சங்ககாலம் முதல் இன்றுவரை இலக்கிய வளர்ச்சி - புதுவை வயி. நாராயணசாமி

நிலந்தரு திரவிற் பாண்டியன் அவையம்' என்று தொல்காப்பியப் பாயிரமும்

'மாபாரதம் தமிழ்ப்படுத்தும்
மதுராபுரிச் சங்கம் வைத்தும்'

என்று சின்னமனூர் செப்பேடும் குறிக்கும் தலை, இடை, கடைச் சங்கங்கள் பற்றி இறையனார் களவியலுரை விரிவாகக் கூறுகிறது.

கிருத்துவுக்கு முன்னதாகப் பத்தாயிரம் ஆண்டுகள் அளவில் காய்சினவழுதி முதலாக, கடைச்சங்கத்து இறுதியிலிருந்த உக்கிரப்பெருவழுதி ஈறாக நூற்றுத்தொண்ணூற்றேழு அரசர்கள் இந்த மூன்று சங்கங்களையும் போற்றிப் புரந்தனர். இந்த நூற்றுத் தொண்ணூற்றேழு பாண்டிய மன்னர்களிலே பதினைந்துபேர் கவியரங்கேறிய பெரும் புலமையாளராகவும் திகழ்ந்தனர்.

மூன்று சங்கங்களிலும் அறுநூற்றுஐம்பத்தேழு புலவர்கள் உறுப்பினராக இருந்தனர். எண்ணாயிரத்து ஐந்நூற்றுத் தொண்ணூற்றெட்டுப் புலவர்கள் தங்கள் செய்யுட்களையும் அரங்கேற்றினர். மூன்று சங்கங்களும் ஒன்பதாயிரத்துத் தொள்ளாயிரத்துத் தொண்ணூறு ஆண்டுகள், தென்மதுரை - கபாடபுரம் - மதுரை ஆகிய இடங்களில் நிலைபெற்றுத் தமிழை ஆராய்ந்தன. மூன்று சங்கங்களிலும் தமிழை ஆராய்ந்த புலவர்கள், அகத்தியம், தொல்காப்பியம், பரிபாடல், முதுநாரை, முதுகுருகு, களரியா விரை, கலி, குருகு, வெண்டாளி, வியாழமாலை அகவல், மாபுராணம், பூதபுராணம், இசை நுணுக்கம், நெடுந்தொகை, குறுந்தொகை, நற்றிணை, புறநானூறு, ஐங்குருநூறு, பதிற்றுப்பத்து, கலி, பரிபாடல், கூத்து, வரி, சிற்றிசை, பேரிசை என்று இத்தொடக்கத்தனவாக, இயல், இசை, நாடகம் என்னும் முவ்வகுப்புகளைச் சிறப்பாகவுடைய முத்தமிழ் நூல்கள் எத்துணையோ படைத்தனர்.

மூன்று சங்கங்களும் 9990 ஆண்டுகள் 199 அரசர்களால் புரக்கப்பெற்றுள்ளன. ஓர் அரசருக்குரிய சராசரி ஆட்சிக் காலம் 50 ஆண்டுகளாகும். மூன்று சங்கங்களிலும் தலைமை ஏற்றுத் தமிழாராய்ந்தவர்களின் தொகை 657 ஆகும். எனவே ஒவ்வொரு தலைமைப் புலவர்க்கும் உரிய காலம் சராசரியாக 15 ஆண்டுகளாகும். ஓர் அரசர் 50 ஆண்டுகள் ஆட்சி செய்வதும், ஒரு புலவர் 15 ஆண்டுகள் சங்கத் தலைமை ஏற்பதும் நம்ப முடியாத செய்திகளோ புனைந்துரைகளோ அல்ல என்று தெளிவு. மேலைநாட்டு வரலாற்றில் இத்தகைய வியக்கத்தக்க பத்தாயிரமாண்டுச் சங்க வரலாறு இல்லை.

காலத்துக்கும் கடலுக்கும் தப்பி இப்பொழுது நமக்குக் கிடைப்பன, இடைச்சங்க நூல் தொல்காப்பியமும், கடைச்சங்க நூல்காளகிய பத்துப்பாட்டும், எட்டுத்தொகையும், திருக்குறளும், சிலம்பும், மேகலையும் சங்க மருவியகால நூல்களாகிய பதினெண்கீழ்க்கணக்கும் ஆகும்.

- நன்றி : திருப்பீடம் மார்ச் - 2013

பத்தாயிரமாண்டு சங்க வரலாறு வியக்க வைக்கிறது - நல்ல பகிர்வு பாலா