திருச்சி சிறையில் காந்திய சிந்தனை புத்தகம் படிக்கிறார் ராமதாஸ்

by DERAR BABU Thu May 02, 2013 12:51 pm

திருச்சி: திருச்சி மத்திய சிறையில் அடைக்கப்பட்டுள்ள பா.ம.க., நிறுவனர் ராமதாஸ் அங்கு காந்திய சிந்தனை புத்தகத்தை படித்து பொழுதை போக்குகிறார்.

மரக்காணத்தில் நடந்த கலவரத்தைக் கண்டித்து விழுப்புரத்தில் அனுமதியின்றி ஆர்ப்பாட்டம் நடத்திய பா.ம.க. நிறுவனர் ராமதாஸ் உள்ளிட்ட 531 பேர் கைது செய்யப்பட்டனர். இதையடுத்து மாஜிஸ்திரேட் முன்பாக ஆஜர்படுத்தப்பட்ட ராமதாசை, திருச்சி சிறையில் அடைக்க மாஜிஸ்திரேட் உத்தரவிட்டார். இதைத் தொடர்ந்து நேற்று காலை திருச்சி மத்திய சிறைக்கு அழைத்து வரப்பட்ட ராமதாஸ் சிறையில் அடைக்கப்பட்டார். அங்கு அவருக்கு மருத்துவ பரிசோதனை நடத்தப்பட்டது. ராமதாசுக்கு வெளியில் இருந்து உணவு கொண்டு செல்ல சிறை நிர்வாகம் அனுமதியளிக்காததால், காலையில் சப்பாத்தி குருமாவும், மதியம் சாம்பார் மற்றும் தயிர் சாதமும் வழங்கப்பட்டது. தற்போது திருச்சியில் கடுமையான வெயில் அடித்து வருவதாலும், மின்சாரம் அவ்வப்போது தடைபடுவதாலும் சிறையில் புழுக்கத்தில் ராமதாஸ் அவதிப்பட்டு வருகிறார். மேலும், காந்திய சிந்தனை புத்தகத்தை படித்து பொழுதைப் போக்கி வருகிறார்.

தினமலர்