சிலிண்டர் பதிவதற்கு புதிய மொபைல் எண் பாரத் பெட்ரோலியம் அறிமுகம்

by தளிர் அலை Sun May 12, 2013 12:37 pm

தஞ்சாவூர் : ""தமிழகம், புதுச்சேரி பாரத் காஸ் வாடிக்கையாளர்களுக்கு, குரல் பதிவு மூலம், 24 மணி நேரமும், காஸ் சிலிண்டர் பதிவு செய்ய, புதிய மொபைல் எண் அறிமுகப்படுத்தப்பட்டு உள்ளது,'' என, பாரத் பெட்ரோலியம் நிறுவன மண்டல ஒருங்கிணைப்பாளர் ராஜகுமார் கூறினார்.

தஞ்சையில், பாரத் பெட்ரோலிய வினியோகஸ்தர்கள் ஆலோசனைக் கூட்டம், நேற்று நடந்தது. பாரத் பெட்ரோலியம் நிறுவன மண்டல மேலாளர் ராமானுச்சாரி, ஒருங்கிணைப்பாளர் ராஜகுமார் ஆகியோர், நிருபர்களிடம் கூறியதாவது: சிலிண்டர் பதிவுக்காக வாடிக்கையாளர்கள், அலுவலக எண்ணில் தொடர்பு கொள்ளும்போது, "எங்கேஜ்டு' ஆக இருந்தால், திரும்ப திரும்ப அழைக்க வேண்டி உள்ளது.

இந்த அலைக்கழிப்பை தவிர்க்கும் வகையில், குரல் பதிவு முறையில், 24 மணி நேரமும், சிலிண்டர் பதிவு செய்யும் முறையை, பாரத் பெட்ரோலிய நிறுவனம், தற்போது அறிமுகப்படுத்தி உள்ளது. தமிழகம், புதுச்சேரிக்கு, குரல் பதிவு மூலம், சிலிண்டர் பதிவு செய்ய, 94860 56789 என்ற பொது மொபைல் எண் தரப்பட்டுள்ளது. இந்த சேவையில் பயன்பெற, வாடிக்கையாளர் முன்கூட்டியே, தங்களது லேண்ட் லைன் அல்லது மொபைல் நம்பரை பதிவு செய்ய வேண்டும்.

இதையடுத்து, குரல் பதிவு முறையில், வாய்ஸ் ரெக்கார்டு குறிப்புகளை பின்பற்றி, கேட்கும் கேள்விகளுக்கு வாடிக்கையாளர் பதில் கூற வேண்டும். மேலும், அலுவலக நேரத்தில் தான், காஸ் சிலிண்டர் பதிவு செய்ய வேண்டும் என்றில்லாமல், 24 மணி நேரமும், பதிவு செய்ய முடியும்.

அது மட்டுமின்றி, எஸ்.எம்.எஸ்., மூலம் பதிவு செய்தது உறுதி செய்யப்படும். அதேபோல, பதிவு செய்த வாடிக்கையாளருக்கு சிலிண்டர் டெலிவரி கொடுத்ததும், மொபைல் போனுக்கு, எஸ்.எம்.எஸ்., தரப்படும். இதனால், டெலிவரிமேன் தவறுகளும், வினியோகிப்பதில் நடக்கும் குளறுபடிகளும் தவிர்க்கப்படும். இந்த சேவை மூலம், "உங்கள் சிலிண்டர், உங்களுக்கே' என்னும் உறுதியை, பாரத் காஸ் நிறுவனம் வாடிக்கையாளருக்கு அளித்துள்ளது. இவ்வாறு, அவர்கள் கூறினர்.
--தினமலர்