தினந்தந்தி தலையங்கம்...​தண்ணீரை சேமிக்க இதுதான் வழி!

நீர்இன்று அமையாது உலகெனின் யார்யார்க்கும், வான்இன்று அமையாது ஒழுக்கு என்று பாடினார் வள்ளுவர் பெருந்தகை. அதாவது, எந்த வகையில் உயர்ந்தவரும், இந்த உலகில்நீர் இல்லாமல் வாழ முடியாது. அதுபோல, மழை பெய்யவில்லை என்றால், தண்ணீரில் இடையராத ஓட்டமும், இல்லையென்றும் ஆகிவிடும் என்றார். இது, ஒரு முக்கால உண்மையாகும். அதைத்தான் தமிழ்நாடு இப்போது அனுபவித்துக்கொண்டிருக்கிறது. தொடர்ந்து மழை பொய்த்ததால், நமது ஏரிகளில், குளங்களில், ஆறுகளில், ஏன் கிணறுகளில் கூட தண்ணீர் வற்றிப்போய்விட்டது. காவிரியில் கர்நாடகம் தண்ணீர் திறந்துவிடாததால், காவிரி டெல்டா பாசன பகுதி களும் பாலைவனம்போல் ஆகிவிட்டது. தமிழ்நாட்டை பொருத்தமட்டில், நமக்கு நீர்வளம் மிகமிக குறைவு ஆகும். பல இடங்களில் விவசாயி வானத்தை பார்த்துக்கொண்டுதான் ஏக்கத்தோடு நிற்கிறான். அதனால்தான் பண்டைய காலங்களில் மழைநீரை சேமிக்கும் வகையில், ஏராளமான ஏரிகள், குளங்கள், திருக்குளங்கள் வெட்டப்பட்டு, அதற்கான வரத்து கால்வாய்களும் அமைக்கப்பட்டுள்ளன. நிலத்தடி நீரை பெரிதும் நம்புவதால், கிணறுகளும் ஏராளமாக இருக்கின்றன.
-
தற்போதுள்ள நிலைமையில், தமிழ்நாட்டின் தண்ணீர் தேவை பெருகிக்கொண்டே இருக்கிறது. ஆனால், அதற்கேற்ப வரத்து இல்லை. தற்போதுள்ள நிலைமையில் 11 சதவீதம் தண்ணீர் பற்றாக்குறை தமிழ்நாட்டில் இருக்கிறது.வீட்டு உபயோகத்துக்கும், நீர்ப்பாசனத்துக்கும், கால் நடைகளுக்கும், தொழிற்சாலைகளுக்கும் தற்போதைய தண்ணீர் தேவை 1,868 டி.எம்.சி. ஆகும். ஆனால், நமக்கு கிடைப்பதோ 1,681 டி.எம்.சி.தான். 187 டி.எம்.சி. தண்ணீர் பற்றாக்குறையாக உள்ளது. இப்போதுள்ள நிலையில், மழைகாலத்தில் ஆறுகளில் கரைபுரண்டு ஓடும் தண்ணீரை தேக்கி வைக்கமுடியாமல், கடலில் போய் வீணாக கலப்பதைகண்கூடாக பார்க்கலாம். இதுபோல, ஏரிகளிலும், குளங்களிலும் தண்ணீர் நிரமபியவுடன், மீதமுள்ள தண்ணீர் வழிந்தோடி வீணாக போகிறது. ஆக, நீர்வளம் இல்லாத நமது மாநிலத்தில், மழை காலத்தில் வீணாக போகும் தண்ணீரை தேக்கி வைத்தால்தான், எதிர்காலத்தில் மிகமோசமானதண்ணீர் பஞ்சத்தை சந்திக்கவேண்டிய நிலையை தவிர்க்கமுடியும்.
ஆறுகளில் மணல் கொள்ளை நடப்பதை தடுத்து நிறுத்த காலம்காலமாக தவறிவிட்டதால்தான், தண்ணீரை இழுத்துப்பிடிக்காமல் வேகமாக ஓடவைத்து கடலில் கலக்க வைக்கிறது. ஆறுகளில், குளங்களில், ஏரிகளில் தண்ணீர் நிரம்பி அப்படியே நின்றால்தான், அருகில் உள்ள கிணறுகளில் எல்லாம் தண்ணீர் ஊறும். பூமியும் நீர்ப்பதத்தோடு இருக்கும். முதல்-அமைச்சர்ஜெயலலிதா அறிவித்தபடி 36 ஆயிரம் பாசன ஏரிகள் மற்றும் நீர்நிலைகளை புனரமைப்பதற்கான பணிகள் ஏற்கனவே தொடங்கப்பட்டுவிட்டன. மேட்டூர் அணை முன்பு இருந்த கொள்ளளவில் இப்போது இல்லை. சேறும், வண்டல் மண்ணும் நீர் நிலைகளின் கொள்ளளவை குறைத்துவிட்டது. ஆற்றிலே மணல் அள்ளுகிறார்கள் என்றால், அது கொள்ளையடிப்பதற்காக. ஆனால், நீர்நிலைகளில் தேங்கியிருக்கும் வண்டல் மண்ணையும், கரிசல் மண்ணையும் விவசாயிகளை நீ விலையின்றி எடுத்துக்கொண்டு உன் விவசாயத்துக்கு பயன்படுத்திக்கொள் என்றால், மகிழ்ச்சியோடு எடுத்துக்கொள்வார்கள். விளைச்சல் பெருக தன் வயலிலும் பயன்படுத்திக்கொள்வார்கள்.
-
முதல்-அமைச்சர் ஜெயலலிதா முன்பு ஆட்சி நடத்தியபோது,மழை நீர் சேகரிப்பு திட்டம் என்ற ஒரு நல்ல திட்டத்தை செயல்படுத்தினார். அவர் புள்ளி வைத்துக் கொடுத்தார். ஆனால், செயல்படுத்தவேண்டிய அதிகாரிகள், இப்போது அதில்தொய்வு காட்டுகிறார்கள். உடனடியாக தமிழ்நாட்டின் நீர்வளத்தை சேமிக்க, ஆறுகளில் தடுப்பு அணை, கடலில் போய் வீணாக கலக்கும் தண்ணீரை சேமிப்பதற்காக புதிய நீர்நிலைகள் அமைத்தல், ஆறுகளை இணைத்தல், எல்லாவற்றுக்கும் மேலாக மழைநீர் திட்டத்தை மும்முரமாக செயல்படுத்துதல் ஆகியவற்றில் அரசு மட்டுமல்லாமல், அரசு எந்திரம் என்று கூறப்படும் அதிகாரிகள் வர்க்கமும் முழுவீச்சில் இயங்க வேண்டும். மழைவளம் இல்லாவிட்டாலும், இருப்பதை சேமித்து சிறப்பாக, வளமாக, வாழ்வோம் என்பதையே தாரக மந்திரமாக கொண்டு செயல்படுவோம்.

நீர்ன் அருமை அது இல்லாத போது தான் தெரியும்