போதைப்பொருள் சுமக்கும் “கழுதைகளாக” இந்திய நாட்டவர்கள்

**சிவா** · **சிவா** Tue Apr 16, 2013 6:16 pm

நாட்டிற்குள் போதைப் பொருள் கடத்துவதற்கு, இந்திய நாட்டவர்கள் அதிகளவில் போதை பொதி சுமக்கும் “கழுதைகளாகப்” பயன்படுத்தப்படுவது தெரிய வந்துள்ளது.

முன்பெல்லாம் ஈரானியர்களும், நைஜீரியர்களும் மட்டுமே இந்த சட்டவிரோத செயலில் ஈடுபட்டு வந்தனர்.

எனினும், தற்போது ஈரானியர்களும், நைஜீரியர்களும் தங்களின் போதைப் பொருள் கடத்தல் நடவடிக்கைக்காக இந்திய நாட்டவர்களைப் பயன்படுத்துவதாக போலீஸ் நம்புகிறது.

இவ்வாண்டு தொடக்கம், இந்த புதிய போக்கு அதிகரித்து வருவதாக போதைப் பொருள் தடுப்பு ஆணைய இயக்குனர் டத்தோ நூர் ரஷிட் இப்ராஹிம் தெரிவித்தார்.

“2011 மற்றும் 2012-ஆம் ஆண்டுகளில் ஈரானியர்களும் நைஜீரியர்களுமே அதிகளவில் போதைப் பொருள் கடத்தல்களில் ஈடுபட்டு வந்தனர். ஆனால், அவர்களின் ஈடுபாடு திடீரென கணிசமாக குறைந்துவிட்டது”

“இந்திய நாட்டவர்கள் போதைப் பொருளை மலேசியாவுக்குள் கடத்துவது கணிசமாக அதிகரித்துள்ளது. நைஜீரிய போதைப் பொருள் கடத்தல் கும்பல் இந்திய நாட்டவர்களை பொதி சுமக்கும் கழுதைகளாக பயன்படுத்துவதாக நாங்கள் சந்தேகிக்கிறோம்”.

எனினும், ஈரானியர்கள் இதுபோன்ற சட்டவிரோத நடவடிக்கைகளுக்கு மற்ற நாட்டவர்களை பயன்படுத்துவது இல்லை. மாறாக, நைஜீரியர்கள் மற்ற நாட்டினரோடு பழகுவதற்குத் தயக்கம் காட்டுவதில்லை.

இவ்விவகாரம் தற்போதைக்கு மர்மமாகவே உள்ளதாக டத்தோ நூர் ரஷிட் தெரிவித்தார்.

இந்தியர்கள் பெரும்பாலும் மெதாபெதாமின் போதைப் பொருளையே கடத்துகின்றனர். அதே வேளையில் பாகிஸ்தான் நாட்டவர்கள் ஹெரோயின் வகை போதை பொருளைக் கடத்துவதில் வல்லவர்கள். ஆனால், நைஜீரிய கடத்தல் கும்பல் அனைத்து வகை போதைப் பொருளையும் கடத்துவதில் கைவசம் கண்டவர்கள் என்றார் அவர்.

நைஜீரியர்களின் போதைப் பொருள் கடத்துவதில் பிரபலம் என்பதால் உலக நாடுகள் அவர்களை அணுக்கமாக கண்காணித்து வருகின்றன. எனவே, அவர்கள் கைது செய்யப்படுவதிலிருந்து தப்புவதற்காக பிற நாட்டவர்களை, குறிப்பாக பெண்களை போதைப் பொருள் கழுதைகளாகப் பயன்படுத்துகின்றனர்.

கடந்த ஜனவரி முதல் பிப்ரவரி வரை நாட்டில் போதைப் பொருள் வைத்திருந்ததற்காக 32 பேர் கைது செய்யப்பட்டுள்ளனர்.

இதனிடையே, உள்நாட்டு தகவல் ஊடகங்கள் மேற்கொண்ட பல்வேறு விழிப்புணர்வு திட்டம் மூலம் போதைப் பொருள் சுமக்கும் கழுதைகளாகப் பயன்படுத்தப்பட்டு வெளிநாட்டு சிறைகளில் அடைக்கப்பட்டுள்ள மலேசியர்களின் எண்ணிக்கை 40%-ஆகக் குறைந்துள்ளது என்பது குறிப்பிடத்தக்கது.

வணக்கம் மலேசியா.காம்