காலை 5.30 மணிக்கு கடப்பாவில் - மனம் பாதித்த அனுபவம் !

by **அகல்** Sun 5 May 2013 - 21:39

என்னோடு வேலைபார்க்கும் நண்பர் ஒருவரின் ஊர்த் திருவிழாவிற்கு வேலூர் போய்விட்டு ஹைதராபாத்திற்கு திரும்பிக் கொண்டிருந்தோம். காலை ஐந்து மணிக்கு ஆந்திராவில் உள்ள கடப்பா மாவட்டத்தில் காடுகள் நிறைந்த நெடுஞ்சாலையில் கார் போய்க் கொண்டிருந்தது. சுமார் 5.30 மணிக்கு தேநீர் அருந்துவதற்காக தேசிய நெடுஞ்சாலை அருகே உள்ள ஒரு கடையைப் பார்த்து காரை நிறுத்தினோம்.

நெடுஞ்சாலையில் இருந்து பத்து மீட்டர் தூரமே உள்ள அந்த கடை மிகவும் சிறியது. டீ சொல்லிவிட்டு நின்று கொண்டிருக்கும் எங்களுக்கு டீ தரும்படியாக அந்தக் கடைக்காரர் தனது மகனை அதட்டிக் கூறினார். அவனும் எங்களுக்கு ப்ளாஸ்கில் உள்ள டீயை ஊற்றிக் கொடுத்தான். அவன் மனதின் ஆழத்தில் உள்ள ஏதோ ஒரு வெறுப்பு, அவன் முகத்தில் தெளிவாகத் தெரிந்தது. அது தூக்கக் கலக்கத்தினால் வந்ததல்ல என்பதையும் புரிந்துகொள்ள முடிந்தது.

டீயை வாங்கிக் கொண்டு திரும்பியபோது, 40 - 45 வயது மதிக்கத்தக்க இருவர், கடைக்கு முன்னாள் 5 அடி தூரத்தில் இரண்டு சிறிய ஸ்டூலில் அமர்ந்து கொண்டு, மூன்றாவது ஸ்டூலில் உள்ள இரண்டு பிளாஸ்டிக் க்ளாசில் ஒரு குவாட்டரை ஒருவரும், மாசவை மற்றொருவரும் திறந்து சரிபாதியாக ஊற்றினார்கள். அந்த அதிகாலைப் பொழுதில் இதைப் பார்க்க சற்று அதிர்ச்சியாக இருந்தது. இதைப் பார்த்த பிறகு, கடைக்குப் பின்புறம் ஒரு பத்து பேர் வரிசையில் நின்று கொண்டிருந்ததை அவதானிக்க முடிந்தது.

அந்தக் கடைக்காரரும் அவரது மனைவியும் பரபரப்பாக அவர்களுக்கு பாட்டில்களை வழங்கிக் கொண்டிருந்தார்கள். அது பாரோ, உரிமம் பெற்ற மதுபானக் கடையோ இல்லை. சாதாரண பெட்டிக்கடை. அவர்கள் சரக்கு வைத்திருந்தது கூட குளிபானங்கள் வைத்திருக்கும் பிரிட்ஜில் தான். இந்த நேரத்தில் இத்தனை பேர் குடிக்க வரிசையில் நிர்ப்பது கஷ்டமாகவும் கோபமாக இருந்தாலும், இந்த சூழலில் வளரும் அந்தச் சிறுவன் எப்படி வளருவான், அவனது மனநிலை எப்படி இருக்கும் என்ற எண்ணமே அதிகமாக ஓடிக்கொண்டிருந்தது.

டீயை குடித்துவிட்டு காரை எடுத்தோம். கார் ஒரு 200 மீட்டர் நகர்ந்திருக்கும். என்னோடு இருந்த நண்பர்களிடம், இதையெல்லாம் போலீஸ் கண்டிப்பர்களா இல்லையா, இப்படி அதிகாலையிலேயே இவர்கள் குடித்து அழிந்து கொண்டிருக்கிறார்களே என்று சொல்லிக்கொண்டே, கார் ஜன்னல் வழியாகப் பார்த்தேன். பெரிய கட்டிடம், அதன் உச்சியில் "காவல் நிலையம், கடப்பா மாவட்டம்" என்று எழுதப்பட்டிருந்தது.

Original Source: http://kakkaisirakinile.blogspot.in/2013/05/530.html

அன்புடன்,
அகல்

by யினியவன் Sun 5 May 2013 - 23:17

இது மாதிரி தப்பா அவசரப்பட்டு புரிஞ்சுகிட்டு அரசையும், போலீசையும் குறை சொல்லக்கூடாது அகல். புன்னகை

காவல் நிலையம், கடப்பா மாவட்டம்ன்னு தான் போர்ட் இருக்கு - யாருக்கு காவல்ன்னு அவங்க சொன்னாங்களா? அந்த கடைக்கு அவங்க காவலா இருக்காங்க - அப்படித்தான் புரிஞ்சுக்கணும். புன்னகை

by ராஜு சரவணன் Mon 6 May 2013 - 8:20

அகல் அங்கு மட்டுமில்லை இங்கும் தான், இன்று கூட திருச்சி சென்று விட்டு காலை 5.20 க்கு சென்னையை வந்தடைந்தேன்.என் வீட்டிற்க்கு வரும்போது அந்த தெருவில் உள்ள டாஸ்மாக் வாளகத்தில் ஒரு நபர் வரும் குடிமகன்களுக்கு மது பாட்டில் சப்ளை செய்து கொண்டுள்ளார்.

எப்படி நம் சிங்கார சென்னையின் வளர்ச்சி.

by **ஜாஹீதாபானு** Mon 6 May 2013 - 15:48

by balakarthik Mon 6 May 2013 - 15:58

"காவல் நிலையம், கடப்பா மாவட்டம்"

இப்படி தமிழ்லயா போட்டிருந்தது பரவாஇல்லையெ தமிழ் உண்மையிலையே செம்மொழி ஆகிடுசோ

by ராஜு சரவணன் Mon 6 May 2013 - 16:04

balakarthik wrote:
"காவல் நிலையம், கடப்பா மாவட்டம்"
இப்படி தமிழ்லயா போட்டிருந்தது பரவாஇல்லையெ தமிழ் உண்மையிலையே செம்மொழி ஆகிடுசோ

எப்படி இந்த புள்ள தின்க் பண்ணுது, நீங்கள் இங்கு இருக்க வேண்டிய ஆளே இல்லை.

by balakarthik Mon 6 May 2013 - 16:09

ராஜு சரவணன் wrote:
balakarthik wrote:
"காவல் நிலையம், கடப்பா மாவட்டம்"
இப்படி தமிழ்லயா போட்டிருந்தது பரவாஇல்லையெ தமிழ் உண்மையிலையே செம்மொழி ஆகிடுசோ

எப்படி இந்த புள்ள தின்க் பண்ணுது, நீங்கள் இங்கு இருக்க வேண்டிய ஆளே இல்லை.

இப்படி சொல்லித்தான் ஆறு மாசம் எர்வாடியிளையும் ஆறு மாசம் கீழ்பாக்கத்துளையும் ரெண்டு மாசம் குனசீலத்துளையும் வச்சிருந்தாங்க இப்பத்தான் வெளியே வந்தேன் மறுபடியுமா அனுப்பரதுத்தான் அனுப்பரிங்க அவுட் ஒப் இந்தியா அனுப்புங்க சும்மா லோ பஜட்டுல இந்தியாக்குள்லையே அனுப்பிகிட்டு