பசுஞ்சாணத்திலிருந்து நறுமணப்பொருள்

பசுஞ்சாணம் ஒரு கிருமிநாசினி என்பதை நமது முன்னோர்கள் நன்கு உணர்ந்திருந்தனர். அதனால்தான் தினந்தோறும் வீட்டு வாயிற்புறங்களைப் பசுஞ்சாணம் கரைசல் கொண்டு சுத்தப்படுத்திவந்தனர். மேலும் வீட்டின் உட்புறத்திலும் பசுஞ்சாணக் கரைசலைக் கொண்டு மெழுகி வந்தனர்.

தற்போதைய விஞ்ஞானக் கண்டுபிடிப்பு பசுஞ்சாணம் அணுக்கதிர்வீச்சைக்கூட எதிர்க்கும் தன்மையது என்பது!

இப்போது இரு இந்தோனேஷியப் பள்ளி மாணவிகளான த்வி நைலுல் இஸ்ஸா மற்றும் ரின்ட்யா அபிரான்டிமிகி என்பவர்கள் தங்களது பள்ளியில் நடக்கும் ஸயின்ஸ் ஒலிம்பியட் நிகழ்ச்சிக்காகப் பசுஞ்சாணத்திலிருந்து, காற்றைச் சுத்திகரிக்கும் ஒரு நறுமணம் வீசும் வாசனைப்பொருளைத் தயார் செய்திருக்கிறார்கள். இந்தப் புதிய கண்டுபிடிப்பு செயற்கை வாசனைப் பொருள்களால் விளையும் பக்கவிளைவுகள் இல்லாதது. மேலும் நல்ல நறுமணம் கொண்டு பச்சிலை வாசனையை அளித்துப் புத்துணர்ச்சி கொடுக்கிறது. இந்தக் கண்டுபிடிப்பிற்காக இவர்கள் முதல் பரிசு பெற்றனர்.

கிழக்கு ஜாவாவிலிருந்து ஒரு பசுமாட்டுப் பண்ணையிலிருந்து இவர்கள் பசுஞ்சாணத்தைப் பெற்று, அதை நீரில் கரைத்து மூன்று நாட்கள் அக்கலவையைப் புளிக்கவைத்தார்கள். இந்தக் கரைசலை வடிகட்டி அதனுடன் இளநீரையும் கலந்தார்கள். இந்தக் கலவையை உலையில் வைத்து ஆவியாக்கி, அந்த ஆவியைக் குளிர வைத்து வாசனை பொருந்திய திரவமாக அது மாறிவிட்டதைக் கண்டனர். நல்ல மனோகரமான மூலிகை நறுமணத்துடன் கூடியதாக இந்தத் திரவம் இருந்தது.

இதைக் கொண்டு, நாம் நமது இல்லங்களில் துர்நாற்றமின்றி இருக்க ஓடோனில் போன்ற ஏர் ஃபெஷ்ணர்ஸ் உபயோகப்படுத்துவது போல, பயன்படுத்தலாம். இது உடலுக்கு ஊறுவிளைவிக்காமல், பக்கவிளைவுகள் இல்லாதது, மலிவாகவும் இருக்கும்.

இம்மாணவிகள் இஸ்தான்புல்லில் நடக்க இருக்கும் “மாசுக்கட்டுப்பாடு - சுற்றுச்சூழல் பாதுகாப்பு ஒலிம்பியாட் புராஜெக்டி’ல் பங்கேற்கப்போகின்றனர்.

- சுமன்

நல்ல செய்தி , இதனால் தான் நம் முன்னோர்கள் வாசலில் சாணம் தெளிப்பதும் , திருநீறு பூசுவதும் என பல நல்ல வழிமுறைகளை சொல்லிகொடுத்துள்ளார்கள்.