முருகனின் வாகனம்!

**சாமி** · **சாமி** Fri Apr 12, 2013 1:14 pm

முருகனின் வாகனம் மயில். ஆனால், முருகனுக்குரிய மந்திர நூலான கந்தரனு பூதியில் முருகனின் வாகனம் "ஆடும் பரி' என அருணகிரிநாதர் பாடியுள்ளார். "ஆடும்' என்பது நடனம். "பரி' என்றால் "குதிரை'. குதிரை நடனமாடுவதில்லை. அதனால், மயிலையே "ஆடும் பரி' என அருணகிரியார் குறிப்பிடுகிறார்.

வேறொரு பாடலில் மயிலை "துரகம்' என்ற சொல்லால் குறிப்பிடுகிறார். அதற்கும் "குதிரை' என்றே பொருள்.

கன்னியாகுமரி மாவட்டம் குமாரகோயில், மருங்கூர் கோயில்களில் உள்ள முருகன் திருவிழாக் காலங்களில் குதிரையில் பவனி வருகிறார். கடலூர் மாவட்டம் பரங்கிப்பேட்டை முத்துக்குமாரர் கோயில், திருச்சி வயலூர் முருகன் கோயில்களில் முருகப்பெருமான் ஆடு வாகனத்தில் பவனி வருகிறார். சில கோயில்களில் யானை வாகனம் உண்டு.

//////////////////////////////////////////\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

சங்க இலக்கியத்தில் பரிபாடல் என்ற இலக்கியம் உண்டு. அதில் முருகனைப் பற்றிய பாடலுக்கு "செவ்வேள்' என்று பெயர். அதைப் பாடிய புலவர் கடுவன் இளவெயினனார்.

முருகனிடம், "" ஐயா! உன்னிடம் பொன், பொருள், சுகபோகம் இவற்றை யாசிக்கவில்லை. உன் மீது நீங்காத அன்பு, அருள், அறம் ஆகியவற்றை வேண்டுகிறேன்,'' என்று கேட்கிறார். முருகன் தண்டாயுதபாணியாக கோவணத்துடன் நிற்பது போல, ஆசையில்லா பெருவாழ்வை வேண்டுகிறார். இப்படியும் பக்தர்கள் இருக்கத்தான் செய்கிறார்கள்.