சித்தர் வணங்கிய சிவபாலன்

அரியலூர் மாவட்டத்தில் பெரிய கடை வீதி வழியே செல்பவர்கள் நிச்சயம் அந்த முருகன் கோயிலை பார்த்திருப்பார்கள்.

ஆனால் அவர்களில் பலருக்கும் தெரிந்திருக்காது சின்னஞ்சிறு பாலகனாக அங்கே காட்சி தரும் முருகன், சித்தர் ஒருவரால் பூஜிக்கப்பட்டவன் என்பது சிந்தை நிறைவிக்கும் கந்தவேளை தரிசித்தபடியே தல புராணத்தை புரட்டியதில் தெரிந்தது. யாழ்ப்பாணத்தில் இருந்து இந்தியா வந்த ஏழு சித்தர்களுள் சிற்றம்பல அப்பார் என்பவர் இத்தலத்தில் தங்கி சிவமைந்தனை பூஜித்திருக்கிறார் என்பது.

சித்தத்தை ஒருநிலைப்படுத்தி சிவபாலனை துதித்து அஷ்டமா சித்திகளும் கைவரப் பெற்ற அந்த சித்தர். அறுமுகனின் அருளாற்றலை முழுமையாக ஓரிடத்தில் குவித்து அந்த இடத்தில் சிலை ஒன்றினை ஸ்தாபித்து மற்றவர்களும் அவனருள் ஜீவ சமாதி இங்கே இருப்பதாகவும் சொல்கிறார்கள். மூன்று நிலை ராஜகோபுரம் பாலசுப்ரமணியன் பெயரும், அவன் அண்ணனின் உருவுளம் தாங்கி முன் நிற்கிறது.

முன்வாசல் எதிரே நின்றாலே மூலவராக காட்சிதரும் முருகனின் தரிசனம் முழுமையாக கிடைக்கிறது. தரிசிக்கும்போது வேல்தாங்கி நின்று வேதனை துடைத்திட நான் இருக்க உனக்கேன் பயம்? என்று உமைபாலன் கேட்பது போல் தோன்ற, உள்ளம் நெகிழ்கிறது. பக்தி அதிர்வுகள் கோயில் நிரம்பிஇருப்பதை வலம் வரும்போது உணர முடிகிறது. கோஷ்டங்களில் தும்பிக்கையான் முதலிருக்க தட்சிணாமூர்த்தி, லிங்கோத்பவன், நான்முகன், துர்க்கை தொடர்கின்றனர். விஸ்வநாதர், விசாலாட்சி நவகோள்கள், பைரவர் சன்னதிகளும் இருக்கின்றன. செவ்வாய், வெள்ளிகளில் சிறப்பு பூஜை கண்டு பயன்தரும் கல்யாணதுர்கை தனி சன்னதியில் தரிசனம் அளிக்கிறாள். பாலமுருகனின் திருவிளையாடல்கள் பல ஓவியங்களாக சுவரை அலங்கரித்து, மனதை அபகரிக்கின்றன.

ஸ்கந்த சஷ்டியில் சூரம்ஹாரம், பங்குனி உத்திரம் வைகாசி விசாகம் என்று எல்லா திருவிழாக்காளும் அமர்களமாக நடக்கின்றன. அந்த சமயங்களில் ஆறுமுகனின் அருள் வெள்ளம் போல் பக்தர் கூட்டமும் நிரம்பி வழிகிறது. சித்தரால் பிரதிஷ்டை செய்யப்பட்ட சிவபாலன், நித்தம் வரும் பக்தர் தம் சித்தம் குளிரும்படி வரம் அளிப்பதில் வல்லவனாக திகழ்கிறான்.

-நாகாத்தம்மன்