சாம்பியன்ஸ் கோப்பை கிரிக்கெட்: இந்திய அணி புறக்கணிப்பு?

**ராஜா** · **ராஜா** Tue May 14, 2013 11:37 am

சர்வதேச கிரிக்கெட் கவுன்சிலின் (ஐ.சி.சி.) கிரிக்கெட் கமிட்டியில் வீரர்களின் பிரதிநிதியாக டிம் மேவுக்கு பதிலாக இந்திய அணியின் முன்னாள் சுழற்பந்து வீச்சாளர் சிவராமகிருஷ்ணன் சில தினங்களுக்கு முன்பு நியமிக்கப்பட்டார். இதற்கான ஓட்டெடுப்பில் முதலில் டிம் மே 9–1 என்ற கணக்கில் வெற்றி பெற்றார்.

பிறகு ஓட்டெடுப்பில் குளறுபடி நடந்துள்ளதாக கூறி நடத்தப்பட்ட மறுதேர்தலில் சிவராமகிருஷ்ணன் வெற்றி பெற்றார். இந்த நிலையில் இந்திய கிரிக்கெட் வாரியம் இந்த விஷயத்தில் தலையிட்டு, தனது செல்வாக்கை பயன்படுத்தி மறுதேர்தலை நடத்த கட்டாயப்படுத்தியதாகவும், அது குறித்து விசாரணை நடத்த வேண்டும் என்றும் சர்வதேச கிரிக்கெட் வீரர்களின் கூட்டமைப்பு ஐ.சி.சி.க்கு புகார் அனுப்பியது.

சிவராமகிருஷ்ணன் நியமனம் விவகாரத்தில் பல்வேறு தரப்பிலும் விமர்சனங்கள் கிளம்பின. இந்த பிரச்சினையில் ஐ.சி.சி.யின் முடிவு தங்களுக்கு சாதகமாக வராவிட்டால் இந்திய அணி அடுத்த மாதம் இங்கிலாந்தில் நடக்கும் சாம்பியன்ஸ் கோப்பை கிரிக்கெட் போட்டியை புறக்கணிக்கலாம் என்று தகவல்கள் வெளியாகியுள்ளன.

இது குறித்து இந்திய கிரிக்கெட் வாரிய அதிகாரி ராஜீவ் சுக்லா கூறுகையில், ‘இப்போதைக்கு சாம்பியன்ஸ் கோப்பை போட்டியில் நாங்கள் பங்கேற்க முடிவு செய்துள்ளோம். ஆனால் சிவராமகிருஷ்ணனின் நியமனம் தொடர்பாக ஐ.சி.சி.யின் தொழில் நுட்ப கமிட்டியில் எடுக்கப்படும் இறுதி முடிவை பொறுத்தே எங்களது அனைத்து நடவடிக்கைகளும் இருக்கும்’ என்றார்.

இதற்கிடையே, இந்திய கிரிக்கெட் வாரியத்திற்கு, இலங்கை, பாகிஸ்தான் உள்ளிட்ட ஆசிய நாடுகள் ஆதரவு தெரிவித்துள்ளன.

-maalaimalar