சிபிஐ-க்கு தன்னாட்சி

**சிவா** · **சிவா** Sat 18 May 2013 - 10:54

சிபிஐ-க்கு தன்னாட்சி அதிகாரம் அளிப்பது தொடர்பாக ஆராய அமைக்கப்பட்டுள்ள மத்திய அமைச்சரவைக் குழுவின் செயல்பாட்டில் நீதிமன்றம் தலையிட முடியாது என உச்ச நீதிமன்றம் வெள்ளிக்கிழமை தெரிவித்தது.

சிபிஐ-க்கு தன்னாட்சி அளிப்பது தொடர்பாக ஆராய்வதற்கு மத்திய நிதி அமைச்சர் ப. சிதம்பரம் தலைமையிலான குழுவை பிரதமர் மன்மோகன் சிங் சமீபத்தில் நியமித்தார். சிபிஐ-யின் செயல்பாடு குறித்து உச்ச நீதிமன்றம் கடும் அதிருப்தி தெரிவித்ததைத் தொடர்ந்து இக்குழுவை மத்திய அரசு நியமித்துள்ளது.

இதனிடையே சிபிஐ-க்கு தன்னாட்சி அளிப்பது தொடர்பான வழிகாட்டுதலை மத்திய அமைச்சரவைக் குழுவுக்கு அளிக்க வேண்டும் என்று சிபிஐ அதிகாரிகள் உச்ச நீதிமன்றத்தில் மனு தாக்கல் செய்திருந்தனர்.

நாடாளுமன்ற குழு பரிந்துரையில் வலுவான சிபிஐ அமைப்பு உருவாக்கப்பட வேண்டுமெனில் சிபிஐ அதிகாரிகள் நியமனத்தில் புதிய விதிகள் வகுக்கப்பட வேண்டும் என குறிப்பிடப்பட்டுள்ளது. அத்துடன் அதிகாரிகள் அளவிலான நியமனத்தில் அயல் பணி நியமன முறையைத் தவிர்க்க வேண்டும் என்றும் அப்போதுதான் தன்னாட்சி அமைப்பாக உருவாக்க முடியும் எனவும் பரிந்துரைத்திருந்தது.

இப்போது சிபிஐ நிலையிலான அதிகாரிகள் நாடாளுமன்ற குழுவின் பரிந்துரையை எதிர்த்து உச்ச நீதிமன்றத்தில் மனு தாக்கல் செய்தனர். அதில் நாடாளுமன்ற குழுவின் பரிந்துரைக்கு தடை விதிக்க வேண்டும் என்று குறிப்பிட்டிருந்தனர். மத்திய அமைச்சரவை குழு நியமிக்கப்பட வேண்டியதன் அவசியம் என்ன? அந்தக் குழு நாடாளுமன்ற பரிந்துரைகளை அமல்படுத்த நீதிமன்றம் அனுமதி அளிக்கக் கூடாது என குறிப்பிட்டிருந்தனர். தங்களது குறைகளையும் மத்திய அமைச்சரவை குழு கேட்டறிய வாய்ப்பு தரப்பட வேண்டும் என்றும் மனுவில் குறிப்பிட்டிருந்தனர்.

இந்த மனுவை நீதிபதிகள் பி.எஸ். செüகான் மற்றும் தீபக் மிஸ்ரா ஆகியோரடங்கிய அமர்வு ஆய்வு செய்து, அதிகாரிகளின் கோரிக்கையை நிராகரித்தனர். இருப்பினும் நீதிமன்றத்தின் கோடை விடுமுறைக்குப் பிறகு சிபிஐ அதிகாரிகள் பணி நியமனத்தில் குறைகள் இருப்பின் அது தொடர்பாக மேல் முறையீடு செய்யலாம் என்று குறிப்பிட்டனர்.

""உச்ச நீதிமன்றம் சிபிஐ தொடர்பாக இதற்கு முன்னர் பிறப்பித்த எந்த உத்தரவையும் அரசு அமல்படுத்தவில்லை. அதேபோல நாடாளுமன்ற நிலைக்குழு அளித்த பரிந்துரைகளையும் செயல்படுத்தவில்லை. இந்நிலையில் மத்திய அமைச்சரவை குழு நியமிக்கப்பட்டுள்ளது, நீதிமன்ற வழிகாட்டுதலுக்கு எதிரானதாகும்,'' என சிபிஐ அதிகாரிகள் சார்பில் வாதாடிய வழக்குரைஞர் காமினி ஜெய்ஸ்வால் குறிப்பிட்டார்.

சிபிஐ தகுதி நிலை அதிகாரிகள் கடந்த 50 ஆண்டுகளாக எந்தவித பதவிப் பொறுப்பிலும் நியமிக்கப்படவில்லை. தாங்கள் வேண்டுமென்றே புறக்கணிக்கப்படுவதாக குறிப்பிட்ட சிபிஐ நிலை அதிகாரிகள், புலனாய்வு அமைப்பின் கொள்கை வகுக்கும் முடிவுகளை தீர்மானிப்பதில் தாங்கள் எந்தக்காலத்திலும் பயன்படுத்திக் கொள்ளப்பட்டதில்லை என்று சுட்டிக்காட்டினர்.

சிபிஐ-யில் பெருமளவிலான பணியிடங்கள் காலியாக இருப்பது தொடர்பாக உச்ச நீதிமன்றம் சமீபத்தில் ஒரு உத்தரவை வெளியிட்டிருந்தது. இதில் புலனாய்வு அமைப்பு தன்னிச்சையாக செயல்பட வேண்டும். அதற்கேற்ப சுதந்திரம் அளிக்கப்பட வேண்டும் என அறிவுறுத்தியிருந்தது. இதைத் தொடர்ந்தே தன்னாட்சி அதிகாரம் அளிப்பது தொடர்பாக ஆராய மத்திய அமைச்சரவைக் குழு நியமிக்கப்பட்டுள்ளது குறிப்பிடத்தக்கது.

தினமணி