அம்மாவுக்கு ஆபரேஷன்

தங்கையிடம் இருந்து வந்த கடிதத்தை பார்த்த கார்த்திக்கு அதிர்ச்சியாக இருந்தது. அவனது அம்மாவுக்கு ஒரு வாரத்திற்குள்வயிற்றில் ஆபரேஷன் செய்தாக வேண்டும் என்றும், அதற்காக 20 ஆயிரம் அனுப்பி வை என்றும் எழுதியிருந்தாள்.

நாளை தான் சம்பள நாள். அதனால் 20 ஆயிரம் அம்மாவின் ஆபரேஷனுக்கு அனுப்பி வைப்பதில் ஒன்றும் பிரச்சினை இல்லை. ஆனால் இவன் நேற்று தான் தன் காதலி பிரியாவுக்கு தங்கச் சங்கிலி வாங்கி தருவதாக சொல்லியிருந்தான்.

இப்போது அதுதான் அவனுக்கு குழப்பம். அம்மாவுக்கு பணத்தை அனுப்புவதா! அல்லது ஏற்கனவே வாக்களித்தபடி காதலிக்கு தங்கச் சங்கிலி வாங்கி கொடுப்பதா... குழம்பினான். இறுதியாக காதல் கண்ணை மறைக்க, காதலிக்கு தங்கச்சங்கிலி வாங்கி கொடுக்க முடிவு செய்தான்.

அடுத்த நாள்காலையில் ஆபீஸ் சென்றான். வாங்கிய சம்பளத்தை பர்சில் வைத்துக் கொண்டு நேராக போஸ்ட் ஆபீஸ் சென்றான். பர்சில் இருந்த சில்லறையை எடுத்து கடிதம் ஒன்றை வாங்கியவன், அம்மாவுக்கு பணம் அனுப்ப முடியவில்லை என்பதை எப்படி எழுதினால் நம்பும்படி இருக்கும் என்று யோசித்தான். அப்பொழுது சில்லறைக்காக எடுத்த தன் பர்சை மேஜை மீது வைத்ததை மறந்து விட்டான்.

கொஞ்சம் யோசித்து எழுதத் தொடங்கியபோது தான் பேண்ட் பாக்கெட்டில் பர்ஸ் இல்லாத உறுத்தல் தெரிந்தது.

அதேநேரம் பர்சை மேஜையில் வைத்தது நினைவுக்கு வர, வைத்த இடத்தில் பார்த்தான். அதிர்ந்தான். அதற்குள் பர்ஸ் மாயமாகி இருந்தது. பணம் பிதுங்கி வழிகிற ஒரு பர்ஸ் மேஜையில் இருந்தால் ஒரு திருடனின் பார்வையில் கூடவா அது பட்டிருக்காது.? எவனோ பார்த்ததும் லவட்டிக் கொண்டு போயிருக்கக் கூடும்.

அம்மாவுக்கு பணம் அனுப்ப வேண்டாம் என்று முடிவு செய்ததற்கு இவ்வளவு பெரிய தண்டனையா? வெறுத்துப் போனான். இப்போது அம்மாவிற்கும் அனுப்ப முடியாமல், காதலிக்கும் வாங்கிக் கொடுக்க முடியாமல் போனதே!

விஷயத்தை காதலியிடம் சொன்னபோது அவள் நம்பவில்லை. தன்னை ஏமாற்றத்தான் பணம் திருட்டு போனதாக நாடகமாடுகிறான் என்றே எண்ணினாள். அதையே சொல்லியும் காட்டினாள்.

இதனால் அடுத்து வந்த நாட்களில் அவனிடம் பாராமுகம் காட்டினாள்.

அவன் செல்போனில் பேசமுயன்றபோதும் வேண்டு மென்றே கட் பண்ணினாள்.

ஒரு வாரம் கழிந்த நிலையில் தங்கையிடம் இருந்து மீண்டும் ஒரு கடிதம் வந்தது. பணம் வந்து சேர்ந்து ஆபரேஷன் நல்லபடியாக நடந்து முடிந்தது என்று தங்கை எழுதி இருந்ததை படித்தவனுக்கு இப்போது மறுபடியும் அதிர்ச்சி.

அடுத்த நாளே அந்த அதிர்ச்சிக்கான விடை கிடைத்தது, இன்னொரு கடிதம் மூலம். முகவரி இல்லாமல் வந்திருந்த அந்த கடிதம் இப்படி ஆரம்பித்திருந்தது.

சார் நான் தான் உங்கள்பர்சை திருடியவன். தயவுசெய்து மன்னித்து விடுங்கள். பர்சில் உங்க அம்மா ஆபரேஷனுக்கு பணம் தேவை என்று உங்களுக்கு எழுதி இருந்த கடிதத்தை பார்த்தேன். உடனே நானே அந்த பணத்தை உங்க அம்மாவிற்கு அனுப்பி வைத்து விட்டேன். என் அம்மாவுக்கு இதேமாதிரியான ஒரு இக்கட்டான நேரத்தில் கேட்ட பணத்தை அனுப்ப முடியாமல் போய்த்தான் அன்பான அம்மாவை இழந்தேன்.

அந்த வேதனை இன்னும் என்னை விட்டுப் போகவில்லை. உங்க அம்மாவுக்கும் அதே மாதிரியான நிலை ஏற்பட்டு உங்களையும் தாயில்லாத பிள்ளையாக ஆக்கிட நான் விரும்பவில்லை .என்றாலும் திருடியதற்காக மன்னித்து விடுங்கள்.

கார்த்திக்கு எல்லாம் புரிந்தது. என்னை மன்னிச்சிடும்மா...நீ நல்லாயிருக்கணும்னு ஒரு திருடனுக்குத் தோணியது எனக்குத் தோணலையே...

மானசீகமாக அவன் தன் அம்மாவிடம் மன்னிப்பு வேண்டிக்கொண்டிருந்த நேரத்தில் செல்போன் ரிங்கியது. எடுத்துப்பார்த்தான். காதலி பிரியாதான் அவனிடம் பேச முயன்று கொண்டிருந்தாள்.

அவன் போனை எடுக்கவில்லை.

இந்த மாதிரி ரெண்டு சீன்ல திருந்தற ஜென்மமா மனுஷன் இருந்தா எவ்ளோ நல்லா இருக்கும்ன்னு தோன வைக்குது இந்த கதை.

நல்ல கதை

கதை நன்று

பானு நலமா?

kannammak62 wrote:பானு நலமா?

நலம் கண்ணம்மா நீங்க நலமா