பில்லூர் அணை நீர்மட்டம் உயருகிறது :)

**krishnaamma** · **krishnaamma** Wed Jun 05, 2013 9:06 am

மேட்டுப்பாளையம்: பில்லூர் அணையின் நீர்மட்டம் உயர்வதால், பவானி ஆற்றில் வெள்ளம் கரை புரண்டு ஓடுகிறது. மேலும், கோவைக்கு, குடிநீர் தட்டுப்பாடு குறையும் வாய்ப்புள்ளது. கேரள மாநிலத்தில், தென்மேற்கு பருவமழை தீவிரமடைந்திருப்பதால், தமிழக - கேரள மாநில எல்லையில் உள்ள பில்லூர் அணைக்கு, நீர் வரத்து அதிகரித்துள்ளது. இதனால், 100 அடி உயரம் கொண்ட அணையில், தற்போது, நீர்மட்டம், 75 அடியாக உயர்ந்துள்ளது. மேலும், காட்டாறு பகுதியிலிருந்து, மழைநீர் வருவதால், தண்ணீர் செந்நிறமாக உள்ளது. அணைக்கு நீர்வரத்து அதிகரிப்பால், பவானி ஆற்றில் தண்ணீர் திறந்து விடப்பட்டிருப்பதால், கரை புரண்டு தண்ணீர் செல்கிறது. இதன் மூலம், ஈரோடு மாவட்டம், பவானி சாகர் அணையின் நீர்மட்டம் உயரும் வாய்ப்பு உள்ளது. பவானி ஆற்றிலிருந்து, மேட்டுப்பாளையம், திருப்பூர் குடிநீர் திட்டங்கள் செயல்படுகிறது. தற்போது, தேவையான நீர் ஆதாரம் இருப்பதால், குடிநீர் வினியோகத்தில் சிக்கல் இருக்காது. இதேபோல், பில்லூர் அணையை மையமாக வைத்து செயல்படும், அத்திக்கடவு குடிநீர் திட்டத்தில், கோவை நகரின் பெரும்பால பகுதிக்கு, குடிநீர் வினியோகம் செய்யப்படுகிறது. எனவே, கோடையில் நிலவிய குடிநீர் தட்டுப்பாடு, இனி படிப்படியாக குறையும் வாய்ப்பு ஏற்பட்டுள்ளது.

நன்றி : தினமலர்