மதுரையில் சங்கத் தமிழ் காட்சிக் கூடம்!

**சாமி** · **சாமி** Sat May 11, 2013 11:50 am

பழந்தமிழரின் பெருமைகளையும், சிறப்புகளையும் விளக்கும் வகையில் சங்கத் தமிழ்க் காட்சிக் கூடம் மதுரையில் ரூ.75 லட்சம் மதிப்பீட்டில் அமைக்கப்படும் என்று தமிழக அரசு அறிவித்துள்ளது.

இங்கு சங்கத் தமிழ்ப் பாடல்களை ஓவியங்களாகவும், காட்சிகளாகவும், அனிமேஷானாகவும், சிற்பங்களாகவும் காட்சிப்படுத்தப்படும்.

திருக்குறள் காட்சிக் கூடம்: வள்ளுவம் கூறும் வாழ்வியல் கருத்துகள், ஆளுமைப் பண்புகள், மேலாண்மை நுட்பங்கள், குடும்ப அமைப்புகள், சமுதாயம், நாடு, உலகம் சார்ந்த சிந்தனைகள் ஆகியவற்றை இளைஞர்களுக்கு கொண்டுசெல்லும் வகையில் உலகத் தமிழாராய்ச்சி நிறுவனத்தில் ஓவியக் காட்சிக் கூடம் ரூ.10 லட்சத்தில் அமைக்கப்படும்.

இளந்தமிழர் இலக்கியப் பட்டறை: இளம் தலைமுறையினரிடையே தமிழ், இலக்கிய படைப்பாற்றலை வளர்க்கும் விதத்தில் தேர்வுசெய்யப்பட்ட 100 இளைஞர்களுக்கு கவிதை, கட்டுரை, பேச்சுப் பயிற்சி சார்ந்த வல்லுநர்களைக் கொண்டு ரூ.10 லட்சம் செலவில் ஒருவார கால பயிற்சி வழங்கப்படுகிறது. இதில் கூடுதலாக 100 பேருக்கு பயிற்சி அளிக்கப்படும்.

உலகத் தமிழர் பண்பாட்டுத் தகவல் மையம்
சென்னையிலுள்ள உலகத் தமிழராய்ச்சி நிறுவனத்தில் ரூ.10 லட்சம் செலவில் உலகத் தமிழர் பண்பாட்டுத் தகவல் மையம் அமைக்கப்படும் என தமிழக அரசு அறிவித்துள்ளது.

புலம் பெயர்ந்த தமிழர்களுக்கு தமிழ்நாட்டில் இலக்கியம் சார்ந்த பண்பாட்டுப் பயணம் மேற்கொள்ளவும், தமிழ், தமிழர்கள் குறித்த தகவல்கள் அவர்களுக்கு ஒருங்கே கிடைத்திடவும் இந்த மையம் அமைக்கப்படுவதாக தமிழக அரசு அறிவித்துள்ளது.
நன்றி-தினமணி