எனது குறுங்கவிதைகளில் சில... பாகம் 14

by **அகல்** Wed 24 Apr 2013 - 14:16

தெரியாத காரணம்

தெருவோர முனையில்,
பனித்துளிகளில்
குளித்துக் கொண்டிருக்கும்
ஒற்றை மின்சார விளக்கோடு
என்ன தகராறோ

இரவு முழுதும்
மல்லுக் கட்டியே
மாய்ந்து போனது
தட்டாரப்பூச்சி !

சொர்க்கம்

தாயின் கருவறையை
பார்த்தபின்பு
ஒரு முடிவுரைக்கு
வந்துவிட்டேன்

இருள் நிறைந்து இருப்பது
நரகமட்டுமல்ல
சொர்கமும்தான் !

இயற்கையின் பரிசு

ஏதோ பரிசளிப்பதாகச்
சொன்னாய்

பூங்காவின் ஓரத்தில்
ஒற்றை மரத்தடியே
உனக்காக காத்திருந்து
ஏமாற்றத்துடன்
எழும் நொடிப்பொழுதில்

உச்சந்தலையில்
விழுந்து
உள்ளங்கையை
வருடியது ஒரு
வெள்ளைப்பூ

ஏமாற்றவில்லை இயற்கை !

மிகையல்ல

உன் அழகை
உள்ளது உள்ளபடியே
எழுதினாலும்

அது உருவகமாகவே
தெரிகிறது
ஒரு சிலருக்கு !

கவிஞனின் காதல்

கவிதை எழுதியே
கழிகிறதென் காலம்
காதலியை அறியாமல் !

படுகொலை

முள்ளி வாய்க்காலில்
பூத்த முல்லைக்கு
கொல்லி போட்டது

பாஸ்பரஸ் குண்டுகளில்
வெடித்துச் சிதறிய
பிள்ளையின் சதையும்
பீரங்கிடம் விடுதலைபெற்ற
பிரமாண்ட தோட்டாக்களும் !

காதலி

அவள் என் முன்னே வந்தால்...

பசி மறந்து போகிறது
மனதில் ஆயிரம்
பட்டாம் பூச்சிகள் பறக்கிறது
உலகம் பிரகாசமாகிறது
சூரியன் நிலவாகிறது
கோடைகாலமும் குளிர்கிறது
கூவம் காவிரியாய்த் தெரிகிறது
என்றெல்லாம் பொய்
சொல்லத் தெரியவில்லை...

ஆனால் அவள்
என் முன்னே வந்தால்...

ஏதோ செய்கிறது !

எதார்த்தம்

கிரிக்கெட் மைதானம்
ஒளிவீசிக் கொண்டிருக்கையில்
மின்மினிப் பூச்சிகள்
விளக்கேற்றிக் கொண்டிருக்கிறது
கிராமத்துக் குடிசையில் !

குமரி

கொல்லைப்புறத்தில்
குடியமர்த்தப்பட்ட
அழகான ராட்சசி
அரளிப்பூ !

Original Source: http://kakkaisirakinile.blogspot.in/2013/04/14.html

அன்புடன்,
அகல்

by பாலாஜி Wed 24 Apr 2013 - 14:33

அனைத்தும் மிக சிறப்பு சூப்பருங்க

by **Ahanya** Wed 24 Apr 2013 - 14:41

அனைத்தும் அருமை அகல் அண்ணா.... அன்பு மலர்

by யினியவன் Wed 24 Apr 2013 - 14:44

சிறப்பு பதிவாளர் அகல் அண்ணே - கவிதை சூப்பரன்னே

by **அகல்** Wed 24 Apr 2013 - 14:49

யினியவன் wrote:சிறப்பு பதிவாளர் அகல் அண்ணே - கவிதை சூப்பரன்னே

நன்றிகள் அண்ணே... சிறப்புப் பதிவாளரா ? இது எப்பண்ணே நடந்தது (கொஞ்சநாளா ஈகரைப் பக்கம் வரல)... நானும் கவிதையா எழுதி போட்டுட்டே இருக்கேன் சிறப்பு கவிஞர் எல்லாம் தரமாட்டிங்களா ? ஹ ஹா ஹா ஹா ஹா புன்னகை

...

by **அகல்** Wed 24 Apr 2013 - 14:49

பாலாஜி wrote:அனைத்தும் மிக சிறப்பு

மிக்க நன்றிகள் பாலாஜி அண்ணே...

by **அகல்** Wed 24 Apr 2013 - 14:50

Ahanya wrote:அனைத்தும் அருமை அகல் அண்ணா....

நன்றிகள் அகன்யா...

by யினியவன் Wed 24 Apr 2013 - 14:51

அகல் wrote:நன்றிகள் அண்ணே... சிறப்புப் பதிவாளரா ? இது எப்பண்ணே நடந்தது (கொஞ்சநாளா ஈகரைப் பக்கம் வரல)... நானும் கவிதையா எழுதி போட்டுட்டே இருக்கேன் சிறப்பு கவிஞர் எல்லாம் தரமாட்டிங்களா ? ஹ ஹா ஹா ஹா ஹா ...

கவிதை, கட்டுரை எழுதும் உங்களை கவிதை வட்டத்தில் அடைக்க விரும்பல, அதான் கட்டுரை சதுரம், முக்கோணம் இவற்றை கருத்தில் கொண்டு இப்படி செஞ்சுட்டோம் அகல் புன்னகை