வந்தார்கள், சென்றார்கள் – ஈழமுரசு

http://www.meenagam.org/?p=13920
வந்தார்கள், சென்றார்கள் – ஈழமுரசு



எழுதியவர்ஏதிலி on October 22, 2009
பிரிவு: செய்திகள்



பிரமாண்டமான
பிரச்சாரத்துடன் தாளம் தப்பட்டையுடன் வந்திறங்கிய தமிழகத்திற்கான இந்திய
நாடாளுமன்றக் குழுவினர் நாடு திரும்பிவிட்டனர். ‘மரண ஓலம் கேட்கும்
வீட்டிற்கு வந்தவர்களுக்கு மாலை மரியாதைகளும், பொன்னாடைக் கௌரவிப்புகளும்
வெற்றி விழாவிற்கு வந்தார்களோ?

என்ற எண்ணத்தை ஏற்படுத்திவிட்டது.’ இனி
நாடு திரும்பிய அவர்கள் ‘சென்றார்கள், வென்றார்கள், வந்தார்கள்’ என்று
பிரச்சாரங்கள் தடபுடலாக நடைபெறக்கூடும். மக்கள் மீளக் குடியேற்றப்படாமலேயே
அவர்கள் மீளக் குடியேற்றப்படுவதாக கதைகள் பின்னப்படும். இரண்டுநாள்
சிறீலங்கா அரசு அறிவித்த போலி யுத்த நிறுத்தத்தைக் கூறியே வெறும் வாயை
மென்றவர்களுக்கு இப்போது அவல் கிடைத்ததுபோல கள நிலையை நேரில் சென்று
பார்வையிட்டு திரும்பிய பின் சொல்லவா வேண்டும். யாழ்குடாவிற்கு
சென்றவர்கள் அங்கு தமிழ் மக்கள் கேள்விக் கணைகளால் துளைத்தெடுத்து
விடுவார்கள் என்று தெரிந்துதான் சிறீலங்காவின் ஆயுதக் குழுத் தலைவர்
டக்ளசை அருகில் வைத்துக்கொண்டு அனைத்து கூட்டங்களையும்
நடத்தியிருக்கின்றார்கள்.

டக்ளஸ் இருந்தால் தமிழ் மக்கள் வாய்
திறக்க மாட்டார்கள். வாய் திறந்தால் மறுநாள் தங்கள் உயிர் இருக்காது
என்பது அந்த மக்களுக்குத் தெரியும். அதனால் அந்த மக்களின் வாயை
மூடுவதற்காகவே டக்ளசுடன் மேடைகளில் காட்சியளித்திருக்கின்றார்கள்.
அப்படியிருந்தும் யாழ். பல்கலைக்கழக மாணவர்கள் சிலர் துணிந்து தங்கள்
கேள்விகளை எழுப்பி, நாடாளுமன்றக் குழுவினரை திக்குமுக்காட வைத்துள்ளனர்.
இலங்கைப் பிரச்சினையின் சாதக பாதகங்களை ஆராய்ந்து தமிழ் மக்களுக்கான
அரசியல் தீர்வை முன்வைப்பதற்கு இந்திய அரசாங்கத்துக்கு கால அவகாசம் தேவை
என்று கூறியிருக்கின்றார் இந்த நாடாளுமன்ற குழுவிற்கு தலைமை தாங்கி வந்த
டி.ஆர்.பாலு அவர்கள்.

இத்தனை காலமும் தமிழ் மக்களின் பிரச்சினை
குறித்து ஆராயமல்தான் இலங்கையின் இறையாண்மை பற்றிப்
பேசிக்கொண்டிருக்கின்றார்களோ என்ற சந்தேகத்தை இவரது பதில்
ஏற்படுத்தியிருகின்றது. முகாம்களில் உள்ள மக்களை நேரில் பார்வையிட்டு
அவர்களை மீளக்குடியேற்றுவதற்கான அழுத்தத்தை வழங்குவதற்காகவே இலங்கை
வந்துள்ளதாக தெரிவித்த இவர், பின்னர் ஒரு கேள்விக்கு பதிலளிக்கையில்,
முகாம்களில் உள்ள மக்கள் தொடர்பிலும் தமிழ் அரசியல் கட்சிகளின் நிலைப்பாடு
குறித்தும் சிறீலங்கா அரசாங்க உயர் மட்டத்துடனான சந்திப்பின்போது
கலந்துரையாடி அவர்களின் நிலைப்பாட்டினையும் அறிந்து இதுதொடர்பான முழுமையான
அறிக்கையினை நாம் மத்திய அரசாங்கத்திடம் சமர்ப்பிப்போம்.

இதுவே எமது கடமை. இதற்குமேல் எத்தகைய
முடிவினையும் இந்திய மத்திய அரசாங்கமே எடுக்க வேண்டும் என்று
தெரிவித்திருக்கின்றார். இந்த முரண்பட்ட பதில்களே இவர்களின் பயணத்தின்
நோக்கம் என்ன என்ற கேள்வியை எழுப்பிவிட்டிருக்கின்றது.”இலங்கைத்
தமிழர்களின் அவல நிலைக்குக் காரணமான மத்திய அரசின் தவறுகளை மூடி மறைக்க
உதவும் வகையில் கொங்கிரஸ் கூட்டணி நாடாளுமன்ற உறுப்பினர்களை மட்டும் அங்கு
அனுப்பியது தவறு என்பதை முதல்வர் கருணாநிதி உணர வேண்டும். தவறைத்
திருத்திக் கொள்வதற்குப் பதிலாக மேலும் மேலும் தமிழக மக்களை ஏமாற்றும்
முயற்சியில் முதல்வர் கருணாநிதி ஈடுபட்டிருப்பது கண்டனத்துக்குரியது”

என இந்தக் குழுவினரின் பயணம் குறித்து
தமிழர் தேசிய இயக்கத் தலைவர் பழ.நெடுமாறன் அவர்கள் கூறியிருக்கும்
குற்றச்சாட்டும் இங்கு சுட்டிக்காட்டத்தக்கது. எனவே, இவர்களின் பயணத்தின்
நோக்கம் குறித்த சந்தேகங்கள் தமிழ் மக்களுக்கு அதிகமாகவே
ஏற்பட்டிருக்கின்றது. அத்துடன், ‘கூரை ஏறி கோழி பிடிக்க முடியாதவன் வானம்
ஏறி வைகுண்டம் போவேன்’ என்று சவால் விட்ட கதையாக, தமிழகச் சிறைகளில்
தடுத்து வைக்கப்பட்டுள்ள இலங்கைத் தமிழ் மக்களையே இன்னும் விடுவிக்க
முடியாத இவர்களால், கொடூர இனவெறிகொண்ட சிங்கள அரச இராணுவத்திடம் இருந்து
வன்னி மக்களை விடுவிக்கப்போவதாக கூறுவது வேடிக்கையானது. ஆளாளுக்கு வந்து
பார்வையிட்டுச் செல்லும் ஒரு மிருகக்காட்சிச் சாலையாக மாறியுள்ள வன்னி
முகாம் மக்களைப் பொறுத்தவரை இவர்களும் ‘வந்தார்கள், சென்றார்கள்’
அவ்வளவுதான்.

ஆசிரியர் தலையங்கம்-ஈழமுரசு

நன்றி்:ஈழமுரசு

மரண ஓலம் கேட்கும்
வீட்டிற்கு வந்தவர்களுக்கு மாலை மரியாதைகளும், பொன்னாடைக் கௌரவிப்புகளும்
வெற்றி விழாவிற்கு வந்தார்களோ?

அப்படித்தான் தெரிகிறது....

தகவலுக்கு நன்றி அக்கா.........

அன்பு சகோதரர் கான்
நன்றி
அன்புடன்
நந்திதா

அன்பு சகோதரர் கான்
நன்றி
அன்புடன்
நந்திதா