களங்கம்

by **சிவா** Wed Apr 17, 2013 1:31 am

ஷேக்ஸ்பியரை அறியாதவர்கள் யாரும் இருக்கமாட்டார்கள். அவரைப் பற்றி சமீபத்தில் ஒரு செய்தி வெளியாகியுள்ளது. ஐரோப்பா கடும் பஞ்சத்தில் துடித்துக் கொண்டு இருந்த போது, பொருட்களைப் பதுக்கி வைத்து கொள்ளை லாபம் பார்த்த கொடூர வியாபாரியாக இருந்திருக்கிறார். அதோடு வரி ஏய்ப்புக்காக தண்டனையும் அனுபவிக்கிறார் என்று சொல்கிறது அந்தச் செய்தி.

அவரைப் பற்றி படிக்காதவர், ஓரினச் சேர்க்கையாளர், கவிதையைத் திருடியவர் என்ற விமர்சனம் வந்தது. அப்போதெல்லாம் அவருடைய புகழுக்கு பங்கம் வந்ததில்லை. “கொரியலேனஸ்’ என்ற நாடகத்தில் அவர் உணவுப் பஞ்சத்தினால் ஏற்படும் கலவரம் பற்றி எழுதியிருப்பார். அது 1607ல் உணவுக்காக நடந்த கலவரத்தைச் சொல்வது போல இருக்கிறது. ஒருவேளை தான் செய்த கொடூரத்தை மறைக்க எழுதியிருப்பாரோ? தன்னுடைய இரண்டு மகள்களுக்கு தேவையான அளவுக்கு சொத்துச் சேர்த்த பின்னர் 1613ம் ஆண்டு அவர் எழுதுவதை நிறுத்திவிட்டதாக ஆய்வாளர்கள் சொல்கிறார்கள்.

கடுகு உள்ளத்தோடு தன் பெண்டு, பிள்ளை என்று வாழ்ந்தால் கடைசியில் களங்கம் பெற்ற மனிதராவார் என்பதற்கு ஷேக்ஸ்பியர் மட்டுமல்ல, இன்னும் பலரையும் உதாரணமாகச் சொல்ல முடியும். இதற்கு வாழும் உதாரணாக இருப்பவர் கேரள காங்கிரஸ்(பி) கட்சியின் தலைவர் பாலகிருஷ்ணன். அவரது மகனை அமைச்சராக்கி அழகு பார்த்தார். அவரோ கள்ளக்காதலால் பதவியை இழந்து தந்தைக்கு தீராத களங்கத்தை ஏற்படத்திவிட்டார்.

அரசியலில் இன்னும் பலர் இதுபோல் தன் ரத்தம் என்பதற்காக பெரிய பதவிகளில் உட்கார வைக்கிறார்கள். அப்படிப் பட்டவர்கள், முன்னே சொன்ன இருவரும் பாடங்கள் என்பதை உணர்ந்து, தங்களை மாற்றிக் கொள்ள வேண்டும்.

குமுதம்