கடலூர் அருகே கார் மீது பஸ் மோதி தாய்-மகன் பலி: 8 பேர் காயம்

https://fbcdn-sphotos-c-a.akamaihd.net/hphotos-ak-ash3/576682_498866280186474_202037143_n.jpg

கடலூர் புதுப்பாளையத்தை சேர்ந்தவர் பால்ராஜ் (வயது 25). டிங்கர். இவருக்கும் திண்டிவனம் அருகே உப்பு வேலூரை சேர்ந்த பூரணி (21) என்பவருக்கும் கடந்த 2 மாதங்களுக்கு முன்பு திருமணம் நடந்தது.

இந்த நிலையில் பூரணிக்கு தாலி பிரித்து கோர்க்கும் நிகழ்ச்சிக்காக பால்ராஜ், பூரணி மற்றும் பால்ராஜின் உறவினர்களான செல்வகுமாரின் மனைவி காவேரி (24), இவர்களது 2 1/2 வயது மகன் பிரியதர்சன், அசோக்குமார் (17), சரஸ்வதி (45), மணிகண்டனின் மனைவி பாரதி (25), இவர்களது மகள் சுவாதி (3) ஆகியோர் ஒரு வாடகை காரில் உப்பு வேலூருக்கு இன்று காலை புறப்பட்டு சென்றனர். காரை டிரைவர் ஷேக் மாலிக் (25) என்பவர் ஓட்டி வந்தார்.

கார் கடலூர் அருகே பெரிய கங்கணாங்குப்பம் என்ற இடத்தில் வந்தபோது எதிரே வந்த டயர் வண்டி திடீரென இடது புறமாக திரும்பியது. அப்போது புதுவையில் இருந்து கடலூர் நோக்கி வந்த தனியார் பஸ் எதிர்பாராதவிதமாக டயர் வண்டி மீது மோதியது. பின்னர் அந்த பஸ் கட்டுப்பாட்டை இழந்து எதிரே வந்த கார் மீது மோதியது. இதில் காரும், டயர் வண்டியும் அப்பளம்போல் நொறுங்கியது.

இந்த விபத்தில் காவேரியும் அவரது மகன் பிரியதர்சனும் உடல் நசுங்கி சம்பவ இடத்திலேயே இறந்து போனார்கள். மேலும் புதுமண தம்பதிகளான பால்ராஜ், பூரணி, கார் டிரைவர் ஷேக் மாலிக், அசோக்குமார், சரஸ்வதி, பாரதி, சுவாதி, மற்றும் டயர் வண்டியை ஓட்டி வந்த உச்சிமேடு கிராமத்தை சேர்ந்த ராஜலிங்கம் (65) ஆகிய 8 பேரும் படுகாயம் அடைந்தனர்.

அவர்கள் உடனடியாக கடலூர் அரசு ஆஸ்பத்திரியில் சேர்க்கப்பட்டனர். பின்னர் பூரணியை தவிர மற்றவர்கள் மேல் சிகிச்சைக்காக புதுவை ஜிப்மர் ஆஸ்பத்திரியில் அனுமதிக்கப்பட்டனர்.

இந்த விபத்து காரணமாக அந்த பகுதியில் போக்குவரத்து கடுமையாக பாதிக்கப்பட்டது. மேலும் இந்த விபத்து தொடர்பாக ரெட்டிச்சாவடி போலீசார் வழக்குபதிவு செய்து விசாரணை நடத்தி வருகிறார்கள்.

மாலைமலர்

RIP

விபத்துகளை குறைக்க வாகன ஓட்டிகள் முயற்சி செய்ய வேண்டும்