வீடு கட்டுபவர்களுக்கான புதிய பசுமை விதிகள்

புதுடெல்லி, ஏப்.16-

மாஸ்டர் பிளான் 2021 என்னும் திட்டத்தின் கீழ் டெல்லி மாநகர வளர்ச்சி ஆணையம், நிலச் சொந்தக்காரர்கள் கட்டாயமாகக் கடைப்பிடிக்க வேண்டிய சில பசுமைத் திட்டங்களை நடைமுறைப்படுத்த இருக்கிறது.

3000 சதுர அடி ஒருவருக்கு இருக்குமேயானால் அதில் கட்டிடம் கட்டும்போது செயல்படுத்த வேண்டிய விதிமுறைகள் குறித்து சில வாரங்களுக்கு முன் நடைபெற்ற ஆலோசனைக் கூட்டத்தில் தீர்மானிக்கப்பட்டது.

தண்ணீரை வீணாக்காமல் மறுசுழற்சி மூலம் பயன்படுத்தக் கூடிய முறைகளுக்கு, இதில் முக்கியத்துவம் கொடுக்கப்பட்டுள்ளது. மழைநீர் சேமிப்பு, நிலத்தடி நீரைப் பெருக்குதல், நீர்வளத்தைப் பாதுகாத்தல் போன்ற திட்டங்களைத் தங்கள் நிலத்தில் செயல்படுத்துவோரை ஊக்குவிக்கும் பொருட்டு 5 சதவிகித ஊக்கத்தொகை அல்லது அதிக அளவு நிலப்பரப்பு போன்ற இலவசங்களையும் அளிக்கும் எண்ணத்தில் மாநகராட்சி நிர்வாகம் உள்ளது. நிலத்தடி நீர் சேமிப்பு தொட்டிகள், மொட்டை மாடித் தோட்டங்கள் மற்றும் மக்கும், மக்காத குப்பைகளுக்கான தனி ஏற்பாடுகள் போன்றவையும் இவற்றில் அடங்கும்.

இதுபோன்ற ஏற்பாடுகள் வணிக உபயோகத்திற்கான இடங்களிலும் கடைப்பிடிக்கப்படவேண்டிய அவசியத்தை புதிய விதிமுறைகள் கூறுகின்றன. 300 சதுர மீட்டர் பரப்பளவு கொண்ட மொட்டை மாடிகளில், சோலார் சக்தியும் பயன்படத்தக்க விதத்தில், மின்சக்தி சாதனங்கள் அமைக்கப்படும். இதற்கென அமைக்கப்பட்டுள்ள பசுமை ஆணையத்தினால் ஆய்வு செய்யப்பட்டு அவர்களுக்கு ஊக்கத்தொகையும் வழங்கப்படும் என்ற தகவல்கள் வெளியாகியுள்ளன.

மாலைமலர்