அரசுக்கு அருகில் வேம்பு!

**சாமி** · **சாமி** Fri 19 Apr 2013 - 0:08

ராமநாதபுரம் மன்னர் பாஸ்கர சேதுபதியின் அவைக்களப் புலவராகப் புகழ் பெற்று விளங்கிய சிலேடைப்புலி "வேம்பு'. அவர் மன்னரைக் காண அவைக்கு வந்தார். அப்போது, மன்னருக்கு முன்பு இருந்த இருக்கைகளில் புலவர்களும் மற்றையோரும் அமர்ந்திருந்தனர். அமர்வதற்கு இருக்கை ஏதும் இல்லாத நிலையில், புலவர் சிலேடைப் புலி சில விநாடிகள் நிற்க நேரிட்டது. வேம்பு நிற்பதைக் கண்ட புலவர் ஒருவர் அவரைப் பார்த்து ""வேம்பு நிற்கத்தானே செய்யும், அது அமர்வது இல்லையே'' என்ற பொருளில், ""வேம்பு நிற்பதுதானே முறை'' எனக் கிண்டலாகக் கூறினார்.

உடனே மன்னர் தனது அருகில் இருக்கை ஒன்றைக் கொண்டுவரப் பணித்து, அதில் வேம்புவை அமரச் செய்தார். தன்னிடம் "நிற்பதுதானே முறை' எனக் கிண்டலாகக் கூறிய புலவரிடம், ""வேம்பு அரசுக்கு அருகில் இருக்கும்'' என்று பதில் மொழி நவின்றார். கோயில்களில் அரசமரம் அருகில் வேம்பு (வேப்ப) மரத்தையும் வைப்பர் என்பதையும் அரசும் வேம்பும் ஒன்றாகவே இருக்கும் என்பதையும் அப்புலவருக்கு உணர்த்தி, "அரசன் இருக்கும் இடத்தல் வேம்பு இருப்பார்' என்பதைச் சிலேடையில் உணர்த்தினார்.

(நன்றி - தினமணி)

s.m.aanand · s.m.aanand Fri 19 Apr 2013 - 7:38

அரசும் வேம்பும் அருகினில் இருப்பினும்,இரண்டு மரங்களிலும் சில புல்லுருவிகளும் இருக்கும்.(காக்கை குருவிகளின் எச்சங்களில் இந்தப் புல்லுருவி விதைகள் மரங்களில் ஒட்டிக்கொண்டு மரங்களுக்குக் கிடைக்கும் சத்துப் பொருள்களை உறிஞ்சி வாழும் ஒட்டுண்ணித் தாவரமாகும்)