நாளைய இளைஞர்கள், 50 பைசா, ஒரு ரூபாய் நாணயம் இருந்ததா என்று சந்தேகத்தோடு கேட்பார்கள். காலப்போக்கில், ஐந்து, பத்து ரூபாய் நோட்டுகளும் மறைந்துவிடும். இதுபோன்ற நாணயங்கள்தான், வரலாறுகளை அவர்களுக்குத் தெரிவிக்கும். 1991ல் ஒரு ரூபாய், இரண்டு ரூபாய் நோட்டுகள் அச்சிடப்பட்டது நிறுத்தப்பட்டது. 2011ல் ஐந்து ரூபாய் நோட்டுகள் அச்சிடும் பணி நிறுத்தப்பட்டது. 2013ல் பத்து ரூபாய் நோட்டு நிறுத்தப்பட்டு, பிளாஸ்டிக் நோட்டுகள் புழக்கத்தில் வரும் என, தெரிவிக்கப்பட்டுள்ளது.வரலாற்றை உணர்த்த, விழிப்புணர்வு ஏற்படுத்த, பள்ளிகள் நிலையிலேயே, நாணயக் கண்காட்சி நடத்தி, மாணவர்களை அதில் ஈடுபடச் செய்யலாம். நாணயங்கள் சேகரிப்போரை ஊக்குவிக்க வேண்டும். இவ்வாறு, கோபாலகிருஷ்ணன் எண்ணங்களைப் பகிர்ந்து கொண்டார்.பிரெய்லி: கண் பார்வை இழந்த லூயில் பிரெய்லியின் நினைவாகவும் நாணயம் வெளிவந்துள்ளது. அந்த நாணயத்தில், பிரெய்லி எழுத்துகள் உள்ளன. தொட்டுப்பார்த்து அதை உணர முடியும்.1957 ல் இந்தியாவில், புழக்கத்தில் இருந்த ஒரு அணா, அரை அணா போன்றவை, "நயா பைசா'வாக (புதிய காசு) மாறியது, இந்தாண்டு தான்.

நாணயங்கள் பற்றி தெரிந்துகொள்வோம் :

மின்ட்: மத்திய அரசின் அங்கீகாரம் பெற்ற "மின்ட்' மும்பை, கொல்கத்தா, ஐதராபாத் நகரங்களில் இயங்குகின்றன. சிறப்பு நினைவு நாணயங்களை இந்த அமைப்புதான் வெளியிடுகிறது. அனைத்து மதிப்புகளிலும் நாணயங்கள் வெளியாகி உள்ளன. மும்பை, கொல்கத்தா நகரங்களில் 60 ஆண்டுகளாகவும், ஐதராபாத்தில், 2012 ஆண்டு முதல், மின்ட் இயங்கி வருகின்றன.வெள்ளி நாணயம்: அரசன் வில்லியம் நான்கு, உருவம் பொறித்த, 1,25, 50 ரூபாய் மதிப்புள்ள வெள்ளி நாணயங்களை, கிழக்கிந்திய கம்பெனி, 1835ம் ஆண்டு வெளியிட்டது. இந்த நாணயத்தின் எடை 11.9 கிராம். முற்றிலும் வெள்ளியிலானது. 1840ல் விக்டோரியா ராணியின் உருவத்துடன் இரண்டு விதமான நாணயங்கள் வெளியிடப்பட்டன. அதில், ராணி கிரீடம் வைத்திருக்க மாட்டார். சிறிய தலையுடனும், பெரிய தலையுடனும் ராணியின் உருவங்கள் அச்சிடப்பட்டிருந்தன. 1862ல் விக்டோரியா ராணி கிரீடம் அணிந்த உருவம் பொறிக்கப்பட்ட நாணயங்கள் வெளியிடப்பட்டன. இந்த நாணயங்கள் அனைத்தும் முற்றிலும் வெள்ளியலானது. அதன்பிறகு, எட்வர்ட் அரசருக்கும், ஐந்தாம் ஜார்ஜ் அரசருக்கும் வெள்ளி நாணயங்கள் வெளியிடப்பட்டன. அதற்குப்பிறகு, உலகப்போர் நடந்ததால், வெள்ளி நாணயங்கள் வெளியிடப்படவில்லை.1940-45ம் ஆண்டுகளில், 1,25,50 ரூபாய் மதிப்பிலான, நாணயத்தின் பாதி எடை வெள்ளி கொண்டவை வெளியிடப்பட்டன. 1947ல் இந்திய அரசால், நிக்கல் நாணயங்கள் வெளியாகின. பித்தளை, நிக்கல் உலோகக் கலைவயில், 1, 2,5, 10 ரூபாய் மதிப்புகளில் நாணயங்கள் வெளியாகின. 2004ல் ஐந்து ரூபாய் மதிப்பிலான நாணயங்கள், ஸ்டீல் உலோகத்தில் வெளியிடப்பட்டன.

தினமலர்