கடன் வட்டி விகிதம் குறைப்பு

புதுடெல்லி:
கடனுக்கான வட்டி விகிதத்தை கால் சதவீதம் ரிசர்வ் வங்கி குறைத்துள்ளது. சிஆர்ஆர் எனப்படும் வங்கிக்கான ரொக்க கையிருப்பு விகிதத்தில்
மாற்றம் இல்லை என்றும் ரிசவ் வங்கி அறிவித்துள்ளது.

மும்பை : வங்கிகளுக்கான குறுகியகால கடன் வட்டி விகிதத்தை 0.25 சதவீதம் குறைத்து ரிசர்வ் வங்கி உத்தரவிட்டுள்ளது. இதனால் சில்லரை கடன், கார், வீடு உள்ளிட்டவற்றுக்கான கடன் வட்டி குறைய வாய்ப்பு ஏற்பட்டுள்ளது. ரிசர்வ் வங்கியின் காலாண்டு நிதி சீராய்வு கொள்கை முடிவுகளை நேற்று வங்கி கவர்னர் சுப்பாராவ் வெளியிட்டார். இதில் கூறப்பட்டுள்ளதாவது:

வங்கிகளுக்கான குறுகியகால கடன்களுக்கு ரிசர்வ் வங்கியின் வட்டி விகிதம் (ரெப்போ) 0.25 சதவீதம் குறைக்கப்படுகிறது. அதாவது, ரிசர்வ் வங்கி 7.75 சதவீதத்தில் வங்கிகளுக்கு கடன் அளித்து வந்தது. இனி, அது 7.50 சதவீதத்தில் வழங்கப்பட உள்ளது. இது உடனடியாக அமலுக்கு வருகிறது. இதன் தொடர்ச்சியாக, வங்கிகளின் முதலீடுக்கு ரிசர்வ் வங்கி அளிக்கும் வட்டி விகிதம் 6.5 சதவீதமாகவும், ரிசர்வ் வங்கியிடம் இருந்து நீண்டகால அடிப்படையில் வங்கிகள் பெறும் கடன்களுக்கான வட்டி விகிதம் 8.5 ஆகவும் சரி செய்யப்பட்டுள்ளது.

ஆனால், ரிசர்வ் வங்கியிடம் இருக்கும் வங்கிகளின் ரொக்க கையிருப்பு விகிதம்(சிஆர்ஆர்) 4 சதவீதம் என்பதில் எந்த மாற்றமும் இல்லை. தற்போதுள்ள நிதி நிலைமையை கருத்தில் கொண்டு வட்டி விகிதம் குறைக்கப்பட்டுள்ளதாக ரிசர்வ் வங்கி வெளியிட்டுள்ள செய்திக்குறிப்பில் தெரிவிக்கப்பட்டுள்ளது. வங்கிகளுக்கான குறுகியகால கடன் வட்டி விகிதம் குறைக்கப்பட்டுள்ளதால், வங்கிகளும் வாடிக்கையாளர்களுக்கு கடன் வட்டியை குறைக்கலாம் என எதிர்பார்க்கப்படுகிறது. ஸ்டேட் பாங்க் இதை ஏற்கனவே அறிவித்திருக்கிறது. சில வங்கிகள், உடனடியாக வட்டியை குறைக்கும் வாய்ப்பில்லை என தெரிவித்துள்ளன.

ஏற்றுமதிக்கு தனிப்பிரிவு தேவை

திருப்பூர்: திருப்பூர் ஏற்றுமதியாளர் சங்க தலைவர் சக்திவேல், மத்திய நிதியமைச்சர் ப.சிதம்பரத்துக்கு அனுப்பி உள்ள கடிதத்தில் கூறியுள்ளதாவது: கடந்த 2 மாதங்களாக ஏற்றுமதி வர்த்தகம் குறிப்பிட்ட அளவு வளர்ச்சி பெற்று இருக்கிறது. வங்கிகளில் ஏற்றுமதி கடனுக்கான வட்டி விகிதம் அதிகரிக்கும் போது, ஏற்றுமதியாளர்கள் பாதிக்கப்படுகிறார்கள். இவ்வாறு வங்கி வட்டி விகிதங்கள் ஏற்ற இறக்கம் காரணமாக உலக வர்த்தகத்தில் நாம் போட்டி நாடுகளுடன் போட்டியிடுவது கடினம்.

எனவே, ரிசர்வ் வங்கி, நிதி கொள்கையில் ஏற்றுமதி வர்த்தகத்துக்கு என்று தனியாக ஒரு பிரிவை தொடங்க வேண்டும். ரிசர்வ் வங்கியின் 2013,14ம் ஆண்டின் இறுதியாண்டுக்கான நிதி கொள்கை அடுத்த மாதம் 3ம் தேதி முதல் அமலுக்கு வர உள்ளது. எனவே, ஏற்றுமதி வர்த்தகத்துக்கு என்று வங்கிகளில் வட்டி வகிதத்தை 7.5 சதவீதமாக நிர்ணயிப்பதுடன் தனி பிரிவையும் உருவாக்க வேண்டும். இவ்வாறு சக்திவேல் கூறியுள்ளார்.